Ishaya 31
31
Nyambi ukakinga Yelushalema
1Makando wabo aba bakuya ku Engepita na kushinga
kuyavwiwa ku Engepita.
Bakukulupila mu bambishi,
na makoloyi ndaba enga amengi,
na kukulupila ha naba bakandamanga ha bambishi ndaba banengi ba kushuma shikuma,
ngoboni kupenza ku wa Kuyela wa Ishalela bafwako,
hinge kwipwiziza kuli Nyambi ya Ngula.
2Ngoboni Nyambi ya Ngula uli na ngana, pe ukaleta malwa,
wabweshangaha mazu wendi,
ngoboni ukakatuka na kulwisha bakakutenda byabibi,
kami ukalwisha baya bayavwanga batendanga wubi.
3Baengepita benga bantu tuhu kaliha Nyambi,
na bambishi babo benga lutu kaliha moyo.
Oho Nyambi ya Ngula akatandubula liboko lyendi,
mukakubayavwa ukapukazala,
na litunga lya kupopa ayavwilenga ukawa,
pe bakalobeshiwa nimwabo hamo.
4Nyambi ya Ngula wambile nehe kukwami ngayi,
“Ngonehe shimbwi hinge mwana shimbwi abulumanga ha nyama yendi,
pe oho muhoko wa balishani ba kumukalukila na kumulwisha,
kutina mazu wabo wufwako,
hinge kutampwa na miyoyo yabo wufwako.
Niho Nyambi wa Makunge ukakunkuluka hanci kulwila ha lipili lya Ziyoni,
na ha mutwe wa lipili.
5Nyambi wa Makunge ukakinga Yelushalema na kumu bibiza,
ngonehe tuyoni tukupapazala hayilu ya lihwa kukinga bana batwo.
Ukubazinguluka na ku balamwina.”
6“Enu bantu ba Ishalela, tengulukilenu kuli Nyambi ou munafutamini shikuma. 7Ndaba shikati shikeza, oho muntu nimwendi aka yumba tunankishi otu muna tende na maboko wenu a wubi ha shiliva na ngolinde.
8Baashiliya bakalobeshiwa mu nzita,
ngoboni kaliha bakalobeshiwa na ngovu za bantu.
Baashiliya bakashintuluka mu nzita,
pe bandumbana babo, bakabafutula bandungo.
9Bipata byabo, bikanyemukila hanci ndaba ya bowa.
Babilolo Baashiliya,
bakatampwa bakamona ndembela ya ngunga.”
Eshe nisho anamba Nyambi ya Ngula, ou ukuleemeshiwa mu Ziyoni,
kami mundilo wendi uli mu Ziyoni na ngaanze yili mu Yelushalema.
Libuka Lya Kuyela © Bible Society of Zambia, 2020.