Kutyoka 34
34
Ibao yaaŵili yamaganga
(Kutyoka 10:1-5)
1Nipele AMBUJE ŵaasalile che Musa, “Nsepe ibao iŵili ya maganga iŵe mpela yandanda ila, none chinembe agala maloŵe gagaliji mu ibao yandanda imwaitemenye ila. 2Nomweji nliŵiche chile malaŵi kundaŵi, njise kukusimana ni une pachanya chitumbi cha Sinai. 3Ngasinnyika ni mundu jwine jwali jose namose ngasyaoneka mundu papalipose pachitumbi cho, namose ngondolo pane ng'ombe ngasiilisikwa pa chiŵandi ni chitumbi cho.” 4Nipele che Musa ŵasepile ibao iŵili ya maganga mpela yandanda ila. Kundaŵipe ŵakwesile pachanya chitumbi cha Sinai mpela iŵatite kulajiswa ni AMBUJE, ŵajigele ibao iŵili ya maganga ila mmakono gakwe. 5AMBUJE ŵatulwiche mmaunde ni kwima pamo ni che Musa, ŵalimanyukwisye liina lyakwe, AMBUJE. 6Nipele AMBUJE ŵapitile paujo pa che Musa, ŵajendelechele kumanyukusya, “Une AMBUJE, une AMBUJE, Akunnungu jwa chanasa, nganingola ching'ang'a kwa chitema, ng'umbele unonyelo ni kukulupilichika. 7Une ngwanonyela ŵandu ŵajinji ŵangaŵalanjika ngwalechelechesya ugongomalo, maleŵa ni sambi. Nambo nganguleka kwajamuka ŵandu ŵangalumbana. Ngwajamuka ŵanache ni isukulu kwaligongo lya sambi sya achatati ni achachekulu ŵao, mpaka uŵelesi wa tatu ni wancheche.”
8Papopo Che Musa ŵakoteme mpaka paasi kwapopelela AMBUJE. 9Nipele ŵatite, “Alakwe AMBUJE ŵangu, pakuŵa mbatile upile paujo penu, choonde nlongane pamo ni uwe namuno ŵandu ŵa ali ŵamakani, nambo ntulechelechesye igongomalo yetu ni sambi syetu, ntupochele tuŵe ŵandu ŵenu.”
Lilangano likutendekwa sooni.
(Kutyoka 23:14-19; Chikumbuchisyo cha Malajisyo 7:1-5; 16:1-17)
10AMBUJE ŵansalile che Musa, “Sambano chindende lilangano ni ŵandu ŵenu, chindende indu yakusimonjeka paujo pao yanganiipanganyikwe ku ŵandu ŵa pachilambo pose namose chilambo chilichose. Ni ŵandu wose ŵankutama pasikati jao chachiiona yaitite ya kusimonjeka ichinantendelanje une AMBUJE ŵenu. 11Nkamulichisye makanyo gingumpanga lelo. Ngwaŵinga mbujo mwenu Ŵaamoli, Ŵakanaani, Ŵahiti, Ŵapelisi, Ŵahivi ni Ŵayebusi. 12Ngasinjaula kukamulana ni ŵandu ŵa chilambo chila, pakuŵa yeleyo chichiŵe chitanje pasikati jenu. 13Pamalo pakwe chingumule ilisa yao, ni kuitemangula sichi yao ya kupopelela ni inyago yao ya Ashela.”
14“Ngasimpopelela nnungu jwine, pakuŵa AMBUJE ŵakumanyika kwa liina lya jwaali ni wiu, ali Akunnungu jwakwete wiu. 15Ngasinjaula kukamulana ni ŵandu ŵa chilambo chila, ligongo pachachijipopelela minungu ja unami ni kujitajila mbopesi, chachinnalika ni ŵanyamwe chinchinyenjekwa kulya nawo yakulya yaaitajile mbopesi minnungu jao. 16Achachanda ŵenu pankwalombekasya achiŵali ŵaakupopela minnungu, achachanda ŵenu chanyenjekwe kuti nombe ŵanyawo ajipopelele minungu jao.”
17“Ngasinsepa inyago yakusyana ni kuitenda minungu.”
18“Chintende chindimba cha mikate jangataga amila, kwa moŵa saba pa mwesi wa Abibu chindye mikate jangataga amila mpela inatite kunsalila, ligongo pa wele mwesi wa Abibu ni pamwatyosile ku Misili.”
19“Kila mwanache jwa kwitiwo jwa chilume chaŵe jwangu, pamo ni mmeleko wa ndanda wa tonde sya ilango yenu chinga ng'ombe pane Ngondolo, pane mbusi. 20Chinjiwombole mbunda jenu jaandanda kupagwa kwa kundolela sadaka ja ngondolo, naga ngankujiwombola chinchijiulaje kwa kujitemangula lukosi. Ŵaanache ŵenu ŵa chilume ŵaali ŵa kwitiwo wose chinchawombola.”
“Mundu jwalijose akanyichilila pangali sadaka.”
21“Moŵa sita chimpanganye masengo, nambo pa lyuŵa lya saba chimpumulile, atamuno kaŵe katema kakuchochola pane kakugungula.”
22“Chintende chindimba cha magungulo natanda pe katema ka magungulo ga ngano, ni chintende chindimba cha masakasa kumbesi kwa kulima katema ka kukumbikanya magungulo genu ni isogosi yenu.”
23“Achalume ŵenu wose chaiche paujo pa AMBUJE Akunnungu ŵa ku Isilael katatu pa chaka. 24Chinaatopole ŵandu ŵa ilambo ine mmbujo mwenu ni kujikusya mipika ja chilambo chenu. Ngapagwa mundu jwalijose juchalinje kumputa kuti achijigale chilambo chenu katema kachinsongangane katatu pa chaka kuumbopelela une AMBUJE Akunnungu ŵenu.”
25“Nkambelechela une miasi ja mbopesi jangu pamo ni mikate jajitajikwe amila, namose ngansisigasya mbopesi ja lyuŵa lyachindimba cha Pasaka mpaka kundaŵi.”
26“Chinyichenayo milimbu kutyochela mungunda wenu, ku Nyuumba ja AMBUJE.”
“Ngasinteleka ngondolo pane kambusi kwa maŵele ga nangolo jwakwe.”
27AMBUJE ŵaasalile che Musa, “Nlembe maloŵe ga, pakuwa malinga ni maloŵe ga une ndesile lilangano nomwe pamo ni Ŵaisilaeli.” 28Che Musa ŵatemi kwitumbi kula pamo ni AMBUJE moŵa alobaini, muusi ni chilo, nganalya chakulya namose kung'wa meesi. Nombejo ŵagalembile mu ibao maloŵe ga lilangano, yaani agala makanyo likumi.
Che Musa akutuluka ku chitumbi cha Sinai
29Che Musa katema kaŵatulwiche kwitumbi ali ajigele mmakono ibao iŵili yailembekwe makanya likumi, nganaimanyilila kuti kumeso kwao kukunyesima ligongo lya kuŵecheta ni AMBUJE. 30Che Haluni ni Ŵaisilaeli wose piŵannolite che Musa, ŵakuweni kumeso kwao kukunyesima, ŵanyawo ŵaajogwepe kwaŵandichila. 31Nambo che Musa ŵaŵilasile che Haluni ni ilongola wose ŵa Ŵaisilaeli nombewo ŵajaulile, nipele ŵakungulwiche nao. 32Kanyuma Ŵaislaeli wose ŵaaŵandichile che Musa, nombejo ŵapelenje makanyo gose gaŵapegwilwe ni AMBUJE Akunnungu ku chitumbi cha Sinai kula. 33Che Musa paŵamasile kuŵecheta ni ŵandu ŵala, ŵaliunichile kumeso kwakwe kwa chitambaa. 34Katema kose che Musa paŵajaulaga kukukunguluka ni AMBUJE ŵaliunukwile chitambaa chiŵaliunichilaga kumeso chila mpaka katema kachakopoche. Paŵakopokaga ŵaasalilaga Ŵaisilaeli yoosepe iŵasalilwe. 35Ŵaisilaeli ŵakuweni kumeso ku che Musa kulinkunyesima. Nipele che Musa ŵaliunichile sooni kumeso kwakwe kwa chitambaa mpaka paŵajaulaga kukukunguluka ni AMBUJE.
നിലവിൽ തിരഞ്ഞെടുത്തിരിക്കുന്നു:
Kutyoka 34: YBV
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Yao New Testament © The Word for the World Southern Africa and Pioneer Bible Translators, 2018.
