Kutyoka 33
33
Ŵaisilaeli akutyoka ku chitumbi cha Sinai
1AMBUJE ŵansalile che Musa, “Ntyoche apano mwe ni ŵele ŵandu umwakopwesye ku chilambo cha Misili, njaulangane ku chilambo chinalaanjile che Ibulahimu ni che Isaka ni che Yakubu kuti chinaape iŵelesi yao. 2Chinjinlajisya katumetume jwangu annongosye, none chinjatopola Ŵakanaani ni Ŵaamoli ni Ŵahiti ni Ŵapelisi ni Ŵahivi ni Ŵayebusi. 3Njaulangane ku chilambo chambone chachikufai kwa kulanga ni kulima. Nambo une ngangulongana ni ŵanyamwe pakuŵa nli ŵakukakatima mitima, ngakaŵa chinanjonanje mwitala.”
4Ŵandu paŵapilikene ngani jangalumbana jo, ŵatandite kulila malilo ni nganapagwa namose mundu jumo juŵawete indu yakulikwatula. 5Ŵatesile yeleyo pakuŵa AMBUJE ŵaalajisye che Musa kwasalila Ŵaisilaeli, “Ŵanyamwe nli ŵandu ŵakukakatima mitima, ngalongene ni ŵanyamwe kwa katema kakajipi ngammuleje. Sambano mmule yakulikwatula yenu noneji chinachimanyilile chakuntenda.” 6Nipele Ŵaisilaeli ŵausile yakulikwatulila yao paŵatyosile ku chitumbi cha Sinai, ni kutandilila pelepo nganajendelechela kuwala sooni.
Lisakasa lya kusimanilana ni AMBUJE
7Ŵaisilaeli paŵaŵikaga chigono, che Musa ŵaliŵikaga lisakasa chapaasa chiŵandi ni pa chigono ni ŵaliŵilasile Lisakasa Lyakusimanilana ni Akunnungu. Mundu jwalijose juŵasakaga ushauli wa AMBUJE ŵajaulaga kulili Lisakasa Lyakusimanilana paasa pa chigono. 8Katema kose che Musa paŵajaulaga ku Lisakasa lyo, ŵandu wose ŵaliji nkwima kila mundu pa nnango wa lisakasa lyakwe, akuno ali nkwalola che Musa mpaka ajinjile mu Lisakasa Lyakusimanilana ni Akunnugu. 9Katema kose che Musa paŵajinjilaga mu Lisakasa lyo, luchanamila lwa liunde lwatulukaga ni kwima pa nnango wa Lisakasa, nombe AMBUJE ŵaliji nkukunguluka ni che Musa. 10Katema kose ŵandu paŵaluweni luchanamila lwa liunde luli lujimi pa nnango wa Lisakasa Lyakusimanilana ni Akunnungu, kila mundu ŵajimi ni kupopelela ali pannango wa lisakasa lyakwe. 11AMBUJE ŵakungulukaga ni che Musa achiloleganaga nti mundu yakuti kukunguluka ni mmbusangagwe. Nipele che Musa ŵaujilaga ku chigono, nambo che Yoshua mwanagwe che Nuni nchanda juŵakamusyaga che Musa nganatyokaga mu Lisakasa Lyakusimanilana ni Akunnungu.
AMBUJE akulanga kuŵa pamo ni ŵandu ŵakwe
12Che Musa ŵaasalile AMBUJE, “Alakwe, nkuusalilaga nalongosye ŵandu ŵa nambo nganimumanyisya juchaŵe nkamusi jwangu. Ntite nkuumanyilila une, sooni ngundikwe paujo penu. 13Sambano naga ngundikwe paujo penu, muunyiganye litala lyenu kuti nammanyilile, none mbunde kukundikwa paujo penu. Nkumbuchile kuti Ŵaisilaeli ali ŵandu ŵenu.”
14AMBUJE ŵajanjile, “Une nansyene chinyaule ni mmwe ni chinjimpa chitendewele.” 15Nipele che Musa ŵajanjile, “Naga mmwe ngankwaula pamo nowe, nkatutyosya patuli pa. 16Mundu chaimanyilile chinauli kuti une pamo ni ŵandu ŵenu tukundikwe paujo penu akuno mmwe ngankwaula ni uweji? Mwalonganaga ni uwe chiitutende tuloleche ŵakulekangana ni ŵane wose ŵaali pa chilambo.”
17AMBUJE ŵanjanjile che Musa, “Pakuŵa nonyelwe nomwe, sooni ngummanyilila chenene, chindende insasile.” 18Nipele che Musa ŵaaŵendile, “Choonde munosye ukulu wenu.” 19AMBUJE ŵaajanjile, “Chinannosye umbone wangu ni chindangasye liina lyangu paujo penu kuti une ndili AMBUJE. Chinjinnechelela mundu jungusaka kunnechelela ni tinjinkolela chanasa mundu jungunsaka kumpililila. 20Nambo ngankombola kujiwona ngope jangu pakuŵa ngapagwa mundu jwalijose juchajiwone ngope jangu ni kulama.” 21AMBUJE ŵatite, apano pana liuto chiŵandi ni une pati nkukombola kwima pa lwala. 22Ukulu wangu pachiupite, chinammiche mu mbugu pa lwala ni kummunichila kwa nkono wangu mpaka patimbite. 23Nipele tinjityosya nkono wangu, ni mmwe chimuumone kungongo, nambo nganjiwona ngope jangu.
നിലവിൽ തിരഞ്ഞെടുത്തിരിക്കുന്നു:
Kutyoka 33: YBV
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Yao New Testament © The Word for the World Southern Africa and Pioneer Bible Translators, 2018.
