Kutyoka 25
25
Sadaka kwa ligongo lya lisakasa lyeswela
(Kutyoka 35:4-9)
1AMBUJE ŵansalile che Musa, 2“Mwasalile Ŵaisilaeli ambe sadaka, ni mmwe chimpochele pa une. Chimpochele chachilichose chichachimpa kila mundu kwa yakuti kusaka nsyene. 3Sadaka sichimpochele sili syelesi: Sahabu ni madini ga feza ni kopa, 4ni ngonji sya chibuluu ni sya sambalau ni syechejeu, ni syeswela mbee, ni ngonji syasiluchikwe ni manyunya ga mbusi, 5ni mapende ga tonde ja ngondolo gagatajikwe langi jechejeu, ni mapende gakwepepala ni mbao sya misonobali, 6ni mauta ga mseituni kwaligongo lya mimuli, ni indu yakununjila yakukolochesya mauta gakwajitilila ŵatyosyekwe kwa AMBUJE ni kwaligongo lya ubani wakununjila; 7ni maganga ga ndalama gagakuŵilanjikwa shohamu, ni maganga gane ga ndalama gagakuŵichikwa pa nguo jakuunichila pantima ni kasaku kakuwala pantima. 8Iyoyo Ŵaisilaeli ambanganyichisye lisakasa lyeswela, kuti ndameje pasikati jao. 9Nkapanganye lisakasa ni yoombo yakwe, ni kuŵika indu yose chisau ni itinanlosye une.”
Lisanduku lya Lilangano
(Kutyoka 31:1-9)
10“Ŵaisilaeli apanganye lisanduku kwa ibao ya nsonobali, lyalili ni uleu wa sentimita mia moja na kumi, ni nchijipi sentimita sitini na sita ni lisusa lyakwe sentimita sitini na sita. 11Nliunichile lisanduku lyo kwa sahabu jakusalala paasa ni munkati ni kusyunguchisya nchenjeka wa sahabu mbande syose. 12Nipele nkolosye pete ncheche sya sahabu ni kusitaŵilila mu ngongolo ncheche sya lisanduku lyo, pete siŵili upande umo ni pete siŵili upande wine. 13Chinkolosye itela iŵili yakunyakulila kwa chitela cha nsonobali ni kuunichila kwa sahabu. 14Itela yo ŵaijinjisye mu pete syasili mbande syose kuti anyakulile lisanduku lyo. 15Fito syo sitameje mmomo mu pete sya lisanduku nkasiswekula. 16Nipele mmiche mu lisanduku lya Lilangano ibao iŵili ya maganga yailembekwe malajisyo ichinampe.”
17“Nipele nkolosye chiunichilo cha Lisanduku lyo kwa sahabu jakusalala chati pane pakuŵilanjikwa peuto pa chanasa, uleu wakwe waliji sentimita mia moja na kumi ni nchijipi mwakwe sentimita sitini na sita. 18Nsyane kwa sahabu yepanganyikwe iŵili yaili ni mapapiko yaikuŵilanjikwa makelubi ni kuiŵika mbesi siŵili sya chiunichilo cho. 19Chepanganyikwe chimo mmiche kumbesi upande umo ni chine mmiche upande wine kumbesi, mpanganye ili ilumbikene ni chiunichilo cha lisanduku. 20Yepanganyikwe yo itame kwakulolegana ni mapapiko gao gatambasukwile pachanya chiunichilo cha lisanduku ni kuchiunichila ni jwalijose ŵaliji nkuchilola chiunichilo cho. 21Mmiche chiunichilo pachanya lisanduku ni mu lisanduku lyo mmiche ibao ya maganga yailembekwe ichinampe. 22Chinjisimana ni mmwe pelepo, ni kukunguluka nomwe kutyochela pelepo pa chiunichilo pasikati ja yepanganyikwe iŵili yaili pa lisanduku lya lilangano, kuchinjimpa malajisyo gangu gose kwaligongo lya Ŵaisilaeli.”
Mesa ja mikate jajiŵichikwe paujo pa Akunnungu
(Kutyoka 37:10-16)
23“Nkolosye mesa kwa chitela cha nsonobali, uleu wakwe sentimita semanini na nane, ni chanchijipi sentimita alobaini na nne, ni lisusa lyakwe sentimita sitini na sita. 24Nkajiunichile mesa jo kwa sahabu jakusalala, ni kusunguchisya nchenjeka wa sahabu. 25Nipele nkolosye chibao chachili ni ujipi milimita sabini na tano ni kusyunguchisya mesa jo nchenjeka wa sahabu. 26Nkolosye pete ncheche sya sahabu kwaligongo lya mesa ni kusitaŵilila mu ngongolo syakwe ncheche. 27Pete syo sitaŵililwe kuŵandikana ni nchenjeka kuti situmiche kujinjisya aila itela yakunyakulila mesa. 28Nkolosye itela yakunyakulila mesa jo kwa chitela cha nsonobali ni kuiunichila kwa sahabu. 29Nkolosye mbale ni chindu chakuŵichila ubani ni mitala jakunaŵila ni bakuli sya mbopesi sya chakung'wa, yoombo yose ikolochekwe kwa sahabu jakusalala. 30Nomwe chimmiche pa mesa jo mikate jajikuŵichikwa paujo pangu moŵa gose.”
Chakuŵichila lumuli
(Kutyoka 37:17-24)
31“Nkolosye kwa sahabu jakusalala chindu chakuŵichila lumuli, chitamichilo chakwe ni itela yakwe, ni ikombe yakwe ni itumba ni uluŵa wakwe yanayose nsyanile kumo.”
32Nombe chakuŵichila lumuli cho chiŵe ni nyambi sita mumbali mwakwe, nyambi sitatu akuno ni sine sitatu akuno.
33Mu nyambi syose sita pa kila lujambi chikuŵe ni ikombe itatu yaipanganyikwe chisau ni uluŵa wa mlosi, ni pa kila lujambi chitumba ni uluŵa wakwe. 34Pasikati ja chiimila cha chindu chakuŵichila lumuli cho chikuŵe ni ikombe ncheche, yaipanganyikwe chisau ni uluŵa wa mlosi, pamo ni itumba ni uluŵa wakwe.
35Papalipose papakopochele nyambi siŵili pa nyambi syose sita kuusi kwakwe chikuŵe ni chitumba chimo. 36Matumba go pamo ni nyambi syakwe syose ikamulane ni chindu chakuŵichila lumuli cho, chose chiisyanikwe kwa sahabu jakusalala. 37Nipele nkolosye imuli yakwe saba, ni ŵanyawo chakolesye imuli yo, kuti ilanguchisye mbujo mwakwe. 38Nchikolosye chindu chakupalapatila utambi pampepe ni mbale syakwe kwa sahabu jakusalala. 39Nchikolosye chindu chakuŵichila lumuli cho ni indu yakwe yosepe kwa kilo selasini na tano sya sahabu jakusalala.
40Nlolechesye kuti nkolosisye chisau imwatite kuloswa pachitumbi pala.
നിലവിൽ തിരഞ്ഞെടുത്തിരിക്കുന്നു:
Kutyoka 25: YBV
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Yao New Testament © The Word for the World Southern Africa and Pioneer Bible Translators, 2018.
