2 Shamwele 18
18
Kukomiwa kwa Ambishalome na lufu lwendi
1Mwene Ndavita wakungwile bantu bendi nimwabo hamo na kubatapulula mu mihoko ya likulukazi na ya mwanda na kuyaka babilolo kwinga bakulwane banzita babo. 2Niho abatumine mu mihoko yihatu, hamo na Yowambu na Ambishayi mwana Zeluya mukonzo wa Yowambu na Itayi waku Ngati, muntu na muntu wengile mukulwane mu muhoko. Pe mwene wambile ku bantu bendi ngayi, “Nami, nikaya nenu.”
3Bakumbwile ngayi, “Hinga uya hamo nanetu. Kukatapuluka shifwako ku kamalamo ndi wingi wetu tukabokamo na kwituka, hinge ndi shitika sha bantu betu shikazihiwa, ngoboni obe, uli kumbili kupitakana 10,000. Shikenga shashiwahe ndi ukekala kuno mu lukena na kututumina kuyavwa.”
4Mwene wakumbwile ngayi, “Nikatenda nimwabyo ebye mu kuhanganika ngayi byabiwahe.” Niho emanine ku nkumo ya lipangati aha bantu bendi batutikilenga ha munkanda mu mihoko ya likulukazi na ya mwanda. 5Mwene wambile kuli Yowambu na Ambishayi na Itayi ngayi, “Ndaba yanami hinga mukalemeka ndumbana owe Ambishalome.” Pe nimwabo bakanzita bayuvwilengako eshe Ndavita alayilenga babilolo bendi.
6Bakanzita ba Ndavita bayile mu litunga lyowa na kulwisha Baishalela mu lishaka lya Efulemu. 7Pe bantu ba Ndavita bakomene Baishalela. Nikwo kwengile kukomiwa kwakukomokesha, ku mutena uyo kwazihiwile bantu 20,000. 8Nzita yakonkanine nimwako mu litunga lyowa, pe bantu babengi bafwile mu lishaka kupitakana aba bazihiwile mu nzita.
9Kubazumuka Ambishalome waliwanakale na bantu ba Ndavita. Ambishalome wakandamine ha limbema, pe shiya apitilenga mu nceto ya mutondo wawunene wa Oka, mutwe wa Ambishalome wakakatilile mu myahi. Limbema wapitakanine na kwituka pe Ambishalome washalile hanyenzela. 10Umo wa bantu ba Ndavita wamumonene pe washimikilile Yowambu ngayi, “Hekulu, ninamono Ambishalome hanyenzela ku mutondo wa Oka.”
11Yowambu wakumbwile ngayi, “Ndi wamumona, shumangani wabulila kumuzihila hohobene? Shinga na kupana mali likumi a muwayawaya wa shiliva hamo na mukunzi.”
12Ngoboni mulume wakumbwile Yowambu ngayi, “Shinga wampanika likulukazi lya mali a muwayawaya a shiliva, nifwako kukambika liboko hali mwana mwene. Nimwetu twayuvwilengako eshe ambilenga mwene kukwenu, obe na Ambishayi na Itayi, ‘Ndaba yanami hinga mukalemeka ndumbana owe Ambishalome.’ 13Ngoboni ndi shinga nabula kwombatala mwene na kuziha Ambishalome, shinga mwene unayuvuko ndaba mwene wenga muka kuyuvwa byuma nimwabyo, pe obe shinga ku ndamwina wufwako.”
14Yowambu wambile ngayi, “Kumanisha shikati shami sha kwamba na nobe nifwako.” Watolele milinga yihatu na kuyishwanga ha kapumpo ka Ambishalome oho ushili kuyoya, hanyenzela ku mutondo wa Oka. 15Niho bantu likumi ba bakanzita ba Yowambu babunganinine hali Ambishalome na kumuzihilila.
16Niho Yowambu ashibile mpandula yakumanisha ngunga, pe bakanzita bendi balehele kutanda Baishalela. 17Batwalile mutuntu wa Ambishalome, mu lishaka pe bawuyumbilile mu linkwina lyalinene lya kunonka na kubungikaho mushiinzi wa mamanya wawunene. Baishalela nimwabo bapanzaninine ku minzi yabo.
18Ambishalome ha shikati sha kuyoya kwendi walitendelele niyemwine shanukisho sha limanya lyalitali mu Mukulo wa Mwene, ndaba kaliha wekalile na mwana wa mulume wakushangula lizina lyendi. Nohobene walitumbilileho lizina lyendi, hinge ku lelo lino limanya bene lishili kulimukiwa ngayi Shanukisho sha Ambishalome.
