Ishaya 30
30
Kuliyuvwashana kowa na Engepita
1Eshe nisho anamba Nyambi ya Ngula,
“Makando wabo aba bakakufutulukila,
aba ba kukonka bifungo byabo biya bya kubula kwinga byami.
Bakuliyuvwashana kwakubula bifungo byami.
Bakuwezelela wubi kuwamina.
2Banayi ku Engepita na bifungo byabo kwakubula kubela kwami.
Bakushinga ngayi Fwalo abalamwine,
haya bakushinga kuholama mu mubombola wa Engepita.
3Ngoboni kulamwina kwa Fwalo,
kukafutuka lisheni kukwenu,
kami shiholamino shenu mu mubombola wa Engepita kukamiletela malwa.
4Hinge ndi ngayi babilolo ba Fwalo bali mu Zowani,
kami bankamba bendi banakumu mu Haneshi,
5hinge noho, bantu ba Yunda, bakayuvwa lisheni,
ndaba liya litunga kuka balamwina hinge ku bayavwa lifwako.
Likabaletela tuhu lisheni na malwa.”
6Elye nilyo lizu lya Nyambi,
ha tuyamana twa ku Nengembu ngayi,
“Bankamba bakwenda mu litunga lya kuhumana na malwa,
omu muli babimbwi na bampili mayoka a wuhungu,
na bankonkola bakakwenda kuyilu,
hinga bashimba zintupu za ndando yayinene ha bambongolo na makamela,
ziya ba kutwala ku litunga liya likubula kutwesha ku bayavwa.
7Litunga lya Engepita, kutwesha kuyavwa lifwako.
Niho ninatumbu liya litunga ngayi,
‘Lahambu wakubula kutenda shamina.’”
Bantu bakubula kwombatala
8Nyambi wantongwezele ngayi,
haya batikitilebyo ha matapa,
kami bitikite mu libuka,
ngayi kumbili mwanga bikenge wupaki wakubula kumana.
9Aba bantu banengi bakakufutulukila,
na bana ba mahalo,
bana bakubula kushinga kuyuvwilila ku longesha
kwa Nyambi ya Ngula.
10Enu mwambanga ku babimonamona ngayi,
“Hinga mumona bimono,”
kami ku bamiluwe ba Nyambi mukwamba ngayi,
“Hinga mulubulula kukwetu byabiwahe,
ambenu kukwetu tuhu byambo byabiboto,
tulubulwilenu bya kukontama.
11Fumenu mu nzila, hendukenu mu nzila,
kushinga kami kuyuvwa bya wa Kuyela wa Ishalela tufwako.”
12Nohobene wa Kuyela wa Ishalela ukwamba ngayi,
“Ndaba munakana elye lizu,
munakulupili mukwikalika baminenu na shilala na kukulupila ha kwongeza,
13nohobene ou wubi kukwenu,
ukafweka ngonehe mwata,
unatabuku ha limota lyalitali likushinga kuwa,
kuwa kwalyo kukenga kwa ku bazumuna,
14kubunkoka kwalyo kukafweka ngo nyungu ya lima ya kubumba,
eye yacancoliwanga na kubula kuyiyuvwila nceshe,
kami ku bibanku byayo kowa bikawaniwako
bya kukalila mundilo ha liziko,
hinge sha kutekwisha mema mu lishima.”
15Nohobene mwene Nyambi ya Ngula,
wa Kuyela uya wa Ishalela ukwamba nehe ku bantu ngayi,
“Ha kutenguluka na kukatala, nimo mukapulukila,
mu ku mwena namu kukulupila nimo muli nyala zenu.”
Ngoboni mu kukana kutenda noho,
16mwambile ngayi,
“Byo! Tuka panza ku bamalamo betu na kukandama ha bambishi ba lubilo.”
Nohobene mukapanza na kuya, ngoboni,
baya ba kumitanda bakenga ba lubilo shikuma.
17Bantu 1,000 baketuka ku mafumbila a muntu umo wa kanzita,
ku mafumbila a bakanzita mutanu, nimwenu muketuka na kutina.
