Luke 11
11
1ఊ ఏక్ జాగ అరజ్ కర్తోర. అరజ్ కరేర్ థామ్దినో జేర్ పచ్చ ఓర్ చేలమా ఏక్ – ప్రభూ, యోహాన్ ఓర్ చెలాన సికాయొజుఁ, హమేన సదా అరజ్ కరేరో సికాకన్ ఓన పూచో.
2జేతి ఊ – తమ్ అరజ్ కరోజనా – బాపూ, తార్ నామ్ పవిత్తర్ వేజాయ, తార్ రాజ్ ఆవ్జాయ,
3హమేన చావజకో దాడీర్ ఖొరాకీ దాడీ హమేన దేద;
4హమ్ హమేన బాకీ ఛజే హర్యేక్ ఆద్మీన మాఫ్ కర్రేచాఁ జేతి హమార్ పాపేన మాఫ్ కర్; హమేన శోధనామా ఘాల్ మత్ కన్ కేణో కన్ ఉందేన కో.
5ఉజ్జీ ఊ ఉందేన హనూకో – తమార్మా కేనీ తోయీ ఏక్ దోస్త్ రతో, ఊ ఆద్రాతేర్ వకత్ ఓ దోస్తేర్ కన జాన్ – ఏదోస్త్, మన తీన్ బాటీ బదల్ ద;
6మార్ దోస్త్ వాట్ వాట్ జాతో మార్ ఢైఁ ఆయొచ; ఓన ఘాలేన మార్ ఢైఁ కాఁయిఁ ఛెనికన్ ఓతి కియతో,
7ఊ మాఁయిఁజ్ రేన్ – మన కటాళొ మత్ ఖొరా; దర్వాజా ఘాలీఘులీ ఛ, మార్ నాన్క్యా ఛుచ్యాబర్ మోతీ సదా సుతెచ, మ ఊటన్ దేసకూనీ కన్ కియ క?
8ఊ ఓర్ దోస్త్ కన్ ఊటన్ న దతోయీ, ఊ సరమ్ నరజుఁ ఘడీఘడీ పూచో జేర్ కార్ణే ఊటన్ ఓన చావ జకో సే దచకన్ తమేతీ కేరోఁచుఁ .
9హనూజ్ తమ్ సదా మాంగో, తమేన దచ, ఢూంఢో తమేన మాళచ, దర్వాజా మారో తమార్ వాస కాడచ
10మాంగజే హర్యేక్ ఆద్మీన దచ. ఢూంఢ జేన మళచ. దర్వాజా మారజెన కాడచ కన్ తమేన కేరోఁచుఁ.
11తమార్మా ఏక్ బేటా ఓర్ బాపేన మాచ్ళీ మాంగతో ఓర్ బదల్ సాపేన దచక ? ఈండా దకతో వీంచు దచక ?
12తమ్ ఖరాప్ వేన్ రోతోయీ సదా తమార్ ఛుచ్యాబరేన ఆచో చీజ్ దేరొ మాలమ్ రచజనా.
13స్వర్గలోకేమా ఛజకో తమార్ బాప్ ఓన మాంగ జేన పవిత్తర్ ఆత్మాన సాసీజ్ దచ కన్ కో.
14ఏక్ వణా ఊ గూంగీ భూత్డీన భడ్కారో. ఊ భూత్డీ ఛోడన్ డగర్గి జేర్ పచ్చ గూంగో వాతే కీదో, జేతి జనూర్ మళావో అప్సోస్ వేగే.
15పణ్ ఉందేమా థోడ్సేక్ – ఈ భూత్డీర్ హకమ్దార్ ఛజకో బయేల్జబూలేతీ భూత్డీయూన భడ్కారోచకన్ కేల్దే.
16ఉజ్జీ థోడ్సేక్ ఓన పర్చో కరెన – స్వర్గ లోకేతీ ఏక్ అచంకళార్ కామ్ దకాళ్ కన్ ఓన పూచె.
17ఊ ఉందేర్ దల్ మాలమ్ కర్లేన్ ఉందేన హనూకో– ఓర్ ఊజ్ ఖిలాప్ వేన్ నాళీ వేజాజకో హర్యేక్ రాజ్య నాష్ వేజావచ; ఓర్ ఊజ్ ఖిలాప్ వేన్ రజకో హర్యేక్ ఘర్ నాశ్ వేజావచ
18శాతాన్ సదా ఓర్ ఖిలాఫ్ వేన్ ఊజ్ నాళీవతో, ఓర్ రాజ్య్ కూఁ థమచ? మ బయేల్జెబూలేతీ భూత్డీయూన భడ్కారోఁచుఁ కన్ తమ్ కేరేచో కాఁయిఁ?
19మ బయల్జెబూలేతీ భూత్డీయూన భడ్కావుఁతో తమార్ ఆద్మీ కేతీ భడ్కారేచ? జేతీ ఓజ్ తమార్ నేవో కరియే
20పణ్ మ దేవేర్ ఆంగ్ళీతీ భూత్డియూన భడ్కాఁవుఁతో, దేవేర్ రాజ్ తమార్కన సాసీజ్ ఆయోచ.
