Kutyoka 27
27
Chilisa chakutyochesya mbopesi syakutinisya
(Kutyoka 38:1-7)
1“Nkolosye chilisa kwa chitela cha nsonobali, uleu wakwe ni chanchijipi mwakwe mulandane, ni lisusa lyakwe mita moja ni lobo. 2Nkolosye msengo pa kila ndumba ja chilisa. Misengo jo jikamulangane ni chilisa cho, ni chilisa chose mmunichile kwa shaba. 3Nkolosye yombo yakwe, iŵiga yakutyochesya liu, sepetu ni mabakuli ga kusuluchisya miasi, ni isyano yakutyochesya nyama pamoto ni mapale. Yombo yakwe yose ikolochekwe kwa shaba. 4Nkolosye lwau lwa shaba, ni mu kila ndumba nkolosye pete jimo kwa shaba jakunyakulila chilisa. 5Nkaluŵiche paasi chamunkati pa nchenjeka kusyungulila mbande syose, kuti lwau lo lutame pasikati ja chilisa cho. 6Nkolosye itela kwa chitela cha nsonobali yakunyakulila chilisa, ni kuiunichila kwa shaba. 7Njinjisye itela yo mu pete syasili mu ndumba mwa chilisa katema kakunyakulikwa. 8Nkolosye chilisa cho kwa ibao ni kuusi kwakwe kuŵe kwangaunichila chisau ni inatite pakunnosya petumbi.”
Lutenje lwakusimanilana
(Kutyoka 38:9-20)
9“Nsyunguchisye lutenje lwa lisakasa lyakusimanilana ni Akunnungu. Nguo sya lusasa sya lutenje lo upande wa kulujenda nkolosye kwa nguo jeswela mbee ni uleu wakwe chiuŵe mita alobaini na nne, 10ni njanamila syakwe syaliji ishilini ni itamichilo yakwe yaliji ishilini, yosepe yaliji ya shaba. Itaŵililo yakwe ni ikulusisya yakwe chiiŵe ya feza. 11Kumpoto kwa lutenje lo nombe uleu wakwe chiiŵe mita alobaini na nne, njanamila syakwe chiiŵe ishilini, ni itamichilo yakwe chiiŵe ishilini, yosepe chiiŵe ya shaba, itaŵililo yakwe ni ikulusisya yakwe chiiŵe ya feza. 12Kulikutiŵila lyuŵa chikuŵe ni nguo jalusasa uleu wakwe mita ishilini na mbili, njanamila syake likumi ni itamichilo yakwe likumi. 13Kungopochelo lyuŵa kwa lutenje kwakuli ni nnango, nchijipi mwakwe chikuŵe mita ishilini na mbili. 14Nguo jalusasa ja upaande umo wa nnango uleu wakwe chiuŵe mita sita ni nusu, ni njanamila syakwe sitatu ni itamichilo yakwe itatu. 15Iyoyopeyo upaande waaŵili, akuno ni akunokuno pannango wa lutenje chikuŵe ni nguo jalusasa ja uleu wa mita sita ni nusu ni njanamila syakwe sitatu ni itamichilo yakwe itatu. 16Nnango wa kwinjilila mu lutenje chiuŵe ni nguo jalusasa jajili ni uleu wa mita tisa, jajikolochekwe kwa nguo jeswela mbee jajiluchikwe kwa usi wa langi ja chibuluu ni sambalau ni wechejeu ni kutotekwa yambone ni jwakuluka jwali ni umanyilisi. Nguo jalusasa jo chijikamulilwe ni imila ncheche yaili ni itamichilo ncheche. 17Njanamila syose kusyungula lutenje lwa Lisakasa lya Kusimanilana chilumbikanywe kwa ikulusisya ni yakolechela ya feza ni itamichilo ya shaba. 18Lutenje lo chiluŵe ni uleu wa mita alobaini na nne ni chanchijipi mita ishilini na mbili ni lisusa lya mita mbili ni lobo. Nguo sya lusasa syakwe siŵeje syepote yambone kwa nguo jeswela mbee syasili ni uleu wa mita ishilini ni itamichilo ya shaba. 19Indu ine ya mu Lisakasa Lyakusimanilana ni Akunnungu yaikutumika kwa masengo gagaligose, pamo ni igingi yose, ni aila ya mu lutenje lwa kusimanilana ikilochekwe kwa shaba.”
Mauta ga lumuli
(Ŵalawi 24:1-4)
20“Chimwalajisye Ŵaisilaeli anyichisye mauta gambone ga mseituni kwa ligongo lya lumuli kuti kuŵe ni lumuli lwalukukolela katema kose. 21Che Haloni ni achiŵanagwe chaŵe ŵakugosa imuli ya munkati mwa Lisakasa cha paasa pa Peuto Papaswela Nnope kwakuli kunyuma kwa Lisanduku lya Lilangano, ikoleleje pangasima ligulo mpaka kundaŵi paujo pangu une AMBUJE moŵa gose. Lilajisyo li lili lya moŵa gose pangali mbesi kwa iŵelesi yose ya Ŵaisilaeli.”
നിലവിൽ തിരഞ്ഞെടുത്തിരിക്കുന്നു:
Kutyoka 27: YBV
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Yao New Testament © The Word for the World Southern Africa and Pioneer Bible Translators, 2018.
