Ishaya 18
18
Nyambi ukashushula Etopya
1 #
Zefw 2:12. Makando ku bantu bekala mu litunga lya ha nciza ya mishinzi ya Etopya!
Kukuyuvwanika mungunina wa mbando.
2Olyo likutuma bankamba baliyavwishilenga mato a matete
ha kupita mu mushinzi wa Nayilo.
Endeshenu, yenu enu bantumwana ba lubilo,
ku matunga akwakutali akulembuka,
ku bantu ba kutinisha bali hahepi naba balikwakutali,
litunga lya ngovu likakoma litunga lya tapuliwa na mishinzi.
3Nimwenu enu bantu mwekala mu kaye,
enu mwazika hano hanci,
ndembela oho yikazikiwa hayilu ya mapili mu kuyimona,
pe oho mpandula yikavuma, mukayiyuvwa.
4Eshe nisho akwamba Nyambi ya Ngula kukwami ngayi,
“Nikekala mu ku mwena mu mwanya wami,
hinga napenza ku mwaana oho kwashakale,
na mume wa mbundu ukutuka ha shikati sha kuteza.”
5Ndaba shikati sha kuteza oho shilolo shikume,
oho ntemo zatotomokakale,
na maluba afutukakale mikabo ya shinyanca ya kuhoka,
Nyambi ukaketozola myahi na zimpoko
kami ukaketozola na kuyumba myahi ya kuhalaba.
6Nimwabo ba kashiyiwa ku tuyoni twalyanga nyama twa ku mapili na tunzama,
pe tuyoni tu ka balya mayinza nimwawo,
na tunzama tu ka balya mupepo nimwawo.
7Ha shikati shiyo ntupu yikaletiwa kuli Nyambi wa Makunge
kufuma ku bantu babatali ba kulembuka bikonde,
na bantu ba kutinishiwa ba hahepi na bakwakutali,
litunga lya ngovu likakoma litunga lya tapululiwa na mishinzi,
ntupu yikaletiwa ku lipili lya Ziyoni,
oku bantu bakulemesha Nyambi wa Makunge.
Libuka Lya Kuyela © Bible Society of Zambia, 2020.