21జోరేవాళో హత్యార్ ఘాల్లేన్ ఓర్ ఘర్ జతన్ కర్తో రజనా, ఓర్ కమాయి జతన్ రచ.
22పణ్ ఓతీ జోరేవాళో ఏక్ ఓర్ ఊంపర్ పడన్ ఓన జీత జనా, ఊ భరోసా రకాడ్మేలోజకో హత్యారెన సేన ఖొస్లెన్, ఓర్ ఆస్తీన వేంట్దచ.
23మార్ సామ్ న రజకో మార్ వ్యారీ; మోతీ భళన్ గోళా నకరజకో ఛీంట్ ఛాంట్ కర్దేవాళో.
24భూత్డీ ఏక్ ఆద్మీన ఛోడన్ డగర్జా జేర్పచ్ఛ ఊ విశ్రాంత్ లేన జాగ్ ఢూండ్తి పాణీరేనీజె జాగేమా హీండ్తి రచ. విశ్రాంత్ మ ళోకోని జేర్ కార్ణే – మ ఛోడన్ ఆయిజే మార్ ఘరేన ఫేర్ జావుఁచుఁ కన్ కేలేన్
25ఊ ఆయి జనా ఊ ఘర్ బారన్ తయ్యార్ కర్ మేలెజేన దేకన్ జాన్
26ఓతీ ఖారాబ్ ఛజె ఉజ్జీ సాత్ భూత్డియూన లారలేన్ ఆవచ. ఓ ఓమా జాన్ ఒత్తజ్ రచ. జేతి ఓ ఆద్మీర్ ఛెడార్ హాల్ అగ్డితి ఉజ్జీ ఖారాబ్ వేన్ రచ కన్ కో.
27ఊ ఏ వాతే కేరోఁజనా, మళాయెమా రజకో ఏక్ బీర్ ఓన దేకన్ – తోన పాడోజకో పేటన్, తూఁ పీదోజకో బచ్చీ నసీబ్దార్ వేగీ కన్ కల్కారిమారన్ కేతేఖం,
28ఊ – హావ, పణ్ దేవేర్ వాత్ మానన్ ఓర్ నైఁ చాలేవాళ్ ఉజ్జీ నసీబ్దార్ కన్ కో.
29ఉజ్జీ జన్ సే గోళావేన్ రజనా, ఊ హనూ కేన సరూ కీదో – ఏ పీడీవాళ్ ఖారాబ్ పీడీవాళ్ వేన్ రేన్ ఆచమ్కళార్ కామేన మాంగ్రెచ. పణ్ యోనార్వడీర్ ఆచమ్కళార్ కామజ్ తపన్ ఉజ్జీ కుణ్సీ అచమ్కళార్ కామ్ ఇందేన దేజాయెని.
30యోనా నీనెవే శారేమారజేన కూఁ నిశానేర్ నైఁ రోకో, హనూజ్ ఆద్మీర్ బేటా. సదా ఏ పీడీవాళూన నిశానేర్ నైఁ రచ.
31దక్షణ్ మల్కేర్ రాణీ నేవేర్ దాడూమా ఏ పీడీవాళేతీ సదా ఊటన్ ఉందేర్ ఊంపర్ దోష్ ఢోళచ. ఊ సొలొమోనేర్ జ్ఞాన్ సామ్ళేన ధర్తీర్ కొసాతీ ఆయి. ఇదేక్ సొలొమోనేతీ మోటొ అత్తఛ.
32నీనేవేర్ ఆద్మీ నేవేర్ దాడూమా ఏ పీడీవాళూతీ హుబ్రేన్ ఉందేర్ ఉంపర్ దోష్ ఢోళచ. ఓ యోనార్ వాతే సామ్ళన్ దల్ బద్లాలీదె ఇదేక్. యోనాతీమోటొ అత్త ఛ.
33కుణీ వతోయీ దీవో సొళ్గాన్ ఆస్రేర్ జాగేమాక పాలీ హెటక మేలేనీ పణ్, మాఁయిఁ ఆవజేన వజాళో దకాయెన దీయేర్ పీడా ఉంపరజ్ మేలచ.
34తార్ జీవ్డారో దీవో తార్ ఆంకీజ్ జేతి తార్ ఆంకీ ఆచ్ రతో, తార్ జీప్డా సారీ వజాళేతీ భరాన్ రచ. ఊ ఖరాప్ వేన్ రతో, తార్ జీవ్డా సదా అందారేతీ భరాన్ రచ.
35జేతి తార్ మాఁయిఁ రజకో వజాళో అంధారోవేన్ నరజుఁ దేక్ల.
36తార్ జీవ్డామా కుణ్సీ భాగ్ అంధారో నరజుఁ తార్ జీవ్డా సారీ వజాళేతీ భరాన్ రతో, దీయెర్ జోతేతీ తోన వజాళో దజనా కూఁ రచకో, హనూజ్ జీవ్డా సారీ వజాళో భరాన్ రచ కన్ కో.
