Yoshuwa 10
10
Baamoli ba kukomiwa
1Mwene wamu Yelushalema,#10:1 Yelushalema: Nilo lwengile lukena lwa Bayembushi ha kutatika. Andoni Zendeki, oho ayuvwile ngayi Yoshuwa unapukulu lukena lwa Ayi na kululobesha nakuziha mwene wamo ngonehe eshe atendele ku lukena lwa Yeliko na mwene wamo. Kami wayuvwile ngayi bantu ba ku Ngimbiyoni banyepele ku mwena na Baishalela kami bali na kwikala hakati kabo. 2Bantu bamu Yelushalema batinine shikuma ku neshe ndaba Ngimbiyoni lwengile lukena lwalunene ngonehe zinkena nimwazo ziya zekalilenga na bamyene, lwengile lwalunene shikuma kupitakana Ayi na bantu balwo bengile bakakulwa na kukanca. 3Niho Andoni Zendeki atumine mazu kuli Hohama mwene wamu Hembuloni na kuli Pilamu mwene wamu Yalimuti na kuli Yafwiya mwene wamu Lakishi na kuli Ndembila mwene wamu Engiloni ngayi, 4“Yekenu na kunyavwa tulwishe Ngimbiyoni, ndaba bantu balwo banaliyuvwashana na Yoshuwa na Baishalela.” 5Aba bamyene mutanu ba Baamoli, bamyene ba Yelushalema na Hembuloni na Yalimuti na Lakishi na Engiloni bafungilile banzita babo, pe bazingulukile lukena lwa Ngimbiyoni, pe balulwishile.
6Bantu bamu Ngimbiyoni batumine mazu kuli Yoshuwa ku munkungwa mu Ngilingale ngayi, “Hekulu, hinga utufutamina. Yeka shawangu na kutuyavwa. Wutulamwine, bamyene nimwabo ba Baamoli mu litunga lya binkanda, banafungili banzita na kutulwisha.”
7Nohobene Yoshuwa na banzita bendi nimwabo na bantu bangovu bafumine mu Ngilingale. 8Nyambi ya Ngula niho ambile kuli Yoshuwa ngayi, “Hinga ubatina boha. Nakupanakale ngovu za kubakoma. Kowa umo wakukwabo ukatwesha kwimana nobe.” 9Yoshuwa hamo na banzita bendi bendele wushiku nimwawo kufuma ku Ngilingale, pe walwishile Baamoli na kubabazumuna. 10Nyambi ya Ngula watampwishile Baamoli ku meho a banzita ba Ishalela. Baishalela babazihilile ku Ngimbiyoni na kubatandila ku nzila ya ncinencine ya lipili lya Mbeti Holoni. Pe babatandilenga na kubalwisha ku mabukubuku kukakuma naku Azeka naku Makenda. 11Oho Baamoli betukilenga ku banzita ba Baishalela ku nzila ya ncinencine yaku Mbeti Holoni, Nyambi ya Ngula walokeshele mvula wa likandavula wa mamanya wayile na ku baloka mu nzila nimwayo kukakuma naku Azeka. Bantu bafwile ku mvula wa likandavula bengile babengi kupitakana aba bazihiwile ku Baishalela.
12Ha mutena uya Nyambi ya Ngula wapanikile Baishalela ngovu za kukoma Baamoli, Yoshuwa walombelele kuli Nyambi ya Ngula ku meho a Baishalela ngayi,
“Obe mutena,
yimana nkonka ha Ngimbiyoni,
Obe ngonda,
tulumana ha mukulo wa Ayaloni.”
13Mutena wemanine nkonka na ngonda kami kaliha wendele hantu noho mukoka wa Baishalela wakomene bamalamo babo. Eshe shatikitiwile mu Libuka lya Yashale. Mutena wemanine tuhu mukati ka likumbi, pe kaliha wayile mu kulela mutena wa nzimba nimwawo. 14Hinga kwatanga ku mwaka, kami hinga mwaka kukatanga kwikala mutena wakulifweka nawo, oho Nyambi ya Ngula akayuvwilile muntu. Nyambi ya Ngula walwile ku mbalila ya Ishalela.
15Oho Yoshuwa na banzita bendi bakomakale Baamoli, babokele ku munkungwa ku Ngilingale.
Yoshuwa ukukwata bamyene ba Baamoli mutanu
16Bamyene mutanu bashilile, pe baholamine mu linzolongoma ku Makenda. 17Muntu umo wabawanine, pe watongwezele Yoshuwa okubaholamine bamyene mutanu. 18Yoshuwa wambile ngayi, “Andumwinenu ku menginino a linzolongoma mamanya amo amanene, pe muyakeko bakakulama 19ngoboni enu hinga mwikalako. Yenunga na kutanda bamalamo na kubalwishila kunyima. Hinga mubaleha ngayi ba kume ku zinkena zabo. Nyambi ya Ngula, Nyambi yenu, unamipana ngovu za kubakoma.” 20Yoshuwa na Baishalela babazihile, hinge shingi noho bamo balitazile kupanzila mukati ka twimbi twa zinkena zabo pe kaliha bazihiwile. 21Niho bantu ba Yoshuwa nimwabo babokele kukwendi shiwahe ku munkungwa waku Makenda. Kowa muntu wamu litunga liyo wazamukile kwambisha Baishalela.
