Ishaya 29
29
Makando ha Yelushalema
1Makando wobe obe Aliyele#29:1 Aliyele: Lizina limina lya Yelushalema., obe Aliyele,
lukena luya Ndavita azikile bipata bya nzita,
lehenu mwaka umo hinge yibili yipite,
mayambwayambwa atwalililengaho.
2Nyambi ukaleta makando ha Aliyele,
pe kukekala mbingo na malila,
kami lukena lukafutuka kaala kakenzala na mukeza.
3Nehi atendele Ndavita, Nyambi ukazikaho bipata
bya kulwisha lukena na kuluzinguluka na ku shitilako tupeshi.
4Ukakabakana kwamba ku nceto ya limvu,
na lizu lya kuyebetela kufuminina hanci.
Lizu lyobe likayuvwanika hanci ngo lizu lya mutalu,
nyambilo ya kuyebeta yikafuma mu lukungu.
5Bamalamo bobe nimwabo bakavula ngo lukungu,
nanaba banguma bakenga babengi ngo muzungu wapepukanga.
Pe kubazumuka tuhu, babapekumunakale.
6Nyambi wa Makunge ukamipulwisha na mishika,
na kukanka kwa kaye na miyoyo yayinene,
na kakundukundu na nkuli na mulangi wa mundilo wakulobesha.
7Niho matunga amengi aya alwishile Aliyele,
aya amulwishile hamo na bipata byendi na kumumonesha malwa,
bakenga ngonehe shimono ku wushiku.
8Matunga amengi aya akalwisha Lipili lya Ziyoni,
akafweka ngo muntu uli na nzala,
ukulota halya ngoboni kubazumuka ha tulo nzala hinga yekala,
ngonehe muntu nafu linyontwa ukulota hanwa mema,
ngoboni kubazumuka ha tulo, ha mulibu hinga hayuminina.
Bantu ba kuyinisha kubela
9Komokenu na kulihohoma, zimananenu mwinge batushishitwa.
Kolwenu, ngoboni kaliha na waine,
talangilenu, ngoboni kaliha na malovu.
10 #
Lom 11:8. Nyambi ya Ngula unalete moyo wakuya mutulo twa ngonzi.
Enu bamiluwe,
Nyambi unamifwiki meho,
unamifwiki ku mitwe enu babimonamona.
11Kutontoloka kwa shimono eshi nimwasho sha bamiluwe, enu kuka limukabyo mufwako, bikafweka ngo libuka lya kubula kutwesha kutontololiwa. Oho mu kutwala liya libuka ku muntu ukulimuka kulaba, ngayi mwanga amilabile ebye bilimo, niye ukukumbula ngayi, “Kutwesha nifwako, ndaba libuka linashinkiwi.” 12Pe oho mu kupana libuka ku muntu wakubula kutwesha kulaba, ngayi mwanga amilabile, ukamikumbula ngayi, “Kulimuka kulaba nifwako.”
13 #
Mat 15:8-9; Mako 7:6-7. Mwene ukwamba ngayi,
“Aba bantu ba kundemeeka na mivumbo yabo,
ngoboni mitima yabo yili kwakutali na nami.
Bali na kundemesha na ndayano zinatendiwi ku bantu,
eze ba ku longesha.
14 #
1Koli 1:19. Haya nikatenda bya kukomokesha kunaba bantu,
bikalilundamina shimo na shamina. Ngana za bakakukeya zikamana,
kalimukisho ka baya bali na ngana shikuma kakaloba.”
Kulumbeza bya kumbili
15Makando wabo baya bali na bihanganiko bya kuholekela Nyambi ya Ngula,
ba kutenda milimo yabo mu mincimpwe,
pe bakwamba ngayi, “Yani ukutumona? Yani ukulimuka ebye tukutenda?”
16 #
Isha 45:9. Bakufutula byuma, kati mukakubumba,
ukwezekela hamo na lima ndi?
Kati shuma shinabumbiwi, shikutwesha kwamba na muntu washibumbile ngayi,
“Kaliha wambumbile?” Kati nyungu,
yikutwesha kwamba na muntu wayibumbile ngayi,
“Kowa ebye ukulimuka”?
17Mu kashikati kakashe,
kati Lembanoni wufwako kukafutuka mfuba ya wilo,
nanoyo mfuba ya wilo kukamoneka ngo lishaka yifwako ndi?
18Ha mutena uyo bizikamatu
bikayuvwa mazu atikitiwa mu libuka,
kami hinge bali mu mincimpwe, meho a tushishitwa akamona.
19Bakakulilimbwilisha bakawana ku wahilila muli Nyambi ya Ngula,
pe bancepwe bakawahilila ndaba ya
wa Kuyela uya wa Ishalela.
20Akenga mamaninino abo baya bakakuyandisha baminabo na kuhandula Nyambi,
ndaba mukawubi nimwendi ukalobeshiwa.
21Nyambi ukalobesha baka kubangila baminabo bya mahalo,
na ku bibiza banatende mulandu,
na wupaki wa mahalo ba ku futakanya byambo bya ba kupwisha.
22Nohobene haya Nyambi ya Ngula, ou walamwinine Abulahama, ukwamba ha litala lya Yakobo ngayi,
“Yakobo wufwako kukayeneshiwa kami,
lupala lwendi lufwako kukahomba.
23Ndaba oho akamona bana bendi,
na milimo yami, mukati kabo,
pe bakalemeka lizina lyami,
bakalemeka wa Kuyela wa Yakobo,
kami bakemana na kutina Nyambi wa Ishalela.
24Pe baya banabipishi mu moyo bakayuvwishisha,
na baya bali na ntongawushi baketabila kufundiziziwa.”
Libuka Lya Kuyela © Bible Society of Zambia, 2020.