Ishaya 32
32
Wene wakulunga
1Shikati shikeza, oho kukekala mwene ukalela mu kulunga,
na batulela bakalela mu kupwisha.
2Muntu nimwendi ukenga ngo shilembalemba sha kutinina mpepo,
na matinino akuyuwamina mvula,
hinge ngonehe tushinzi twamema mu libelelengwa,
na mubombola wa limanya lyalinene mu litunga lyanyuminine.
3Niho meho a bantu baya ba ku mona afwako ku zimanana,
na matu a bantu baya ba kuyuvwa akayuvwishisha.
4Bakakwamba na kubula kuhanganika,
bakalimuka byambo na kubiyuvwishisha.
Baka shikukuma, bakamba na kulubulula byambo shiwahe.
5Bakuyeba kukapanikiwa kami maleema bafwako,
hinge ba mahalo kukawana maleema bafwako.
6Ndaba shibulangana shambanga byowa,
kami wahanganikanga byabibi.
Pe watendanga bya kubula wunyambi.
Bambanga bya kuhandula Nyambi ya Ngula,
babulanga kupana byakulya ku baya bali na nzala,
na kubula kupana mema ku baya bali na linyontwa.
7Shibulangana biheka byendi byabibi,
wafunganga byabibi bya kulobesha ba kushepwa
mu nzila ya ku babangila bya mahalo,
na ku bakwangisha kuwana byabo.
8Ngoboni muntu wamuleemu,
watendanga byuma byabiwahe, kami wemaninanga bya kupwisha.
9Yuvwililenu, enu bambuyama muli mu mpoza,
enu bambuyama mwabula kuyuvwa bowa,
yuvwililenu ebye nikwamba.
10Kukapita mwaka umo na matena amashe,
pe enu bambuyama muli mu mpoza, yikalenu na bowa,
ndaba mikabo ya shinyanca yikabulako,
kubuya kwa mikabo kukekalako kufwako.
11Kankenu, enu bambuyama muli mu mpoza,
yikalenu na bowa, enu bambuyama muli mu mpoza,
vulenu bivwalo byenu mwende muhelengwa,
pe mulikumbakanye bicancolo mu zinkanda zenu.
12Likamenu ha tupumpo ku monesha wunginga ndaba ya mafuba wenu a wilo
na mafuba wenu a mikolobozi ayimanga mikabo ya shinyanca shikuma analobo,
13ha litunga lya bantu bami hakamena mihongela na mitwampuku.
Ee tuwenu mbingo ha matala nimwawo aya awahilililenga namu lukena lwa ku wahilila.
14Musheke ukafutaminiwa,
na lukena lwa bantu babengi lukafutuka mapembe,
mimi yaha binkanda na tupeshi bikashiwuka mwaya myaka,
kami bamintinkwe bakawahilililamo mukafutuka mabuyishilo a bambelele.
15Hantu shikati shinakumu sha kututumina moyo wendi wakuyilu,
libelelengwa likafutuka mafuba a wilo,
na mafuba a wilo akamoneka ngo lishaka.
16Kuyata kwakuketula byambo kukatendiwa mu libelelengwa,
na kulunga kukekala mu mafuba a wilo.
17Pe mikabo ya kulunga yikaleta ku mwena,
kami bya kulunga bikaleta ku mwena mwaya mwaka.
18Bantu bami bakazika mu myanya ya ku mwena,
na minzi ya kwikala shiwahe na myanya ya ku shuma ya kukatalila.
19Hinge ndi mvula wa nkuli ukalobesha mashaka,
na lukena lukabunkoliwa.
20Bantu bakawahilila,
ndaba bakekala na mema amengi,
na kwitabilisha zingombe zenu na bambongolo
ngayi bende oku bakushinga nimwako.
Libuka Lya Kuyela © Bible Society of Zambia, 2020.