1 Царевите 6:1-38
1 Царевите 6:1-38 Свето Писмо: Стандардна Библија 2006 (66 книги) (MK2006)
Во четиристотини и осумдесеттата година по излегувањето на Израеловите синови од египетската земја, во четвртата година на Соломоновото царување над Израел, во месец зиф, кој е втор месец, Соломон почна да Му гради храм на Господ. А храмот што цар Соломон Му го изгради на Господ, беше долг шеесет лакти, широк – дваесет и висок – триесет лакти; тремот пред храмот беше долг дваесет лакти, според ширината на храмот, и широк – десет лакти пред храмот. Во храмот тој направи прозорци, затворени со решетки. И направи доградба околу ѕидовите на храмот, околу светилиштето и Светињата над светињите; а направи и странични соби наоколу. Долниот кат на зградата беше широк пет лакти, средниот широк – шест лакти, а третиот – широк седум лакти; зашто околу храмот надвор беа направени растојанија за доградба да не допираат до ѕидовите на храмот. Кога се градеше храмот, за градење се употребуваа готови изделкани камења, така што за време на градењето на храмот не се слушаше, ни чекан, ни тесла, ниту некакво друго железно орудие. Вратата на средниот кат беше десно од храмот. По тркалезни скали се искачуваа на вториот кат а од вториот – на третиот. Така го изгради тој храмот, го изгради и го обложи со кедрови штици. И догради до целиот храм странични соби, високи пет лакти; тие беа прикрепени кон храмот со кедрови греди. Тогаш словото Господово дојде кон Соломон, и му беше речено: „Ете, ти градиш храм: ако одиш по Моите закони, ако постапуваш по Моите наредби и ако ги пазиш сите Мои заповеди, управувајќи се според нив, Јас ќе го исполнам врз тебе словото Свое што му го бев кажал на татко ти Давид; и ќе живеам среде Израеловите синови и нема да го оставам Мојот народ Израел.“ И така, Соломон го изгради храмот и го заврши. Ги обложи ѕидовите на храмот однатре со кедрови штици; од подот до таванот ги обложи однатре со дрво, а подот на храмот го покри со кипарисови штици. А во задната страна на храмот на дваесет лакти од крајот, издигна ѕид и ги обложи ѕидовите и подот со кедрови штици, и направи простор за Светињата над светињите. А храмот, само предниот дел на храмот, имаше четириесет лакти. По кедарот однатре имаше резби, слични на краставички и распукнати цветови; сѐ беше покриено со кедар; камен не се гледаше. А внатре во храмот тој ја направи Светињата над светињите за да го постави таму ковчегот на заветот Господов. Светињата над светињите беше долга дваесет лакти, широка дваесет лакти, и висока дваесет лакти; тој ја опкова со чисто злато; исто така го опкова и кедровиот жртвеник. Одвнатре, Соломон го опкова храмот со чисто злато, и протегна златни вериги пред Светињата над светињите и го опкова со злато. Целиот храм тој го обложи со злато, целиот храм докрај, и целиот жртвеник што е пред Светињата над светињите, го опкова со злато. А во Светињата над светињите направи два херувима од маслиново дрво, високи по десет лакти. Едното крило на херувимот беше долго пет лакти и другото крило на херувимот – пет лакти; десет лакти имаше од едниот крај на крилјата негови до другиот крај на крилјата негови. Десет лакти имаше и другиот херувим; еднаква мерка и еднаков облик имаа двата херувима. Височината на едниот херувим беше десет лакти, исто така и на другиот херувим. Тој ги постави херувимите среде Светињата над светињите. А крилјата на херувимите беа раширени, и крилото на едниот се допираше до едниот ѕид, а крилото на другиот херувим допираше до другиот ѕид; другите нивни крилја пак се среќаваа крило со крило среде просторијата. Тој ги обложи херувимите со злато. И по сите ѕидови на храмот наоколу издлаби ликови на херувими, палми и расцутени цветови, однатре и однадвор. И подот на храмот го опкова со злато во внатрешниот и предниот дел. За влез во Светињата над светињите тој направи врата од маслиново дрво со петоаголни спојки. На двете половини на вратата од маслиновото дрво тој издлаби херувими, палми и расцутени цвеќиња и ги обложи со злато; ги покри со злато и херувимите и палмите. И пред влезот на храмот тој направи четириаголни столбови од маслиново дрво и две врати од кипарисово дрво; двете половинки на едната врата беа подвижни, и двете половинки на другата врата исто така беа подвижни. Издлаби по нив херувими, палми и расцутени цвеќиња и ја обложи резбата со злато. И внатрешниот двор го загради од три реда делкани камења и од еден ред кедрови греди. На четвртата година, во месецот зиф, тој ги беше положил основите на храмот Господов, а на единаесеттата година, во месецот бул, тоа е осмиот месец, – тој го заврши храмот со сите негови делови и според сите негови преднацрти. Соломон го градеше храмот седум години.
