2 Shamwele 20
20
Kufutulukila kwa Shemba
1 #
1Bamy 12:16; 2Bya 10:16. Kuyo ku Ngilingale kwekalile muntu wa shihulahuli watumbiwile ngayi Shemba mwana Mbikili wa mulume waku mushobo wa Mbenjamani. Washibile mpandula na kubilika ngayi, “Enu Baishalela. Shitapilo tufwasho muli Ndavita. Kami likona tufwalyo muli mwana Njeshe wa mulume. Hinga tu mu konka, tuyenunga ku minzi yetu.” 2Niho Baishalela bakanine Ndavita pe bayile na Shemba mwana Mbikili, ngoboni bayunda bengile bakulunga. Bakonkele Ndavita kumufumisha ku Yondana na kumukumisha ku Yelushalema.
3 #
2Sha 16:22. Oho mwene Ndavita akumine ku musheke wendi mu Yelushalema, washimbile ba mahano bakwinginina likumi, aba ashiyile ngayi balamenga musheke, wabatuntwililile ku litala lyashenge. Wabapaninenga ebye bashingilenga ngoboni kaliha walalilenga nabo. Babalaminenga shikati nimwasho mu kuyoya kwabo nimwako, bekalilenga ngonehe bamfwile.
4Niho mwene Ndavita ambile kuli Amasha ngayi, “Ukabalobele Bayunda homa hamo pe ukeze nabo zuzi kuno.” 5Amasha wayile mu kubehana bantu ba Yunda, ngoboni kaliha wabokele ha shikati osho amutongwezele kuboka nasho mwene. 6Niho Ndavita ambile kuli Ambishayi ngayi, “Shemba mwana Mbikili wa mulume ukatuletela wukalu wawunene shikuma kupitakana Ambishalome. Shimba bantu bami pe umukonke, ndelewa ukutambula minzi ya bipata na kupanza kukwetu.” 7Pe Ambishayi wayile na Yowambu na bantu bendi na Bakeleta na Bapelete bakakulama mwene Ndavita hamo na bakanzita nimwabo bashiyile Yelushalema na kukonka Shemba mwana Mbikili. 8Oho bakumine ku limanya lyalinene ku Ngimbiyoni, Amasha walihanganine nabo. Yowambu wavwalile bya nzita, mukwale wekalile mu shipushu shawo hinga shamangiwila ku mukunzi wendi. Aha ezilenga kumbili, mukwale wakunkulukile ku nceto ya mukunzi. 9Yowambu wambile kuli Amasha ngayi, “Uli nahiti mbayi?” Pe wakwatile ku mulevu wendi na liboko lyendi lya shilyo ngayi amuzupeze. 10Amasha kaliha wamonene mukwale akwatile Yowambu mu liboko lyendi lyamina, pe Yowambu wamuyahilile mu livumo, pe mila yendi ya shekukilile hanci shekwa. Wafwile shawanguwangu, pe Yowambu kaliha watweshele ku mu yaha kawubili.
Niho Yowambu na mukonzo wendi Ambishayi bayile na kukonka Shemba mwana Mbikili. 11Umo ha bantu ba Yowambu wemanine kwakwipi na mutuntu wa Amasha, pe wabilikizile ngayi, “Ou nengi wa Yowambu na Ndavita, akonke Yowambu.” 12Mutuntu wa Amasha walilombele mu mukeza, hinga walala mukati ka nzila. Muntu wa Yowambu oho amonene ngayi bantu nimwabo banemana, niho afumishile mutuntu mu nzila, pe wawuyumbilile mu mfuba na kuwu fwika muyemba. 13Oho mutuntu bawufumishakale mu nzila, bantu nimwabo bakonkele Yowambu kuya na kushinga Shemba mwana Mbikili.
14Shemba wapitile mu litunga lya mishobo nimwayo ya Ishalela, pe wezile ku munzi wa Abele Mbeti Maaka na ba lupashi lwa Bambeli nimwabo bakungulukile na ku mu konka mu munzi. 15Niho bantu ba Yowambu bayuvwile ngayi Abele Mbeti Maaka uli kuyo, pe bayile mu ku zinguluka munzi. Bashiminine mushimino wa limvu ha munkanda wa kembi, pe kami batatikile kukaba mu nceto ya kembi ngayi mwanga kawile hanci. 16Kwekalile mbuyama umo waku keya mu munzi owe wabilikizile ha kembi ngayi, “Yuvwililenu! Yuvwililenu! Tongwezenu Yowambu eze kuno. Nikushinga kwamba nendi.” 17Yowambu wezile, pe mbuyama wamwipwile ngayi, “Kati obe Yowambu ndi?”
Wakumbwile ngayi, “Ee, amibene.”
Mbuyama wambile ngayi, “Yuvwilila kukwami, hekulu.”
Wakumbwile ngayi, “Nili na kuyuvwilila.”
18Mbuyama wambile ngayi, “Kushikale bambilenga ngayi, ‘Ndi uli na shambo naminobe, yanga bakakubele mu munzi wa Abele.’ Pe osho nisho baketwililengamo byambo byabo. 19Munzi wetu wunengi wawunene, umo ha minzi ya ku mwena na kwoloka mu Ishalela. Kati shumangani eshe mukwezeka ku wu lobesha, ou unengi ngonehe mawa mu Ishalela? Kati mukushinga kulobesha ebye byenga bya Nyambi ya Ngula ndi?”
20Yowambu wakumbwile ngayi, “Byo. Hinga mwaka nikatanga kulobesha hinge kunongesha munzi wenu. 21Osho kwinga ngayi nisho tunahanganiki byo. Tunakatukili mulume ukutumbiwa ngayi Shemba mwana Mbikili, owe wafumine ku litunga lya binkanda ku Efulemu, watatikile kufutukilamo Mwene Ndavita. Mpanenu owe mulume, pe nikashiya munzi.”
Mbuyama wambile kuli Yowambu ngayi, “Tukapuhila mutwe wendi kukwenu hayilu ya kembi.” 22Niho ayile ku bantu bamu munzi na bihanganiko byendi, pe baketwile mutwe wa Shemba mwana Mbikili na kuwu puhila kuli Yowambu ha munkanda wa kembi. Yowambu washibile mpandula kwinga shilimukisho ku bantu bendi ngayi bashiye munzi na kuboka ku minzi yabo. Yowambu wabokele ku Yelushalema kuli mwene.
Babilolo ba Ndavita
23Yowambu haya niye wengile mukulwane ku bakanzita ba Ishalela nimwabo. Mbenaya mwana Yehoyanda wengile mukulwane wa Bakeleta na bapelete bakakulama mwene Ndavita. 24Andonilama wengile mukulwane wa bakamulimo wa likungubule, Yehoshafwati mwana Ahilundi wengile mukulwane mukakulama bya likota. 25Sheva wengile mukakutikita wa Zandoki na Ambiyatale bengile bakankombela. 26Yila waku munzi wa Yayila wengile umo wa bakankombela ba Ndavita.
Libuka Lya Kuyela © Bible Society of Zambia, 2020.