Yoshuwa 11
11
Yoshuwa ukukoma bamyene ba ku Ncelele
1Oho mwene Yambini wamu Hazola ayuvwile olu lushango lwa kukoma kwa Ishalela, pe watumine shawangu lizu kuli Yombambi mwene wamu Mandoni naku bamyene bamu Shimiloni namu Akishafwi, 2naku bamyene bamu matunga a binkanda ku ncelele namu mukulo wa Yondana ku mabukubuku a Liziba lya Ngalileya, mu litunga lya binyekwa naha shibumbo sha liwate hahepi na Ndoli. 3Kami watumine lizu ku Bakenaani ha zimbalila nimwazo za Yondana naku Baamoli na Bahita na Bapelizi na Bayembushi mu litunga lya binkanda, kuyakako na Bahivi aba bekalilenga ku nceto ya Lipili lya Helimoni mu litunga lya Mizipa. 4Bezile na banzita babo nimwabo na nzita ya bantu babengi ngonehe lihekelela lyaha shibumbo sha liwate. Bekalile kami na bambishi babengi na makoloyi bya nzita. 5Bamyene nimwabo aba bafungilile nzita yabo, pe bezile hamo mu kutendela munkungwa ku mushapa wa Melomi, mu kulwisha Ishalela.
6Nyambi ya Ngula wambile kuli Yoshuwa ngayi, “Hinga ubatina, ndaba nikabaziha nzona, ku shikati shino, nimwabo. Ukaketola makana a mawulu a bambishi babo na kuhokesha makoloyi abo.” 7Nohobene Yoshuwa na bantu bendi nimwabo babalwishile ku mushapa wa Melomi na kubabazumuna. 8Nyambi ya Ngula wapanikile Baishalela ngovu za kubakoma. Baishalela balwile, kami babatandilile kwakutali kuka bakumisha ku ncelele ya Shindoni naku Mishelefwota Mayima, kami wabatandile bakaba kumishile ku mushamuko wa mukulo wa Mizipa. Ngunga yatwalileho hantu noho kwabulile nou wakushalaho ku bamalamo babo. 9Yoshuwa watendele kukwabo ebye amutongwezele Nyambi ya Ngula. Waketwezele makana a mawulu a bambishi babo na kuhokesha makoloyi abo. 10Yoshuwa niho abokele kunyima, wapukwile lukena lwa Hazola nakuziha mwene wamo. Ku shikati shiyo Hazola wekalile na ngovu zazinene shikuma kunowo wene nimwawo. 11Bazihile bantu nimwabo, howa muntu bashiyileko wamumi, pe na lukena lwa Hazola lwahokeshiwile.
12Yoshuwa wapukwile obo bamyene nimwabo na zinkena zabo nimwazo nakuziha bantu nimwabo ngonehe shiya alayelele Moshesha mukamulimo wa Nyambi ya Ngula. 13Hinge noho Baishalela kaliha bahokeshele zinkena ziya zazikiwile ha binkanda, ndele tuhu lukena lwa Hazola, olu ahokeshele Yoshuwa. 14Bantu ba Ishalela bashimbile nimwabyo byabiwahe na bimuna byafumine mu zinkena eze pe balitentekelelebyo, kuli Yoshuwa. Ngoboni bazihile bantu nimwabo, kowa muntu bashiyileho wamumi. 15Nyambi ya Ngula walayelele mukamulimo wendi Moshesha, kami Moshesha wafundizizile Yoshuwa ou wombatalile, watendele byuma nimwabyo biya Nyambi ya Ngula atongwezele Moshesha.
Yoshuwa ukupukula litunga nimwalyo
16Yoshuwa wapukwile litunga nimwalyo na litunga lya binkanda na litunga lya binyekwa ku ncelele naku mabukubuku walyo, hamo na Mukulo wa Yondana. 17Wapukwile litunga lyabalikilile ku mabukubuku a Lipili lya Halaki hahepi na Endoma, kukakuma naku Mbaalu Ngandi ku ncelele, mu mukulo wa Lembanoni ku mabukubuku a Lipili lya Helimoni. 18Yoshuwa walwile na bamyene ba matunga awa shikati shashitali. 19Kowa lukena lwatendele ku mwena na Baishalela, ndele tuhu Bahivi, bamo bazikilenga mu Ngimbiyoni. Nimwabo bakomiwile mu nzita, 20#Nday 7:16. Nyambi ya Ngula wabakaluhishile mitima ngayi balwishe Baishalela, nohobene ngayi mwanga bayatiwile kukuloba, pe mwanga nimwabo bazihiwe na kubula kubayuvwila nceshe. Eshe nisho Nyambi ya Ngula atongwezele Moshesha.
21Ku shikati shiyo Yoshuwa wayile na kulobesha bashihemwa sha malengwalengwa atumbiwile ngayi Baanakimu aba bekalilenga mu litunga lya binkanda mu Hembuloni namu Ndembila namu Anambi namu litunga nimwalyo lya binkanda lya Yunda na Ishalela. Yoshuwa wabalobeshele nimwabo kulungu na zinkena zabo. 22Kowa Kaanakimu washalile mu litunga lya Ishalela. Hinge kwingi noho babashe tuhu bashalile mu Ngaza namu Ngati namu Ashindondi.
23Yoshuwa wapukwile litunga nimwalyo, ngonehe Nyambi ya Ngula atongwezele Moshesha. Walipanikile ku Baishalela kwinga likona lyabo na kulitapulula mu bitapilo, shitapilo shimo ku mushobo na mushobo.
Nohobene bantu bakatalile ku nzita.
Libuka Lya Kuyela © Bible Society of Zambia, 2020.