Kutyoka 26
26
Lisakasa lya AMBUJE
(Kutyoka 36:8-38)
1“Nkolosye Lisakasa Lyakusimanilana ni kwaligongo lya Akunnungu kwa nguo sya lusasa kumi kwa nguo jeswela mbee jajipotekwe uchenene kwa usi wa chibuluu, ni wa sambalau ni wechejeu. Jwakukombola kulemba akasilembe nguo sya lusasa syo kwa kutotela yepanganyikwe yaili ni mapapiko. 2Uleu wa kila nguo jalusasa waliji mita kumi na mbili ni chanchijipi mita siŵili. Nguo sya lusasa syose syaliji ni ukulu waukulandana. 3Nlumbikanye pamo nguo sya lusasa nsano chiŵe chipande chimo ni sine nsano ntendeje iyoyo. 4Nkolosye ikulusisya ya chibuluu mumbali mwa nguo jalusasa jambesi ja chipande chaandanda, ni ikulusisya ine mu nguo jalusasa jambesi ja chipande chaaŵili. 5Nkolosye ikulusisya hansini mu chipande cha nguo jalusasa jaandanda ni ikulusisya ine hansini kumbesi kwa chipande cha nguo jalusasa jaaŵili. Ikulusisya yose ilolegane. 6Nipele nkolosye ikolochelo hansini ya sahabu kuti nlumbikanye nguo sya lusasa syose sinasiŵili sya mu Lisakasa kuti jiŵe nguo jalusasa jimo.”
7“Nkolosye chakuunichila Lisakasa kwa nguo syalusasa kumi na moja kwa usi waupotekwe kwa manyunya ga mbusi. 8Kila nguo jalusasa jiŵe ni uleu wa mita kumi na tatu ni chanchijipi mita mbili. Nguo sya lusasa syose kumi na moja siŵe ni chipimo chilachila. 9Nlumbikanye nguo sya lusasa nsano pamo ni nguo sya lusasa sine sita pamo. Mpindanye kaŵili ipande sita yo paujo pa Lisakasa. 10Nkolosye ikulusisya hansini mumbali mwa chipande chaandanda ni ikulusisya ine hansini mumbali mwa chipande chaaŵili. 11Nkolosye ikolechelo hansini ya shaba ni kuiŵika mu ikulusisya hansini kuti nlumbikanye ipande yekulungwa iŵili, kwayele jiŵe nguo jalusasa jimo ja Lisakasa Lyakusimanilana ni Akunnungu. 12Achila chipande cha chiunichilo chachisigalile chinkoleche kunyuma kwa lisakasa. 13Chipande cha sentimita hansini chachipundile chinchilelembesye mumbali mwa lisakasa kuti chiunichile lisakasa.”
14“Nkolosye chakuunichila Lisakasa Lyakusimanilana ni Akunnungu kwa lipende lya tonde ja ngondolo jajitajikwe langi jechejeu, ni pachanya pakwe chiunichilo cha lipende lyakwepepala.”
15“Nkolosye felemu kwa mbao sya itela ya msonobali kwa ligongo lya Lisakasa Lyakusimanilana ni Akunnungu. 16Kila felemu chijiŵe ni uleu wa mita ncheche ni chanchijipi sentimita sitini na sita. 17Kila chibao chiŵe ni ipanyilo iŵili yakulumbikanyila, mafelemu gose gakolechekwe kwanti yeleyo. 18Nkolosye felemu ishilini ya Lisakasa kwaligongo lya upande wa kulujenda kwa Lisakasa, 19ni itamichilo alobaini ya feza kuusi kwa felemu ishilini. Itamichilo iŵili paasi pa kila felemu ni itamichilo iŵili paasi pa felemu jine kwa ipanyilo yakwe iŵili. 20Upande wa kumpoto kwa Lisakasa chinkolosye felemu ishilini, 21ni itamichilo alobaini ya feza, itamichilo iŵili kuusi kwa kila felemu. 22Kunyuma kwa lisakasa kwakuli upande wakulikutiŵila lyuŵa, nkolosye felemu sita. 23Nkolosye felemu iŵili kwaligongo lya ndumba sya Lisakasa chaupande wa kunyuma. 24Felemu iŵili sya mundumba sikamulane kuusi nambo syakamulanyikwe mu pete jaandanda. Felemu iŵili kwaligongo lya ndumba syo syakolechekwe kwanti yele. 25Kwayele chikuŵe ni felemu nane ni itamichilo yakwe kumi na sita ya feza, itamichilo iŵili kuusi kwa kila felemu.”
26“Nkolosye mitambalapanya nsano ya nsonobali, kwaligongo lya felemu ja upande umo wa Lisakasa, 27ni mitambalapanya nsano jine kwaligongo lya upande wine wa Lisakasa, ni mitambalapanya nsano kwaligongo lya felemu syasili upande wa kunyuma kulikutiŵila lyuŵa. 28Ngomba chiutandale pasikati ja Lisakasa waukukamulila felemu syose, kutyochela kuundanda mpaka kumbesi. 29Mmunichile felemu syo kwa sahabu, ni kukolosya pete sya sahabu syakamulila mitambalapanya. Mitambalapanya jo mmunichile kwa sahabu. 30Njimiche lisakasa chisau inatite pakunlosya kuchitumbi kula.”
31“Nkolosye nguo jalusasa kwa nguo jeswela mbee ni kuluchila kwa usi wa chibuluu ni sambalau ni wechejeu ni jeluchikwe uchenene ni kuitotela yepanganyikwe yaili ni mapapiko. 32Chinkoleche nguo jalusasa pa njanamila ncheche sya nsonobali yeunichile kwa sahabu ni ikolechelo ya sahabu mu itamichilo ncheche ya feza. 33Nkoleche nguo jalusasa jo pakolechela, nnyiche nalyo Lisanduku lya Lilangano, mmiche panyuma pa nguo jalusasa. Nguo jalusasa jo chililekanganye Peuto Papaswela ni Peuto Papaswela Nnope. 34Mmiche chiunichilo pachanya Lisanduku lya Lilangano lyalili Peuto Papaswela Nnope. 35Mmiche meza chapaasa pa Peuto Papaswela Nnope upande wa kumpoto kwa Lisakasa ni chakuŵichila lumuli mmiche upande wa kulujenda kwa Lisakasa.”
36“Pannango wakwinjilila mu Lisakasa Lyakusimanilana ni Akunnungu, chinkolosye nguo jalusasa kwa nguo jeswela mbee ni kuluchikwa kwa usi wa chibuluu ni wa sambalau ni wechejeu. 37Nkolosye njanamila nsano syasili ni ikolechelo ya sahabu. Nkolosye itamichilo yakwe nsano kwa shaba.”
നിലവിൽ തിരഞ്ഞെടുത്തിരിക്കുന്നു:
Kutyoka 26: YBV
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Yao New Testament © The Word for the World Southern Africa and Pioneer Bible Translators, 2018.
