A-pûn Awang 11
11
Babela Mâ É Mâchya Yhûm Mó
1Ahkuî, myìdàm htoq gón má, myíng ra-myíng za jòq mù, haú lé za chôm nyo akô nghut ri. 2Byu pé gi, buìhtoq hkyam shut#11:2 Buìhtoq hkyam shut gâ é lé, buìhtoq hkyam mai a nghut jáng buìhtoq hkyam má nghû le wó taî lhê. htòt e ló kô é hkûn, Shina#11:2 Shina gi, Babeloni-a mau lé gâ lhê. mau má jang dâm pá rapá myàng mù, haú má jowò hkyó bekô nghut ri.
3Yhángmòq gi, rayùq eq rayùq, “Lé keq, ngá-nhúng tsohtung saí mù, nyòq shoq hput sháng.” ga taî lhûm akô nghut ri. Yhángmòq gi, lùqgòk chûng râ malaî tsohtung chûng mù, tsohtung dàp râ matú tso-kyín lé chung akô nghut ri. 4Hau htâng, yhángmòq gi, “Lé keq, ngá-nhúng gi, ngá-nhûng é myìng wó râ matú le, myìdàm gón má ngá-nhúng a byo myín ló râ matú le, ngá-nhúng yhang wà mó rawà xuq mù, mauhkûng htûng é mâchya yhûm mó ralhum saí sháng.” ga taî akô nghut ri.
5Nghut kôlhang, haû Yhûmsîng Garai gi, xângzo wuì xuq tô é wà mó eq yhángmòq saî nyi é mâchya yhûm mó lé wú râ ga gyó lé lo ri. 6Haû mù, haû Yhûmsîng Garai gi, “Yhángmòq gi, byù rahú, myíng ra-myíng za mu é nghut luî, shí lé kut hî bekô nghut jáng, htângnùng má, yhángmòq myìt hen é hkyô haî le a wó kut é a jòq lo kôrâ nghut lhê. 7Sâ, ngá-nhúng gi, gyó ê mù, yhángmòq rayùq eq rayùq a sê gyô lhum râ matú, yhángmòq é myíng lé ê lhoqnhûng pyám byi sháng.” ga taî ri.
8Haû mù, haû Yhûmsîng Garai gi, yhángmòq lé, haú jowò mai myìdàm htoq gón má lhoqpyo kat bê nghut mù, yhángmòq gi, wà mó haû xuq nyi é mai nô pyám bekô nghut ri. 9Haû nghut é yánmai, jowò haú lé gi, Babela #11:9 Babela gi, Babelon lé gâ é nghut ri; Babela gâ é lé, Hebre má gi, lhoqnhûng pyám gâ é lichyúm htoq é nghut lhê. ga myhîng é nghut ri; hkâsu mù gâ le, Yhûmsîng Garai gi, jowò haû má, myìdàm htoq gón bang chung é myíng haú lé lhoqnhûng pyám byî é yánmai nghut ri. Haû Yhûmsîng Garai gi, jowò haú mai, yhángmòq lé, myìdàm htoq gón má lhoqpyo kat bê nghut ri.
Shem Mai Abram Jé Shoq É Hkyô
10A-ô mâ é gi, Shem é awùt ashîn pé lé shap kyô é hkyô nghut ri.
Dowuî díng é htâng í zân má, Shem gi, chyungxe zànwut 100 zàn bo é hkûn, Arihpaza lé hku ri. 11Yhang gi, Arihpaza lé hku é htâng, 500 zân chyungxe xoq dui nyì mù, gótû yùqzo byìzô pé lé dum hku ri.
