Ishaya 16
16
1Tumisha bana ba bambelele kwinga ntupu kuli kalela wa litunga,
kufuma ku lukena lwa Shela,
ku bapitisha na nzila ya kuketula libelelengwa,
kuya ku lipili lya mwana wa mbuyama wa Ziyoni.
2Bambuyama Bamowambi,
bali ha bibumbo bya mushinzi wa Anoni
ngonehe tuyoni tukupapazala kufuma ha lihwa lyatwo.
3Bakwamba ku bantu ba Yunda ngayi,
“Tubele, tuyate mu kupwisha.
Tenda mumvulu wobe ngonehe wushiku
ku shikati sha mutena mukati ka mutwe.
Holeka bakakutandiwa,
hinga ubeba bantapwa.”
4Yitabila ngayi bakakutandiwa mu Mowambi
bekale nanenu.
Winge shilembalemba shikabakinga ku baya
bakushinga kubalobesha.
Mukakuyandisha ukakuma ha kumana
na mukakulobesha ukaleha,
kami baya bali na kulyatangila litunga bakazimina.
5Niho litanda likahongololiwa mu shishemo sha mwaya myaka.
Umo ku bazukulya Ndavita, ukekalaho mukwoloka.
Niye ukayata mu kupwisha,
ukanyankupisha kutenda bya kulunga.
6Bantu ba ku Yunda bakwamba ngayi,
“Tunayuvwu kuliyemeza kwa Mowambi,
na kulilundumika kwendi na bya wukali wendi,
ngoboni kulitemba kwendi kwa nahiya.”
7Nohobene Bamowambi ba kutuwa mbingo,
nimwabo bakatuwa mbingo hali Mowambi.
Bakatuwa mbingo za wunginga ha mankende a nkumba za shinyanca, za ku Kili Haleshi.
8Mafuba aku Heshimboni,
hamo na mafuba a shinyanca aku Shimbima analebuku.
Batulela ba matunga banapokozolo myahi ya mikolobozi ya shinyanca,
eye ya kakumine ku Yaza ya kahalabilile namu libelelengwa,
kukakuma na mu nciza ya liwate.
9Nikupwezuma kulila hamo na ba ku Yaza,
ha mikolobozi ya shinyanca yaku Shimbima.
Enu baka Heshimboni na Eliyale nikumizabisha na mihozi.
Tunkelenkele twa ku wahilila
ha mikabo yenu ya kuhoka na kuteza kunamwene.
10Haya banafumishimo ku wahilila na kutangala mu mafuba a mikabo,
kami mu mafuba a shinyanca kuyuvwanika nyimbo mufwako,
hinge kuwulumwina na tunkelenkele twa ku wahilila,
kowa kulyatangila mikabo ya shinyanca ku shizongelo.
Namanishi kuwulumwina kwa ku wahilila nimwako.
11Nohobene nikulinyenga hali Mowambi,
ngonehe kavumanga kambuli,
na mutima wami unayene hali Kila Haleshi.
12Oho Mowambi akaliholola niyemwine ku mwanya wakulemeshela ha binkanda, ukalikwangisha niyemwine. Oho akengina muyo mu kulemeshela tunankishi, ukalipokwesha tuhu.
13Ncango ziya ambile Nyambi ya Ngula kushikale ha litunga lya Mowambi.
14Ngoboni haya, Nyambi ya Ngula ukwamba ngayi, “Mu myaka tuhu yihatu ngonehe mukashipalo akulaba matena, maleema a Mowambi kukamoneka afwako, hinge ndi bantu bendi banengi babengi, pe baya bakapuluka bakenga tuhu babashe kami bakenga ba kupopa.”
Libuka Lya Kuyela © Bible Society of Zambia, 2020.