aGalata 4
4
1Kinghima: owo onrowa waakhela itthu sa asinaangolowaawe areene mukhaaneene, khavirikanne ni epottha, orookhalaru muneene a sootheene. 2Owo onlamuliwa ni yaale animukhapelela ni anthokorora itthusawe mpaka ehuhuweene yeeyo atithawe yaathanlalaaya. 3Ntokotho hiyo naaraahu akhaaneene, naalamuleliwa ni mikhalelo sa mweelaponimu. 4Yaaphiyalaaya ehuhu eneeneene, Muluku aamuruma Mwanawe, aayariwa mwa muthiyana, munlamuloni, 5weera awoopole yaale yaari munlamuloni weera naakhele waakhuleliwa okhala anamwane a Muluku. 6Hapo muri anamwane a Muluku, Owo aaruma Munepa Wootteela wa Mwanawe wa mirimasanyu, mwa Yoowo oneera: ‘Aba, Tiithi!’ 7Hiiho nyuwo khamuhiyono epottha, mene mwaana ni, mweenre mukhalaka mwaana, Muluku ohootatuxani namwaakhela a itthusawe.
Pawulo ongweeteteela aGalata
8Muhinaaye omusuwela Muluku, mwaari ipottha sa miluku seiyo, sihikhanle miluku sa ekhaikhai. 9Vanonto, nyuwo munsuwenleene Muluku, hoye hoye fataari, musuweliweene ni Yoowo, mungwera hai nyuwo ohokoleela mikhalelo iyo, soolosowa ni sa siiyo? Muntthuna okhalatho ipotthasaya? 10Wa nyuwo mumpwattha mahuku makina, nyeeri, ihuhu sikina ni iyaakha. 11Miyo kinoova weera mitekosaka variyariwanyu nsikhale sa siiyo. 12Kinoodyoonttelelani axunna, mwiikhalihe ntoko miyo, niwoko miyo kohiikhaliha ntoko nyuwo. Kheewowo etthu mukiveihalaanyuno. 13Ntoko musuwenlaanyu, waari mwaha wa ovoreiwa miyo koolaleenraakani masu ooreeraxa emaara yoopacera. 14Waarookhalaru weera erettaaka mwaaheerereliwa nyuwo, nyuwo khamwaakithannye, hata khaamwaakikhoontte. Ohiyanawaya, mwaakaakhela ntoko miyo kaari ndyelo a Muluku, ntoko Kristu Yeesu muneenaawe. 15Yaakhumelenle eheeni ni ohakalalawanyu? Koosuwela vekhaikhai weera waawereya, nyuwo saano muzoonleene maithwaanyu weera mukivahe. 16Koothatuwa mwiittanaanyu niwoko kooleenlaakani ekhaikhai? 17Yaawo aniilipiheraxa weera yoosiveliheni khaampaka nnene. Antthuna woomwalamwalihani ni miyo, weera nyuwotho mwaatthuneke yaawo. 18Ti wooreera okhala ni nthiti mwaha wa yooreera mahuku ootheene, khoohiyono paahi miyo kaakhalaka vaavaawo. 19Anamwanaaka, miyo kinnahaawatho ovoreiya wa oyara niwoko na nyuwo mpaka Kristu aneeraawe apakeye mwa nyuwo. 20Kaatthuna okhala ni nyuwo vaanaano vaava ni oceendya muulumelowaaka, niwoko kinnatikhina mwaha wa nyuwo.
Sara ni Hagari
21Mukileele: nyuwo muntthuna wiiwelela malamulo, apaale khamuniiwa malamulo? 22Vano yoolempwa weera Abrahaamu aakhalano anamwane eeli, mmoha a epottha ni mukina a neethi. 23Mwaana a epottha aayariwe munkhaleloni wa erutthu, mene mwaana a neethi aayariwe niwoko na yoororomelihiwa. 24Eyo ti niphwanaphwaniho ntokotoko. Asithiyana eeli awo anthoonyihera wiiraana miili: wiiraana omoha waapacenre vamwaako Sinayi, ni onaayara anamwane a okaporo. Wu ti Hagari. 25Hagari ori mwaako ole Sinayi wArabiya ni onthoonyihera esidade ya Yerusaleemu ya vaanaano, eri mpotthani ni anamwanaaya. 26Vano, Yerusaleemu ya osulu ti neethi, ni eyo ti amayihu. 27Vano yoolempwa: “Muhakalale nyuwo oohiyara, nyuwo muhimukhalanne mwaana; mukhuwele ni ohakalala, nyuwo muhikhalanne ovoreiya wa oyara, niwoko muthiyana oohiiwa anaakhalane anamwane ancipale, ompwaha muthiyana ootheliwa.” 28Nyuwo, axunna, muri anamwane a yoororomelihiwa ntoko Isaaki. 29Ehuhuweene yeele mwaana aayariwe munkhaleloni wa erutthu aamulupattha mwaana aayariwe ni ikuru sa Munepa. Hiihotho olelo. 30Yoolempwa* enghima eheeni? “Moomole epottha ni mwanaya niwoko mwaana a epottha kharwa aakhela vamoha ni mwaana a neethi.” 31Tivawo axunna, khanihiyono anamwane a epottha, mene aani, a neethi.
നിലവിൽ തിരഞ്ഞെടുത്തിരിക്കുന്നു:
aGalata 4: VMK2021
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Makhua Shirima Bible © Christelike Lektuurmaatskappy NPC, 2021.