12Arihpaza gi, chyungxe zànwut 35 zân bo é hkûn, Shela lé hku ri. 13Yhang gi, Shela lé hku é htâng, 403 zân chyungxe xoq dui nyì mù, gótû yùqzo byìzô pé lé dum hku ri.#11:13 Septuagint (Luk 3:35,36 eq A-pûn 10:24 má kâ xûm tô é má le bo lhê) má, Yhang gi, chyungxe zànwut 35 zân bo é hkûn, Kainan lé hku ri. 13 Arihpaza gi, Kainan lé hku é htâng, 430 zân chyungxe xoq duî nyì mù, gótû yùqzo byìzô pé lé dum hkû mù, shi ló byùq bê nghut ri. Kainan gi, chyungxe zànwut 130 zân bo é hkûn, Shela lé hku ri. Yhang gi, Shela lé hku é htâng, 330 zân chyungxe xoq dui nyì mù, gótû yùqzo byìzô pé lé dum hku ri.
14Shela gi, chyungxe zànwut 30 zân bo é hkûn, Ebera lé hku ri. 15Yhang gi, Ebera lé hku é htâng, 403 zân chyungxe xoq dui nyì mù, gótû yùqzo byìzô pé lé dum hku ri.
16Ebera gi, chyungxe zànwut 34 zân bo é hkûn, Hpelek lé hku ri. 17Yhang gi, Hpelek lé hku é htâng, 430 zân chyungxe xoq dui nyì mù, gótû yùqzo byìzô pé lé dum hku ri.
18Hpelek gi, chyungxe zànwut 30 zân bo é hkûn, Re-u lé hku ri. 19Yhang gi, Re-u lé hku é htang, 209 zân chyungxe xoq dui nyì mù, gótû yùqzo byìzô pé lé dum hku ri.
20Re-u gi, chyungxe zànwut 32 zân bo é hkûn, Seruk lé hku ri. 21Yhang gi, Seruk lé hku é htâng, 207 zân chyungxe xoq dui nyì mù, gótû yùqzo byìzô pé lé dum hku ri.
22Seruk gi, chyungxe zànwut 30 zân bo é hkûn, Nahora lé hku ri. 23Yhang gi, Nahora lé hku é htâng, 200 zân chyungxe xoq dui nyì mù, gótû yùqzo byìzô pé lé dum hku ri.
24Nahora gi, chyungxe zànwut 29 zân bo é hkûn, Htera lé hku ri. 25Yhang gi, Htera lé hku é htâng, 119 zân chyungxe xoq dui nyì mù, gótû yùqzo byìzô pé lé dum hku ri.
26Htera gi, chyungxe zànwut 70 zàn bò jáng, Abram, Nahora eq Haran pé lé hku ri.
27A-ô mâ é gi, Htera é awùt ashîn pé lé shap kyô é hkyô nghut ri.
Htera gi, Abram, Nahora eq Haran lé hku ri. Haran gi, Lot lé hku ri. 28Haran gi, yhâng wa Htera chyungxe rû dui nyi ashî hkûn, yhâng é choq hpyit mau Hkalade byu pé nyi é Ura wà má shi byùq ri. 29Abram eq Nahora nhiktâng gi, í yùq é myiwe yu akô; Abram é yhang myî myìng gi, Sarai gâ ri; Nahora é yhang myî myìng gi, Milihka gâ ri; Milihka gi, Haran é byìzo nghut ri; Haran gi, Milihka eq Yisika nhiktâng lé hku ri. 30Sarai gi, baùdung dung mù, zodù a dàp nghut ri.
31Htera gi, yhang zo Abram, Haran é yhang zo nghut é yhâng gashu Lot eq yhang zo Abram é yhang myi nghut é yhâng dùmó Sarai pé lé shuî chûng mù, Hkanan mau shut ê râ matú, rahá za, Hkalade byu pé nyi é Ura wà mai htoq e ló akô. Nghut kôlhang, yhángmòq gi, Haran gâ é jowò má jé mù, haú má nyi to bekô nghut ri.
32Htera gi, 205 zân chyungxe duì mù, Haran wà má shi ló byùq bê nghut ri.
Селектирано:
A-pûn Awang 11: znot
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2025, Wycliffe Bible Translators, Inc.