2 Shamwele 19
19
1Yowambu bamutongwezele ngayi, “Mwene Ndavita uli na kulila na ku shikoka hali Ambishalome.” 2Pe ku mutena uyo bene ku wahilila kwakukoma kwafutukile mu wunginga ku nimwabo bakanzita ba Ndavita, ndaba bayuvwile ngayi mwene wekalile na ku shikoka hali mwanendi. 3Balubukile mu wumwee mu lukena, ngonehe bakanzita bali na lisheni ndaba banetuku ku nzita. 4Mwene wafwikile lupala lwendi, pe walilile na kutondoma ngayi, “Mwanami tawee. Mwanami Ambishalome. Ambishalome mwanami tawee.”
5Yowambu wayile ku litala lya mwene, pe wambile kukwendi ngayi, “Lelo unayeneshe bantu bobe, bantu aba bapulwishile moyo wobe na myoyo ya bana bobe babalume na babambuyama naya mahano bobe na bakazobe bakwinginina. 6Ukuzimba aba ba ku kuhaka na kwimanina baya ba kuzimba. Eshe shinaholoko ngayi babilolo bobe na bantu bobe banengi byowa kukwobe. Ninamono ngayi wafwanina ku wahilila shinga ndi Ambishalome ushili kuyoya na lelo bene, pe shinga nimwetu twafwa. 7Haya yanga, pe ukafumishe bowa ku bantu bobe. Nikulibeza mu lizina lya Nyambi ya Ngula ngayi ndi kutenda noho wufwako, pe kowa muntu akashale nobe kukakuma zona, owe wukalu ukenga wawunene kupitakana uya wayandanga mu kuyoya kwobe nimwako.” 8Niho mwene akatukile, pe wayile na kwikala hahepi na lipangati lya lukena. Bantu bendi bayuvwileko ngayi uli kuyo, pe bantu nimwabo bayilenga kuyo na kumumona.
Ndavita ukuboka ku Yelushalema
Shikati shiya bene Baishalela nimwabo batinine, muntu na muntu wayile ku munzi wendi. 9Batatikile kututuka nkani mukati kabo mu litunga nimwamo ngayi, “Mwene Ndavita watupulwishile ku bamalamo betu. Watulamwinine ku Bafwilishitina, ngoboni haya unatini kuli Ambishalome na ku shiya litunga. 10Twawabishile Ambishalome kwinga mwene yetu, ngoboni unazihiwi mu nzita. Nohobene shumangani kati kunabulu muntu wa kwezeka kukaleta Mwene Ndavita?”
11Byambo bambilenga Baishalela bya kumine kuli Mwene Ndavita. Niho atumine bakankombela ba Zandoki na Ambiyatale mu kwipula bakakutwaminina ba Bayunda ngayi, “Shumangani eshe mukwingila bantu ba kukumininako ha kuyavwa kuleta mwene ku musheke wendi? 12Enu mwenga bawushinda wami, tunengi lutu lumo na mukeza umo. Haya shumangani eshe mukwingila ba kukumininako kuya mu kundeta?” 13Kami Ndavita wabatongwezele kwamba kuli Amasha ngayi, “Obe unengi kawushinda wami. Kufuma hano kuya kumbili niku kuyaka mu mwanya wa Yowambu kwinga mukulwane wa bakanzita. Mwanga Nyambi ankame nifwe ndi kutenda noho nifwako.” 14Mazu a Ndavita akokele mitima ya bantu bamu Yunda, pe niho bamutuminine lizu lya kuboka na babilolo bendi nimwabo.
15Ha kuboka kwendi, mwene bamushimbawilile bantu ba ku Yunda ku mishinzi wa Yondana, aba bafumine ku Ngilingale kwiza na kumuzabwishila mu nciza ya mishinzi. 16#2Sha 16:5-13. Ku shikati shiyo bene Shimeyi wa Kambenjamani mwana Ngela wafumine ku Mbahulima wanyankupilile na balume ba ku Yunda mu kushimbawila Mwene Ndavita ku Yondana. 17Wekalile na bantu 1,000 ba ku mushobo wa Mbenjamani. Pe Ziba, mukamulimo wa ba lupashi lwa Shaulu, kami wezile na bana bendi babalume likumi na mutanu na makumi abili a bakamilimo, pe ba kuminengaho ku Yondana oho mwene shilolokale akume. 18Bazabukile mishinzi mu kuzabwisha muhoko wa mwene mu nciza na kutenda nimwabyo ebye ashingilenga mwene.
Ndavita ukuyuvwila nceshe Shimeyi
Aha mwene engile ngayi azabuke Yondana, Shimeyi mwana Ngela wafunkamine hanci kumbili yendi. 19Niho ambile ngayi, “Hekulyami, vulama wubi uya natendele uya mutena wafuminenga mu Yelushalema. Hinga unkwatila nkoko, hinge kuwu hanganika kami. 20Nikulimuka noho hekulu, ngayi nabipishile, pe eshe nisho shuma ninengili wa muntanzi wakwiza naku kushimbawila obe mwene ya ngoma ku mishobo yaku ncelele.”
21Ambishayi mwana Zeluya wambile ngayi, “Shimeyi unafwanini kuzihiwa ndaba wakutile owe Nyambi ya Ngula awabishile kwinga mwene.”
