Ishaya 17
17
Nyambi ukashushula Shiliya na Ishalela
1 #
Yel 49:23-27; Amos 1:3-5; Zaka 9:1. Eze nizo ncango za hali Ndamashika ngayi,
“Monenu, Ndamashika ufwako kukekala lukena kami,
ngoboni lukafutuka mushiinzi wa mazilo.
2Zinkena za Alole zikafutaminiwa,
pe zikenga mabuyishilo a matanga aba bakalalangamo,
kwakubula wakubayuvwisha bowa.
3Zinkena za bipata bya mu Efulemu bikaloba,
ngovu za wene zikamana mu Ndamashika.
Aba bakashala mu Shiliya, bakekala na lisheni ngonehe bantu ba Ishalela.
Nisho anamba Nyambi wa Makunge.”
4“Ha mutena uyo, maleema a Yakobo akashepeshiwa,
na zinyutu zabo zikakwanzuluka.
5Shikafweka ngo mukakuteza unakukungula ntende,
na kuteza mpeka na liboko lyendi.
Shikafweka ngo muntu ukupepula mpeka,
mu mafuba akupupulula mwaka amu mukulo wa Lefwayima.
6Ngoboni mpeka zimo zikashalaho,
zikafweka ngo mutondo wa olive unabuyiwi mikabo,
na ku shiya tuhu mikabo yibili hinge yihatu yinashala ku congwacongwa ya mutondo,
hinge ku shiya tuhu mikabo yina hinge mutanu ku myahi nimwayo.
Ami, Nyambi ya Ngula ninamba. Nyambi wa Ishalela.”
7Ha mutena uyo wakeza, bantu bakatengulukila kuli Shakalenga wabo, bakayimbula meho wabo kuli wa Kuyela wa Ishalela. 8Bafwako kukapenzelela ku kaala ka mamanya, ku mulimo wa maboko wabo. Bafwako kukatwala mutima ku zimpangwa za Ashela na ku tuula banaziki twa kuhokeshela incence yayiwahe.
9Ha mutena uyo wakeza, zinkena zabo zamu bipata, zikafweka ngo mapembe a zinkena za Bahivi na Baamoli, awa bashiyile ndaba ya Baishalela, pe kowa aba bakekalamo.
10Unavulama Nyambi mupulwishi wobe,
kami shilolo mwanuke Limanya lyenu lya Kupulukila.
Hinge ndi mukashanga mikolobozi ya shinyanca yayiwahe ngayi mulemeshe nyambi washenge,
11hinge ndi ngayi yikazobela na kukula wowo mutena mukayishanga,
na kuyaka ntemo kulumenemene luya mukayishanga,
kowa ebi mukateza.
Kukekala tuhu malweli na kukola kwa kubula kumana.
12Tawee, yino miyoyo ya matunga,
yinafweke ngonehe mishika ya liwate.
Tawee, kuna kunkwancana ngonehe kunkwancana kwa mema amengi.
13Mushumina wa bakamatunga wakuyuvwanika ngo mema amengi.
Ngoboni Nyambi ya Ngula ukabakalihila, pe bakatinina kwakutali.
Ukabatanda pe bakapanzana ngonehe muzungu ukupepoka na mpepo ha lipili,
ngonehe lukungu lwa kakundukundu ka mvula.
14Ku shikati sha mazolo, kukekala malwa akubabazumuna.
Ngoboni, oho mutena shilolo utabule kukamoneka bafwako.
Eye niyo ncuungu ya baya ba kutupukula,
na mamaninino a baya ba kutuyibila.
Libuka Lya Kuyela © Bible Society of Zambia, 2020.