Ndavita ukutongweziwa bya lufu lwa Ambishalome
19Niho Ahimayazi mwana Zandoki wa mulume ambile kuli Yowambu ngayi, “Leha nitukishile mwene lushango lwa lu wahe ngayi Nyambi ya Ngula unamupulwishi ku bamalamo bendi.”
20Yowambu wambile ngayi, “Byo nakana. Lelo kushimba lushango lwa lu wahe wufwako. Ukatenda noho mutena washenge, ngoboni lelo byo, ndaba mwana mwene unafu.” 21Niho Yowambu ambile kuli ndungo yendi waku Kushi ngayi, “Yanga pe ukatongweze mwene ebye unamono.” Kakushi wafunkamine, pe wetukile na kuya.
22Niho Ahimayazi mwana Zandoki wa mulume wabokeleleho kami kuli Yowambu ngayi, “Nimwabyo bikezamo bikezenga tuhu na nami kami unyintabilishe kutwala lushango.”
Yowambu wepwile ngayi, “Shumangani kati ukushingila kutwala lushango? Ncuungu ngani boni ukatambwilaho.”
23Kami Ahimayazi wambile ngayi, “Nimwabyo bikezamo bikezenga tuhu, nikushinga tuhu kuya.”
Yowambu wambile ngayi, “Pe yanga.” Niho Ahimayazi akunkulukile mu likululu na Mukulo wa Yondana, pe wanguwangu wapitakanine ndungo.
24Ndavita wekalilenga mu mwanya wekalile mukati ka lipangati lya kutatika lya shipana sha kembi na lipangati lya wubili lya lukena. Mukakulama wayile hayilu ya kembi na kwimana ha shihoke shaha shipana sha lipangati, wapenzele noku noku, pe wamonene mulume wetukilenga ninkayendi. 25Wabilikizile na kutongweza mwene, pe mwene wambile ngayi, “Ku mona ndi uli ninkayendi, pe uli na kuleta lushango lwa lu wahe.” Pe uya bene wakumakale na kwituka.
26Niho kami mukakulama amonene mulume wamina hetuka ninkayendi, pe wabilikizile ku mukakulama lipangati ngayi, “Penza. Kuli na kwiza kami mulume wamina na kwituka.” Mwene wakumbwile ngayi, “Owe kami uli na kuleta lushango lwa lu wahe.”
27Mukakulama wambile ngayi, “Niku mona ngayi owe mulume wakutatika nyintukilo yendi ngonehe Ahimayazi.” Mwene wambile ngayi “Unengi muntu wamuwahe, pe uli na kuleta ncango zaziwahe.”
28Ahimayazi wabilikizile kushangwisha kuli mwene, wafunkamine hanci hambili yendi, pe wambile ngayi, “Yemeza Nyambi ya Ngula, Nyambi yobe, owe unakupaniki kukoma ha bantu aba ba kufutukilile, obe mwene ya ngoma.”
29Pe mwene wepwile ngayi, “Ndumbana Ambishalome napuluku ndi?”
Ahimayazi wakumbwile ngayi, “Hekulu, oho shilolo wenu Yowambu antumine namonene ngimangima ya bantu, ngoboni kaliha natweshele kulimuka ndi nisho shengile shumangani.”
30Pe mwene wamutongwezele ngayi, “Yimana taha kwokwo,” pe wayileko na kwimanako.
31Niho ndungo waku Kushi akumine pe wambile kuli mwene ngayi, “Nili na kuleta ncango zaziwahe kuli hekulu. Lelo Nyambi ya Ngula unamipaniki kukoma ha nimwabo aba ba kufutukilile.”
32Mwene wepwile ngayi, “Pe ndumbana Ambishalome napuluku ndi?”
Ka Kushi wakumbwile ngayi, “Nikushinga ngayi eshe shinatendiwi kukwendi shikatendiwe noho ku nimwabo bamalamo ba bahekulu naku nimwabo ba kufutulukililemo.”
Ndavita ukulila Ambishalome
33Mwene wekalile na wunginga shikuma. Wayile ku kampenci hayilu ya lipangati na ku lililaho. Aha ayilenga, halila ngayi, “Mwanami tawee! Mwanami Ambishalome! Ambishalome mwanami! Shafwanina tuhu shinga ndi ami nafu mu mwanya wobe. Mwanami tawee! Ambishalome, mwanami!”
Libuka Lya Kuyela © Bible Society of Zambia, 2020.