Исус Навин 15:13-19
Исус Навин 15:13-19 Свето Писмо: Стандардна Библија 2006 (66 книги) (MK2006)
А на Јефунеовиот син Халев, Исус му даде еден дел меѓу Јудините синови, како што му беше заповедал Господ на Исус; а и градот Кирјат-Арба (Арба му беше татко на Анак) т.е. градот Хеврон. Халев ги истера оттаму трите синови на Анак: Шешај, Ахиман и Талмај. Оттаму тој тргна против Давирчаните; порано Давир се нарекуваше Кирјат-Сефер. И рече Халев: „Кој ќе го нападне Кирјат-Сефер и ќе го покори, ќе му ја дадам ќерката моја Ахса за жена.“ И го презеде Готониил, син на Кеназ, братот на Халев, и тој му ја даде ќерка си Ахса за жена. Кога требаше таа да замине, ја посоветуваа да побара од таткото свој земја, и таа слезе од магарето. Халев ја запраша: „Што сакаш?“ Таа одговори: „Благослови ме; бидејќи ми даде јужна земја, која е сува, дај ми и извори.“ И тој ѝ ги даде горните и долните извори.
Исус Навин 15:13-19 Библија: Стариот и Новиот Завет, Константинов (MKB)
Халев, Ефониевиот син, прими дел меѓу Јудините синови, како што Господ му нареди на Исуса. Му ја даде Киријат-Арва, главниот град на Енаковите синови - Хеврон. Халев истера оттаму три Енакови синови: Сесај, Ахиман и Талмај, Енакови потомци. Оттаму тргна против жителите на Девир, што некогаш се викаше Киријат-Сефер. Тогаш Халев рече: „Кој ќе го покори и ќе го заземе Киријат-Сефер, ќе му ја дам својата ќерка Ахса за жена.“ Го зазеде Готонил, синот на Кенеза, брат Халевов; и Халев му ја даде својата ќерка Ахса за жена. Кога дојде кај мажот, тој ја наговори да побара имот од татка си. Таа слезе од ослето, а Халев ја праша: „Што сакаш?“ Таа одговори: „Дај ми благослов! Кога ми го даде Негев, дај ми и некои водни извори.“ И тој ѝ ги даде Горните и Долните извори.