22Niho Yoshuwa ambile ngayi, “Shinkululenu shipana sha linzolongoma, pe mulete obo bamyene mutanu kuno kukwami.” 23Nohobene bashinkulwile linzolongoma pe baletele bamyene bayo mutanu kuli Yoshuwa, bayo bamu Yelushalema na Hembuloni na Yalimuti na Lakishi na Engiloni. 24Bamyene oho babaletele kuli Yoshuwa, wehanine bantu nimwabo Baishalela pe watongwezele babilolo aba bayile nendi ngayi, “Balyate mawulu wabo ha zincingo za naba bamyene.” Pe babalyatile. 25Yoshuwa wambile ku babilolo ngayi, “Hinga mutina, hinge kupopa. Yingenu ba kushuma na kukanca, ndaba Nyambi ya Ngula uli na kutenda eshe ku bamalamo benu nimwabo.” 26Niho Yoshuwa azihile bamyene na kubashwanga ku bitondo mutanu, aha bekalile kukuma ku mazolo. 27Kukulela kwa mutena, Yoshuwa watongwezele babilolo ngayi bafumishe zinyutu za bamyene na kuziyumbila mu linzolongoma omu batatikile kuholama. Mamanya amanene ayakiwile ku menginino a linzolongoma, nihano niko ashili.
Yoshuwa ukukomenako kami Litunga lya Baamoli
28Yoshuwa walwishile lukena lwa Makenda na kulupukula na mwene wamo ha mutena uyo. Wazihile bantu nimwabo bekalile muyo mu lukena. Kowa muntu bashiyilemo wamumi. Watendele kuli mwene wamu Makenda ngonehe eshe atendele kuli mwene wamu Yeliko.
29Yoshuwa wafumine ku Makenda na banzita bendi bayile ku lukena lwa Limbina na kululwisha. 30Nyambi ya Ngula kami wapanikile Baishalela ngovu za kukoma ha lukena olwe na mwene wamo. Kaliha bashiyilemo muntu. Batendele kuli mwene ngonehe batendele kuli mwene wamu Yeliko.
31Oho afumine ku Limbina, Yoshuwa na banzita bendi bayile ku lukena lwa Lakishi. Baluzingulukile na kululwisha. 32Nyambi ya Ngula wapanikile Baishalela ngovu za kukoma Lakishi ha mutena wawubili wa nzita. Ngonehe shiya batendele ku Limbina, kaliha washiyile muntu, ngoboni bazihile bantu nimwabo mu lukena. 33Niho mwene Holamu wamu Ngeza wezile mu kuyavwa Lakishi, ngoboni Yoshuwa wamukomene hamo na banzita bendi, kami kaliha bashiyilemo muntu wamumi. 34Yoshuwa na Baishalela nimwabo bafumine ku Lakishi, bayile ku lukena lwa Engiloni, baluzingulukile na kululwisha. 35Balupukwile wowo mutena, pe balobeshele bantu nimwabo, ngonehe shiya batendele ku Lakishi.
36Ebye oho byapitile, Yoshuwa na banzita bendi bafumine ku Engiloni, bayile ku lukena lwa Hembuloni lwamu binkanda, pe balulwishile, 37pe balupukwile, bazihile mwene na bantu nimwabo bamu lukena kutwalilila na minzi ya kwakwipi. Yoshuwa walobeshele lukena ngonehe atendele ku Engepita. Kowa muntu washalilemo wamumi.
38Niho Yoshuwa na banzita bendi babokele ku lukena lwa Ndembila pe wakalulwishile, 39walupukwile na mwene wamo na minzi nimwayo ya hahepi. Bazihile bantu nimwabo. Yoshuwa watendele ku Ndembila na mwene wamo ngonehe eshe atendele ku Hembuloni na Limbina na bamyene bamo.
40Nohobene Yoshuwa wakomene litunga nimwalyo. Wakomene bamyene bamu matunga a binkanda naba ba ku ncezumuko yaku mushamuko naba bamu binyekwa bya ku mponci. Kuyakako nanobo bazika ku mabukubuku mu litunga lyanyuminine lya Nengembu. Wabulile kukobokela muntu umo, bantu nimwabo bazihiwile. Eshe nisho alayelele Nyambi ya Ngula, Nyambi wa Ishalela. 41Yoshuwa wabakomene kubalika ku mabukubukuku a Kandeshi Mbaneya kukakuma naku Ngaza hahepi na shibumbo sha liwate, kuyakako na matunga nimwawo amu nciza ya Ngosheni, kukakuma naku ncelele ku Ngimbiyoni. 42Yoshuwa wakomene bamyene nimwabo aba na matunga wabo mu shikati shimo, ndaba Nyambi ya Ngula, Nyambi wa Ishalela, walwilililenga Ishalela. 43Oho eshe shapitile, Yoshuwa na banzita bendi babokele ku munkungwa ku Ngilingale.
Libuka Lya Kuyela © Bible Society of Zambia, 2020.