Hantu mukashale ngonehe shishimi bayakanga ndembela shinemana ha lipili,
ngonehe ndembela ha shinkanda.
18Nohobene Nyambi ya Ngula,
ushili kushinga ku monesha nceshe kukwenu,
nohobene ukalikatula hayilu na kumiyuvwila nceshe,
ndaba Nyambi ya Ngula, nengi Nyambi wayatanga na kuketula.
Bali na mfuywezi baya nimwabo ba kutatilila hahendi.
Nyambi ukafuywela bantu bendi
19Enu bantu ba Ziyoni bekala mu Yelushalema, mufwako kukalila kami. Nyambi ya Ngula, mwa shikuma ukamiyuvwila nceshe, oho akayuvwa mbingo zenu ukamikumbula. 20Kami hinge ndi Hekulu ukamitabilisha kupita mu makando, ngoboni niye mwine ukekala nenu na kumi longesha, kami mukamumona. 21Matu enu akayuvwa lizu kunyima yenu, hilyamba ngayi, “Yino nzila, endenumo,” Oho ukutengulukila ku shilyo, hinge oho ukutengulukila ku shimoho. 22Mukalimbulula tunankishi twenu otu mwayenga na shiliva kami mukayumba bifwekesha munafwiki na ngolinde ngo byuma bya mazilo naku batongweza ngayi, “Fumenu aha!” 23Oho mukashanga mbuto yenu, Nyambi ya Ngula ukaminokeshela mvula wakuyikulisha na kumipana byakulya byabingi na zingombe zenu na mabuyilo amengi. 24Mapulu na bambongolo ba limanga mafuba enu bakabuya mwila wawuwahe, ou munaleleke na mafosholo. 25Ha mutena uyo oho bipata bya bamalamo benu bikakomiwa na kuzihiwa kwa bantu, tushinzi nimwato tukakuka mema kufuma ku mapili na binkanda. 26Ngonda ukatwa wezi ngo mutena, kami wezi wa mutena ukawezelela bikati mutanu na kabili kupitakana ha kutatika, nehe wezi wa matena mutanu alifungili hamo. Ebye nimwabyo bikatendiwa oho Nyambi ya Ngula akapamba na kupolesha bitombo bya bantu bendi.
Nyambi ukashushula Ashiliya
27Monenu, lizina lya Nyambi ya Ngula,
lili na kwiza kufuma kwakutali na
wukali wakubanga na makumbi a wishe akukakama,
mivumbo yendi yinenzala na kupilama,
kami lulimi lwendi lukwinga ngo kulasheka kwa mundilo.
28Kwoya kwendi ku kwinga ngo
kashinzi ka nayiti kukumina mu ncingo,
ukupepa matunga na kuwalobesha na kuyaka
ku mimbanga ya bantu lumingo lwaku bahendwisha.
29Ngoboni enu bantu ba Nyambi, mukawahilila na kwimbila ha mutena wa shimbo sha kuyela. Mukawahilila ngo bantu bakuya ku lipili lya Nyambi ya Ngula naku Limanya lya Ishalela na mushumina wa tunamutolilo.
30Nyambi ya Ngula ukengisha muntu nimwendi kuyuvwa lizu lya kukangoka na ngovu za wukali wendi. Kukekala milangi ya mundilo na kumbyazeka kwa makumbi na likandavula na mvula wa mamanya. 31Baashiliya bakatina oho bakayuvwa lizu na ngovu za wukali wa Nyambi ya Ngula, pe ukabashushula na muwana wendi. 32Ngonehe Nyambi ya Ngula, akonzela ku bakama kami, bantu bendi bakalama shikati na kumbeta zingoma na tumbuli twatunene. Nyambi niyemwine ukalwisha Baashiliya. 33Ndaba mwanya wakuhokeshela mwene wa Ashiliya wawahishiwile mwaka. Mwanya unengi wawunene mu lupati na kunonka, kami munabungikiwi mushiinzi wa nkuni. Nyambi ya Ngula, ukoyelaho muuku wakwinga ngo mulangi wa mundilo unabangiziwi.
Libuka Lya Kuyela © Bible Society of Zambia, 2020.