22Ngoboni Ndavita wambile kuli Ambishayi mwana Zeluya na mukonzo wendi Yowambu ngayi, “Kati yani wakunyepele ngayi utupane bihanganiko byobe? Kati ukushinga kundetela kavulanganyi ndi. Nka ami nengakale mwene wa Ishalela? Pe kowa Kaishalela ukazihiwa lelo.” 23Pe wambile kuli Shimeyi ngayi, “Nikwamba naku kukulupisha ngayi kuzihiwa wufwako.”
Ndavita ukuyuvwila nceshe Mefwimbosheti
24 #
2Sha 9:1-13; 16:1-4. Niho Mefwimbosheti muzukulya Shaulu, ezile na kushimbawila mwene. Kaliha wayowelele ku mawulu wendi, hinge kupambula mulevu wendi, hinge kuyowesha bivwalo byendi ku shikati shiya mwene afumine mu Yelushalema hantu oho abokele mu kukoma kwendi. 25Oho Mefwimbosheti afumine ku Yelushalema kwiza mu kushimbawila mwene, mwene wambile kukwendi ngayi, “Obe Mefwimbosheti, kati shumangani wabulilile kuya hamo na nami?”
26Wakumbwile ngayi, “Ngonehe eshi mu kulimuka hekulu ngayi, kutwesha kwenda shiwahe nifwako. Natongwezele mukamulimo wami kungwahishila mbongolo wami ngayi nitweshe kukandamaho na kuya nobe, ngoboni wambebele. 27Wambashaminine kuli obe mwene ya ngoma, ngoboni obe uli na ngovu nehe lingeloyi lya Nyambi, pe utende nimwasho eshe shiku moneka kukwobe ngayi shinawaha. 28Nimwabo ba ku lupashi lwa tate sha bafwaninine ku zihiwa kuli obe hekulu, ngoboni ami wampanine ngovu za ku lyanga hamo ku tebulu yobe. Pe haya ngovu za kulambilila nceshe kukwobe obe mwene ya ngoma nifwazo.”
29Pe mwene wakumbwile ngayi “Shumangani ukulipokweshela kwonzela kwamba ha byuma byobe? Nahanganiki nami ngayi obe na Ziba mukalitapila likona lya Shaulu.”
30Mefwimbosheti wakumbwile mwene ngayi, “Yitabilisha Ziba ashimbe nimwabyo. Shinengi tuhu shashiwahe kukwami aha hekulu analubuku ku munzi shiwahewahe.”
Ndavita ukuholola nceshe kuli Mbazilayi
31 #
2Sha 17:27-29. Mbazilayi waku Ngiliyande, kami wafumine ku Longeli kwiza mu kuzabwishila mwene mu nciza ya Yondana. 32Mbazilayi wengile kakulukazi wa mulume, wa myaka 80. Wengile mukakuheta pe wapaninenga mwene byakulya oho ekalilenga ku Mahanayima. 33Mwene wambile kuli Mbazilayi ngayi, “Tuye nimwetu ku Yelushalema, pe nika kulama.”
34Ngoboni Mbazilayi wakumbwile mwene ngayi, “Kuyoya shikati shashitali nifwako, pe shumangani eshe niyile na hekulu ku Yelushalema? 35Nengakale kakulukazi wa myaka 80, kami kutwesha kukeyuka mu myelembo hinifwako. Kutwesha kuyuvwa wutobe wa byakulya na kunwa nifwako, pe kami kuyuvwa mazu a bakakwimbila nifwako. Nikenga tuhu muziho kuli mwene ya Ngoma. 36Kushinga ncuungu yayinene noho nifwako, pe haya nika ku shindikiza shashishe ku zabuka Yondana. 37Niho unyitabile niboke ku munzi pe nikafwile kwakwipi na binzimbi bya bahemi bami. Mwanami owe wa mulume Kimihami, mukutwesha kuya nendi akatendelenga hekulu, pe mukamutendele nimwabyo mu ku mona ngayi binawaha.”
38Mwene wakumbwile ngayi, “Kimihami ukaya na nami, nikatenda kukwendi nimwabyo ebye ukushinga. Pe nika kutendela shuma nimwasho ukushinga.” 39Niho Ndavita na bantu nimwabo bazabukile Yondana. Mwene wazupizile Mbazilayi na kumufuywela, pe Mbazilayi wabokele ku munzi.
Ntongawushi za Baishalela
40Oho mwene wazabukakale, bamushindikizile bantu nimwabo bamu Yunda na shitika sha bantu ba Ishalela. Wayile ku Ngilingale, pe Kimihami wayile nendi hamo. 41Niho Baishalela nimwabo bayile kuli mwene pe bambile kukwendi ngayi, “Obe mwene ya ngoma, kati shumangani bawushinda wetu Bayunda ba kubembulula na ku kushindikiza, hamo na ba lupashi lwobe na bantu ba Ndavita naku zabwisha Yondana?”
42Pe balume ba Yunda bakumbwile balume ba Ishalela ngayi, “Twatenda noho ndaba mwene wenga kawushinda wetu. Pe shumangani shikumipilamisha? Etu kulya bya mwene tufwako, hinge kutupana shuma shimo wufwako.”
43Balume ba Ishalela bakumbwile balume ba Yunda ngayi, “Tuli na bitapilo likumi hali mwene pe hali Ndavita wenga kawushinda wetu kumipitakana, hinge ndi nengi kawushinda wenu. Kati shumangani mu kutushilawizila! Hinga muvulama ngayi etu twenga bantanzi hakwamba bya kubwesha mwene.”
Ngoboni mazu a balume ba Yunda engile amakali shikuma kupitakana mazu a balume ba Ishalela.
Libuka Lya Kuyela © Bible Society of Zambia, 2020.