1 Царевите 6:1-38 Библија: Стариот и Новиот Завет, Константинов (MKB)
Во четири стотини и осумдесеттата година од излегувањето на Израелците од Египетската Земја, во четвртата година на своето царување над Израел, во месецот Зиф - тоа е вториот месец - Соломон почна да го гради Господовиот Дом. Храмот што Соломон Му го градеше на Господа беше долг шеесет лакти, широк дваесет, а висок триесет лакти. Тремот пред Светилиштето на Храмот беше дваесет лакти долг, спрема храмовата широчина, а десет лакти широк, спрема должината на Храмот. На Храмот направи прозорци, затворени со решетки. Покрај ѕидот на Храмот околу Светината и Светината над светините, соѕида приградба на катови, сѐ наоколу. Долниот кат беше пет лакти широк, а средниот шест, а третиот седум лакти, зашто засеците ги распореди од надворешната страна околу Храмот, за да не би требало да ги вградува во храмските ѕидови. Храмот е граден од камен што веќе во каменоломот беше изделкан, така што при градењето не се чуја ни чекан ни длето, ни некакво железно орудие. Влезот во долниот кат беше од десната страна на Храмот, а по завојни искачувалки се одеше до средниот кат, и од средниот на третиот. Така го изгради Храмот и го доврши; и го покри со кедрови греди и даски. И соѕида уште приградба околу целиот Храм; беше пет лакти висока, а врзана со Храмот со кедрови греди. И Господовото слово му стигна на Соломона: “Тоа е Домот што го градиш: ако одиш според Моите наредби, ако ги исполнуваш Моите наредби и ако ги пазиш Моите заповеди, тогаш ќе го исполнам за тебе ветувањето што му го дадов на твојот татко Давид: Ќе престојувам меѓу Израелевите синови и нема да го оставам Мојот народ Израел.“ И така Соломон го изгради Храмот и го доврши. И ги обложи одвнатре ѕидовите на Храмот со кедрови даски - од подот до покривот ги обложи со дрво одвнатре - а со чемпресови даски го обложи подот на Храмот. И направи преграда од дваесет лакти, од кедрови даски, од подот до покривот, и го оддели тој дел на Храмот за Светина над светините. А Светилиштето, дел на Храмот пред Светина над светините - имаше четириесет лакти. А врз кедровината внатре во Храмот беа врежани украси - плетеници од папки и цвеќиња; сѐ беше од кедровина, и никаде не се гледаше камен. Светината над светините ја уреди внатре во Храмот, за да го смести таму Ковчегот на Господовиот Завет. Светината над светините беше дваесет лакти долга, дваесет лакти широка, а ја обложи со чисто злато. Направи и жртвеник од кедровина, пред Светината над светините, и го обложи со чисто злато. И сиот Храм го обложи со злато, сиот Храм и сиот жртвеник, кој е пред Светината над светините, го обложи со злато. Во Светината над светините направи два херувима од маслиново дрво. Беа високи десет лакти. Едното крило на херувимот беше пет лакти, а второто крило во херувимот беше пет лакти; имаше десет лакти од едниот крај на крилата до другиот. И другиот херувим беше десет лакти: еднаква мера и еднаков облик на обата херувима. Височината на едниот херувим беше десет лакти, така и на вториот. Ги смести херувимите сред внатрешната просторија; ги ширеа своите крила, така што крилото на едниот достигаше до едниот ѕид, а крилото на другиот достигаше до другиот ѕид; во средината на просторијата крилата им се допираа. И херувимите ги обложи со злато. По сите ѕидови на Храмот, внатре и однадвор, врежа ликови на херувими, со палми и со расцветани цветови, со злато го покри и подот на Храмот одвнатре и однадвор. А за влез во Светината над светините направи двокрилна врата од маслиново дрво; довратниците со праг беа на пет агли. Двете крила на вратата од маслиново дрво ги украси со херувими, палми и со расцветани цветови, и сите ги обложи со злато; со златни листиња ги облепи херувимите и палмите. Така и за влезот во Светилиштето направи врата од маслиново дрво, со четириаглести довратници. Двете крила на вратата беа од чемпресово дрво, и двете се отвораа на едната и на другата страна. Врежа врз нив херуви, палми и расцветани цветови, и го обложи со злато сѐ што беше ископаничарено. Потоа го изгради внатрешното предворје од три реда делкан камен и од еден ред делкани кедрови греди. Основите на Господовиот Храм беа положени во четвртата година, во месецот Зиф; а во единаесеттата година, во месецот Вул - тоа е осмиот месец - Храмот е довршен со сите делови и со сѐ што му припаѓаше. Го изгради за седум години.