genesis 3
3
1యెహోవా దేవ్ బణాయెుజకొ జీవ్రాసేమా సేమా సరప్ ఘణో యుక్తీతి ర. ఊ బీరేతి హన్నుకో. ఈ సాసీఙ్ క? ఏ బాగేర్ ఝాడు మాఁయీర్ కుణ్సీ ఫళేవున సదా ఖావ్ణోనకన్ దేవ్ కోక? కన్ పూచొ.
2జనా బీర్ - ఏ బాగేర్ ఝాడేఁవూర్ ఫళేవున హమ్ ఖాయెవాస;
3పణ్ ఏ బాగేర్ వచ్చ ఛజకొ ఝాడేర్ ఫళేర్ వడితి దేవ్ - తమ్ మర్జావొనజుఁ ఉందేన నఖావ్ణొ, ఉందేన ఛీప్ణొనకన్ కోకన్ సర్పేతి కీ.
4జనా సరప్ - తమ్ అసలజ్ మరోని;
5కసెనకతో తమ్ ఉందేన ఖావొ జేదాడ తమార్ ఆంకి ఉగ్డన్ తమ్ ఆచ్చే బల్లాన మాలమ్ కర్లేవాళ్ వేన్, దేవ్ దేవతార్నాఁయీఁ వేజావోచొకన్ దేవేన మాలమ్ కన్ బీరేతికో.
6జనా బీర్ ఊ ఝాడ్, ఖాయెన ఆచ్చొ ఛకన్, ఆంకీన సువాంతొ దకావచ కనన్, ఆచ్చొ ఙ్ఞాన్ దేవాళొ ఛకన్ దీటి జనా, ఊ ఓర్ ఫళేవుఁమాఁయీతి థోడ్సేక్ తోడ్-లేన్ ఖాలేన్ ఓర్ సాత ఓర్ ఘరెవాళేన సదా దీని, ఊ సదా ఖాల్దొ;
7జనా ఉందూర్ దోయీర్ ఆంకి ఉగడ్-గీ; ఓ హమ్ నగే ఛాంకన్ మాలమ్ కర్లేన్ అంజూరేర్ పానేవున సీడన్ ఖచ్డార్నాఁయీఁ ఉందేర్ సారు కర్లీదే.
8ఆదామన్ ఓర్ బీర్ బాగేమా సీళివణా ఫర్తో రజకోయెహోవా దేవేర్ ఘోగ్ సామ్ళన్, యెహోవా దేవేర్ సమ్నక్ న ఆవజుఁ బాగేర్ ఝాడూఁర్ వచ్చ ఘుూస్గేజనా.
9యెహోవా దేవ్ ఆదామేన బలాన్ - తుఁ కత్త-ఛీ-కన్ కో.
10జనా ఊ, మ బాగేమా తార్ ఘోగ్ సామ్ళొజనా నగో ఛూఁజేతి చమ్కన్ ఘూస్గోంచుఁ కన్ కో.
11జనా ఊ, తుఁ నగో ఛీకన్ తోన కోజకొ కూణ్?. తుఁ నఖావ్ణొ కన్ మతోన హకమ్ దీనొజకో ఝాడేర్ ఫళ్ ఖాల్దొక? కన్ పూచొ.
12జనా ఆదామ్ మార్-సాత రేణొకన్ తూఁ మన దీనోజకొ ఈ బీరజ్ ఓ ఝాడేర్ ఫళ్ థోడ్సేక్ మన దీని జనా మ ఖాదొ కన్ కో.
13జనా యెహోవా దేవ్ బీరేతి - తూఁ కీదిజకొ ఈ కాఁయిఁకన్ పూచొ జనా బీర్ - సరప్ మన ఢోకో కీదొ జేతి మ ఖాల్దికన్ కి.
14జేతి యెహోవా దేవ్ సర్పేతి. తూఁ హన్ను కీదొ జేతి ఢోరూమా సేమాన్ జమ్మి పరేర్ జీవ్రాసేమా సేమా సరాప్ లేల్దొ జకోవేన్ తార్ పేటేతి సరక్తొ, తూఁ బంచస్ అత్రాయి దాడ్ ధూడ్ ఖాన్ బంచీస్.
15ఉజ్జి తోనన్ బీరేన, తార్ వలాదేనన్ ఓర్ వలాదేన వ్యార్ రజుఁ కరియుఁ ఊ తార్ మాతేన చూరొకరియె తూఁ ఓర్ ఏడీన ఢసీస్.
16ఊ బీరేతి తార్ భావేటీనన్, తూఁ పేటేతి రస్ జనార్ వేలాన మ భారి జాదా కరియుఁ. వేలాతీజ్ తుఁ ఛుచార్ జణీస్, తార్ ఘరెవాళె పర తోన కూంత్ రీయె. ఊ తోన పాలణ్ కరియె.
17ఊ అదామేన కో - తూఁ తార్ బీరేర్ వాత్ మానన్ - ఖోమత్ కన్ మ తోన హకమ్ దీనోజకో ఝాడేర్ ఫళేన ఖాల్దొజేతి తార్ సారు ధర్తి సారిన సరాప్ ఆవ్గీచ. తూఁ బంచస్ అత్రాయి దాడ్ వేలా భావేటీతీజ్ ఓర్ పీక్ ఖాయిస్.
18ఊ కాంటేర్ ఝాడేనన్ బొచ్కి బోచ్కాన తార్ సారు ఉగాయ. తూఁ ఖేతె మాఁయీఁర్ పీక్ ఖాయీస్;
19తూఁ జమ్మీమా ఫరన్ భళ్ జావస్ జేలగు తార్ మూండేర్ పర్సీనా రేడన్ ఖొరాకి ఖాయీస్; కసెనకతో - తోన ధూడెమాఁయీతీజ్ కాడోజేతి; తూఁ ధూడజ్ జేతి, ