Ishaya 13
13
Kushushuliwa kwa Mbambiloni
1 #
Isha 47:1-15; Yel 50:1—51:64. Eze nizo ncango Ishaya mwana Amozi amonene ha Mbambiloni.
2Katula ndembela ya shimonekesho ha lipili ha kubula mitondo!
Bilikiza ku bakanzita.
Behane na ku balabiza,
ngayi bengine mu mapangati a babilolo babalemu.
3Ninatumizi banzita bami ninatapululu,
ninehana balume bami ba kushuma ngayi batende bya wukali wami,
baya bawahililanga mu kukoma kwami.
4Yuvwililenu, miyoyo ha mapili!
Yikushowela ngo miyoyo ya likunge lyalinene.
Yuvwililenu mishunga mukati ka wene,
yikwinga ngonehe matunga analikungwili hamo!
Nyambi wa Makunge ukukungulula
bakanzita bendi kuya ku nzita.
5Bakufuma ku litunga lya kwakutali,
kwakumina kaye.
Banengi bilwisho bya Nyambi ya Ngula kutenda wukali wendi,
mu kulobesha hanci nimwaho.
6 #
Yowe 1:15. Shikokenu na kulila!
Mutena wa Nyambi ya Ngula uli hahepi.
Unengi mutena ou Mpandashilanga akaleta kulobesha.
7Nohobene maboko nimwawo akapopa,
pe mutima wa muntu nimwendi ukafumamo.
8Nimwabo bakalikomokela,
bakayanda na kuyuvwa kukola,
ngonehe mbuyama uli na ku shalaho.
Bakalipenza umo na wamina na bowa,
zimpala zabo zikahomba na lisheni.
9Monenu, mutena wa Nyambi ya Ngula uli na kwiza,
mutena wanguma wa wukali na kutinisha,
Nyambi ya Ngula ukafutula hanci lipembe,
na kulobesha baka wubi.
10 #
Ezek 32:7; Mat 24:29; Mako 13:24-25; Luka 21:25; Lom 6:12-13. Nyenye nimwazo na mulalanginza mu mbimbayilu bifwako kukapana wezi. Mutena ukashipa oho ukatutika na ngonda kukapana wezi ufwako.
11Nyambi ya Ngula ukwamba ngayi,
“Nikashushula kaye ndaba ya byabibi byako na bakuluwa ha wubi wabo,
nikamanisha kuliyemeza kwa bakakulilundumika,
na ku shepesha kuliyemeza kwa bakanguma.
12Nikengisha bantu bakashalaho kwinga babakalu kubawana,
kupitakana kuwana ngolinde ya Ofwila.
13Nohobene nikakankisha mayilu,
kami hanci hakanyenkana kufuma ha mwanya wako,
nimwabyo ebye bikatendiwa oho, Ami Nyambi wa Makunge
nikamonesha wukali wami ha mutena wakutininsha wakupilama kwami.”
14Bantu nimwabo bali mu Mbambiloni baketukila ku matunga wabo,
bakapanzana ngonehe bahonge ba kutina shibinda,
hinge ngonehe bambelele bakubula mulishani.
15Ou nimwendi ukuwaniwa, ukashwangiwa mampulwa,
kami ou nimwendi ukukwatiwa, ukazihiwa na mukwale.
16Bana babo bakabancancola ku meho wabo,
matala wabo akapukuliwa,
bakazabo bakabakandamika kulala nabo.
17Nyambi ya Ngula ukwamba ngayi,
“Monenu, nili na kutumeza Bamendiya
aba babula kufulankana bya shiliva,
kami babula kutwala ngolinde ku mitima yabo ngayi balwishe Mbambiloniya.
18Bakaziha bandumbana na bipando byabo bya mukunzi,
kukayuvwila nceshe bambututu bafwako,
meho wabo kukapenza batwanuke na shikeketima bafwako.
19 #
Shit 19:24. Mbambiloni waya mpupo ku wene nimwawo,
wenga wamuwahe, ou baliyemezela Bakelondiya,
ngoboni Nyambi ukalilobesha, ngonehe atendele ku Shondoma na Ngomola.
20Bantu bafwako kukekalamo kami
kutwala naku bihemunwino nimwabyo.
Kowa nyambangizi ukazikamo ntanda yendi,
kami kowa balishani bakalangikamo matanga wabo.
21 #
Isha 34:14; Zefw 2:14; Kuh 18:2. Ukenga mwanya wa bamimbwe bamu libelelengwa,
namu matala wabo mukenzala na makungulu,
mukenga mwakwikalanga bayimpye,
na bampongo ba lishaka bakashambilamo.
22Ba mitambwe bakambolomokela ha tupeshi twabo,
pe bamimbwe bakabozela mu misheke yayiwahe.
Shikati sha Mbambiloni shili hahepi na matena wendi ali hahepi na kumana.”
Libuka Lya Kuyela © Bible Society of Zambia, 2020.