Ishaya 14
14
Ishalela ukaboka ku litunga lyendi
1Nyambi ya Ngula ukekala na nceshe ha bazukulya Yakobo, pe ukahata Ishalela na kubetabilisha kami kwikala mu litunga lyabo. Mapukwenda bakalifungila nabo na kwikala na baka litala lya Yakobo. 2Mikoka yamina bakayavwa bantu ba Ishalela kuboka ku litunga. Bakaheta balume na bambuyama ba mapukwenda kwinga bandungo zabo mu litunga lya Nyambi ya Ngula. Bakakoma baya babakomene na kulela baya babayandishilenga.
Kufwa kwa mwene wa Mbambiloni
3Oho Nyambi ya Ngula wamipanakale ku mwena ku makando enu, naku milimo yayinene ya wulungo mwengilenga,
4Mukahengamina mwene wa Mbambiloni mukamba ngayi,
“Kati unamana nahiti mukakuyandisha?
Kuliyemeza kwendi kunamana nahiti?
5Nyambi ya Ngula unapokolo lunyanzi lwa bakuluwa,
na muwana wa batulela benu bababi,
6Ou wakaminenga mikoka na kupilama kwa kubula kumana,
kami mu wukali wayandishile bantu shikati nimwasho.
7Ku mamanishililo kaye nimwako kakukatala na ku mwena,
pe bakwimbila na ku wahilila.”
8Mitondo ya mipaini naya shinda ya ku Lembanoni yiku wahilila na kwimbila ngayi,
“Kufuma kukutemiwa kwobe,
kowa wezanga na kututema.”
9Kalunga ka bafu kali na kuliwahishila ku kutambula,
oho ukwiza obe mwene wa Mbambiloni,
na kupindula bakakutwaminina baya bafwile mwaka kwiza mu ku kushangwisha,
hinge bengilenga bamyene ba matunga bakakatuka ha matanda wabo.
10Nimwabo bakamba kukwobe ngayi,
“Wengakale wakupopa nehe etu, haya twalifwekakale.
11Kuliyemeza kwobe kunaletiwi ku kalunga ka bafu,
hamo na mingunina ya tumbuli twobe.
Mapila niwo wulili wobe wakulala,
nkabo niyo muyemba wobe wakulifwika.”
12 #
Kuh 8:10; 9:1. “Unawu nahiti ku mbimbayilu, obe litota wa mwaana,
mwana malungashiku!
Banakuyumbili nahiti hanci,
obe wawishile matunga!
13Walyambashanine mu mutima wobe ngayi,
‘Nikakandama kuyilu,
pe nikatakamika litanda lyami hayilu ya nyenye za Nyambi.
Nikekala ha lipili olyo banyambi baliwaninanga lili kwakutali ku ncelele.
14 #
Mat 11:23; Luka 10:15. Nikakandama kuyilu kupitakana makumbi,
pe nikalikatula amimwine kwinga ngo Wakukangana.’
15Ngoboni bana kukunkwilishi mu liteke lya kukunama shikuma,
mu kalunga ka bafu.
16“Obo baka ku mona, bakakuzekula,
na kwamba hahobe ngayi,
‘Kati kaliha niye uya muntu wakankishile hanci,
na kunyenkanisha wene ndi?
17Uya wafutwile kaye kwinga libelelengwa,
na kulobesha zinkena zako ndi?
Uya wabulile kulubula batuyili bendi ngayi baye kukwabo ndi?’
18Bamyene nimwabo ba matunga banalangana,
mwene na mwene mu shizino shendi na maleema.
19Ngoboni mutuntu wobe bakawufumishamo na kuwuyumbila kwakutali na shinzimbi shobe,
ngonehe mwahi wakuyuma,
ukafwikiwa na mituntu ya bakanzita baya bazihiwile na mukwale,
baya bayumbiwilile mu liteke lili na mamanya,
ngo mutuntu wa muntu wakufwa ba kulyatangila.
20Kukafundiwa nabo mu maleema wufwako na bamyene bamina,
ndaba walobeshele litunga lyobe na kuziha bantu bobe.
Bazukulyobe, obe watendele byabibi,
hinga mwaka kami bakatoyiwa.”
21“Liwahishilenu kuziha bana bendi babalume,
ndaba ya milandu ya bankakazabo,
kutina bakakatuka kami na kukona hano hanci,
na kwinzalisha hano ha kaye na zinkena zabo.”
Nyambi ya Ngula ukalobesha Mbambiloni
22Nyambi wa Makunge ukwamba ngayi, “Nikalwisha Mbambiloni nikamanisha lizina lyendi na mashaliza na bazukulu na bazukulula. Ami, Nyambi ya Ngula ninamba. 23Nikafutula Mbambiloni kwinga wakuzika bishaka na maziba, kami nikamukomba na shikombesho sha kulobesha. Nisho anamba Nyambi wa Makunge.”
Nyambi ya Ngula ukalobesha Baashiliya
24 #
Isha 10:5-34; Nah 1:1—3:19; Zefw 2:13-15. Nyambi wa Makunge nalibeze ngayi,
“Ebye nayongolo, nibyo bikatendiwa.
Kami ebye ninafungu, bikamoneka.
25Nikalobesha Baashiliya mu litunga lyami,
nikabalyatile ha mapili wami.
Nikashobola bantu bami ku zimpongoho,
na ku miziho yili ha bifuzi byabo.
26Eshe nisho shifungo shami ninahanganiki kutenda hano ha kaye nimwaho,
elye nilyo liboko lyami ninolwele ha matunga nimwawo.”
27Nyambi wa Makunge nafungu,
yani ukutwesha kukwangisha biyongola byendi?
Nololo liboko lyendi,
yani ukutwesha kukanisha?
Nyambi ukalobesha Bafwilishitina
28 #
2Bamy 16:20; 2Bya 28:27. Ncango zezile mu mwaka uyo mwene Ahazi afwile ngayi,
29 #
Yel 47:1-7; Ezek 25:15-17; Yowe 3:4-8; Amos 1:6-8; Zefw 2:4-7; Zaka 9:5-7. “Enu bantu ba ku Fwilishitiya,
hinga mu wahilila ngayi lunyanzi namizipwishile lunamunguku,
ku mukoka wa liyoka kukafuma mpili,
kami ku lingi lya mpili kukafuma nkonkola.
30Bancepwe shikuma bakawana mabuyishilo,
kami wakubulabyo ukalala mu ku mwena.
Ngoboni nikalobesha mupishi wobe na kapande,
kami nikaziha mashaliza bobe.
31Obe, lipangati kuwela! Obe lukena lila!
Obe, Fwilishitina myongotoka na kukanka!
Bakanzita bali na kwiza,
ngonehe likumbi lya wishe likukakumuka ku ncelele, kami banaliwahishili.”
32Muntu ukakumbula nahiti bantumwana ba matunga?
Nyambi ya Ngula naziki Ziyoni,
pe bantu bendi bakuyandishiwa bakawana shiholamino mu Ziyoni.
Libuka Lya Kuyela © Bible Society of Zambia, 2020.