37ఊ వాతే కర్తోరజనా, ఏక్ పరిసయులేవాళో ఓతీసాత్ భోజన్ కర్కన్ ఓన బలాయో జనా ఊ మాఁయిఁ జాన్ ఖొరాకి ఖాయేన బేస్గో.
38ఊ ఖోరాకీర్ ఆంగ హంగోళీ కీదోకొని కన్ ఊ పరిసయులే వాళోదేకన్ అప్సోస్ వేగో.
39జేతి ప్రభూ హనూకో – తమ్ పరిసయులేవాళ్ థాళీన్, కచోళీ ఉంపర్ శుద్ద్ కరోచో, పణ్ తమార్ దల్ చోరీతీన్ ఖరాప్ పణేతీ భరాన్ ఛ.
40అక్కల్ ఛెనిజకో ఆద్మీయో, బారేర్ భాగ్ కీదోజకో మాఁయిఁర్ భాగ్ సదా కీదొకొని కాఁయిఁ?
41జేతి తమేన ఛజకో ధరమ్ కరో, జనా తమేన సే శుద్ధవేన్ రచ.
42బాపురే, పరిసయువాళ్, పుదీనా, సదాపాన్ హర్యేక్ భాజీమా దస్మొ హాఁసో తమ్ దోచో పణ్, న్యాయేనన్ దేవేర్ ప్రేమేన ఛోడ్దేరేచో. ఉందేన ఛోడనజుఁ ఏన కరేర్ ఛ.
43బాపురే, పరిసయువాళ్ తమ్ దేవేర్ ఘరూమా ఊంచేర్ జాగన్, బజారుమాఁయిఁ నమస్కార్ కూంత్రేచో.
44బాపురే, తమ్ దకాయెనీజె మసాణేర్ నైఁ ఛో; ఉందేర్ ఉంపర్ చాలజకో ఆద్మీ ఓ మసాణ్ కన్ వళ్కేనీ.
45జనా ధరంశాస్త్ర్ ఉపదేష్ కరేవాళో ఏక్ – బోధ కరేవాళో, హనూకేన్ హమేన సదా దోషి ఠెరారోచి కన్ ఓతి కేతేఖం.
46ఊ – బాపురే, ధరంశాస్త్ర్ ఉపదేష్ కరేవాళ్, పాడ్ సకేజాయేని జత్రా భోజాన తమ్ ఆద్మీర్ ఉంపర్ లాదొచో పణ్, తమ్ ఏక్ ఆంగ్ళీతీ సదా ఓ బోజాన ఛీపోనీ.
47బాపురే, తమార్ వడ్ బూడ్ మార్నాకేజే ప్రవక్తాఁవూఁర్ మసాణేన తమ్ భందారేచో.
48జేతి తమ్ గవాయివేన్ తమార్ వడ్బూడేర్ కామేన తమ్ మాన్ లేరేచో; ఓ ప్రవక్తావున మార్నాకే, తమ్ ఉందేర్ మసాణేన భందావోచో.
49జేతి దేవేర్ జ్ఞాన్ కజకో "కాఁయిఁకతో" – మ ఉందేర్కన ప్రవక్తఁవూనన్ అపొస్తలేవున మేలుఁచుఁ.
50ఓ థోడ్సేకేన మార్నాకచ, థోడ్సేకేన వేలా పడావచ.
51జేతి జగ్ హుయొ జనాతీ కతో, హేబేలేర్ లోయీతీలేన్ బలీర్ పీడారన్ దేవేర్ ఘరేర్ వచ్చ మర్గోజకో జకర్యార్ లోయీలగు వచ్కళో జకో ప్రవక్తఁవూఁర్ సేర్ లోయీ జగు ఏ పీడీవాళ్ నేవేమా ఆవచ; సాసీజ్ ఏ పీడీవాళ్ ఓ లోయీర్ వాస నేవేమా అవచ కన్ తమేన కేరోఁచుఁ
52బాపురే, ధరమ్-శాస్త్ర్ బోధా కరేవాళ్, తమ్ జ్ఞాన్ కజకో కుంజీన పాల్డేగే; తమ్ మాఁయిఁ జావోనీ, జాయెవాళేన జాయేదోని కన్ కో.
53-54ఊ ఒత్తెతీ డగర్గో జనా, శాస్త్రీయూన్ పరిసయులేవాళ్ ఓర్ ఉంపర్ పక్కో దుస్మణ్ వేన్ ఓర్పర దావొ కరాఁకన్ రేన్, ఓర్ మూండేతీ ఆవజకో కుణ్సీతీవాత్ పక్డేన, తాకన్ ఢూండ్తే, అస్మాన్ వాతే ఓన వాతే కరాయెన లాగే.
Селектирано:
Luke 11: Lambadi
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2025, The Bible Society of India
All rights reserved