aGalata 5
5
Oneethi mwa Kristu
1Kristu oonitaphula hiyo weera nikhale vekhaikhai maneethi. Tivawo, mpwaherere oolipeene ni muhiihiye muvolowakatho moolemelani wa okaporo. 2Mwiiwe nnene yeeyo miyo, Pawulo, kinooleelaakani: Nyuwo mwiinelihiwa, Kristu khamuteko wa nyuwo. 3Kinghimatho wa ootheene yaawo aniihiya yiineliwaka, weera awo annyesereriwa okwanihera malamulo ootheene. 4Nyuwo munaasa waakhuleliwa ni Muluku niwoko na malamulo, moomwalamwalihiwa ni Kristu; moothaama mmahalani. 5Hiyo ningweherera munroromeloni ninrweela wa Munepa Wootteela waakhuleliwa ni Muluku ori owehererawahu. 6Vano, mwa Kristu hata wiineliwa, hata ohiineliwa wookhala mureerelo, mene aani nroromelo nniixoonihera moosivelani. 7Nyuwo mwanneetta nnene. Taani owooceelihaleni weera muhipwaherereke ni ekhaikhai? 8Mutthweene yoowo kharwiiye wa Yoole ongwiitthanani. 9Eferementu vakhaani ennyarula etrigu yincipale. 10Miyo koosuwela mwa Apwiya weera nyuwo khamurwa muupuwela moota mukina. Yoole onookacamihani, hata akhale akhalaru mutthu, onoohaawa othorihiwa. 11Axunnaka, miyo nlelo kalaleiya wiineliwa, heeni nlelo kinttharatthariwaaka? Mooteene hiiho, wuuliha muru wa muttanda woovenxiwawo. 12Mwaha wa yaawo anookacamihani, fataari othikila elopwanaaya yootheene! 13Axunna, nyuwo mwiitthaneliwe weera mukhale maneethi. Oneetheene yoowo ohikhale nthowa na otthara otthuna wa erutthu. Ohiyanawaya, murumeelaneke mukina ni mukhwaawe moosivelani. 14Malamulo ootheene athukumanyiwe mwa nlamulo nimoha: Munsivele mukhwiinyu ntoko muneenaanyu. 15Nyuwotho mwalumana ni mwakhuurana mukina ni mukhwaawe, mwiipasoope weera muhiphwatane.
Okumi mwa Munepa Wootteela
16Tivawo kineera: Mweetteke mwa Munepa Wootteela, ni vano khamurwa mukwanihera sootthuna sa erutthu. 17Vano, erutthu entthuna yeeyo eniittana ni Munepa, ni Munepa yeeyo eniittana ni erutthu. Iyo sinnawana, moota wooweera nyuwo muhiwere opaka yeeyo muntthunaanyu. 18Nyuwotho mweettihiwaka ni Munepa Wootteela, khamuhiyono oolamuliwa ni malamulo. 19Moone, miteko sa erutthu siri soosuwanyeya: oraruwa, ohitteela, olavilavi, 20olapela miluku sikina, okhwiri, wiittana, waakhulana, ehace, isara, wiixoona, ohiiwanana, omwalamwala, 21nrima, ohapaliwa, wiipeliwa ni itthu soolikana. Miyo kingwoopererani, ntoko kaawooperenraakani khalayeene, weera yaawo ampaka itthusene seiyo kheerwa yaakhela omwene wa Muluku. 22Vaheera yoowiima ya Munepa ti osivela, ohakalala, murettele, opixa murima, waahelela akina, murima wooreera, ororomeleya, 23wiiyeviha ni wiisuumaaliha. Mwa itthusene seiyo, khaniwowo nlamulo. 24Yaale ari a Kristu Yeesu aathomeya soohaawela ni soowiinlela sa erutthu. 25Hapo ninkhala ni okumi mwa Munepa, neetteketho ni Munepa. 26Nihikhale oowiivuwiha, nitannyanaka mukina ni mukhwaawe, naari nihikhalelanaka nrima.
നിലവിൽ തിരഞ്ഞെടുത്തിരിക്കുന്നു:
aGalata 5: VMK2021
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Makhua Shirima Bible © Christelike Lektuurmaatskappy NPC, 2021.