Броеви 25:1-18
Броеви 25:1-18 Свето Писмо: Стандардна Библија 2006 (66 книги) (MK2006)
Израел живееше во Ситим и народот почна преку блуд да се осквернува со ќерките на Моав; и тие го покануваа народот да присуствува на принесувањето жртви на идолите нивни, и народот ги јадеше жртвите нивни и им се поклонуваше на боговите нивни. И му се приклони Израел на Ваал-Фегор. И се разгоре гневот Господов против Израел. И му рече Господ на Мојсеј: „Земи ги сите началници народни и обеси ги пред Господ спроти сонцето, и ќе се одврати јаросниот гнев Господов од Израел.“ Тогаш Мојсеј им рече на судиите израелски: „Секој нека ги убие своите луѓе што му служат на Ваал-Фегор.“ И ете, еден од синовите на Израел дојде и доведе кај еден од своите собраќа една Мидјанка, пред очите на Мојсеј, и пред очите на целото општество на синовите израелски, кога тие плачеа при влезот од скинијата на собранието. Финес, синот на Елеазар, син на свештеникот Арон, кога го виде тоа, стана среде општеството и зеде во раката копје, и влезе по Израелецот во блудилиштето и ги прободе и обајцата: Израелецот и жената во утробата нејзина; и престана поморот на синовите израелски. А умрените од помор беа дваесет и четири илјади. И му рече Господ на Мојсеј, велејќи: „Финес, синот на Елеазар, син на свештеникот Арон, ја одврати јароста Моја од синовите израелски, покажувајќи меѓу нив ревност за Мене, и Јас не ги истребив синовите на Израел во ревноста Своја. Така кажи им: ете, Јас му давам мирен завет; и тој ќе биде за него и за потомството негово по него завет на вечно свештенство, затоа што покажа ревност за својот Бог и Го омилостиви за синовите израелски.“ Името на убиениот Израелец, кој беше убиен со Мидјанката, е Замвриј, син на Салу, началник на родот Симеоновци; а името на убиената Мидјанка е Козби; таа беше ќерка на Цур, началник на едно од племињата на Мидјаните. Пак му рече Господ на Мојсеј, велејќи: „Сметајте ги за непријатели Мидјаните и поразувајте ги, зашто тие со подмолноста своја постапуваа непријателски спрема вас, соблазнувајќи ве со Фегор и со Козби, ќерката на мидјанскиот началник, нивна сестра, убиена во денот кога имаше помор поради Фегор.“
Броеви 25:1-18 Библија: Стариот и Новиот Завет, Константинов (MKB)
Додека Израел живееше во Ситим, народот почна да блудствува со Моавските ќерки. Тие го повикуваа народот на жртвувањата на своите богови, а народот јадеше на нивните гозби и им се поклонуваше на нивните богови. Така Израел се прилепи до Фегорскиот Ваал. И Господ пламна со гнев против Израел. „Собери ги сите народни началници - му рече Господ на Мојсеја. Обеси ги пред Господа на бел ден, за да се одврати Господовиот гнев од Израел.“ Тогаш Мојсеј им рече на израелевите судии: „Нека секој ги погуби оние свои луѓе, кои се прилепија до Фегорскиот Ваал.“ Токму тогаш некој од Израелевите синови дојде и доведе една Мадијанка при своите браќа, пред очите на Мојсеја и пред очите на сето Израелско општество, кое заплака при влезот од Шаторот на средбата. Кога Финес, синот Елеазаров, синот на свештеникот Арон, го забележа тоа, стана пред заедницата: зеде копје во раката и тргна по Израелецот, во лежиштето, и ги прободе двата, Израелецот и жената; неа низ слабините, па прекрати поморот на Израелевите синови. А тие кои изумреа од поморот беа дваесет и четири илјади. Господ му рече на Мојсеја: „Финес, синот Елеазаров, синот на свештеникот Арон, ја одврати Мојата јарост од Израелевите синови, зашто покажа ревност за Мене, и Јас не ги истребив Израелевите синови во Мојата ревност. И така кажи му: ‘Еве, со него склучувам завет на мир. Тоа нека биде за него и за неговите потомци, после него, завет на вечно свештенство, зашто ревнуваше за својот Бог и ги застапи Израелевите синови.’“ Името на Израелецот кој беше убиен - на оној кој беше погубен заедно со Мадијанката - беше Зимриј, син на Салу, началник на еден татковски дом на Симеоновците. А името на убиената жена Мадијанка ѝ беше Хазвија. Беше Сурова ќерка. Сур беше родовски главатар на едно семејство во Мадијан. Господ му рече на Мојсеја: „Завојувај против Мадијанците и порази ги, зашто и тие војуваа против вас со итрина и ве измамија со Ваал-Фегор и со својата сестра Хазвија, ќерка на мадијански началник, која беше погубена во денот на поморот заради Фегор.“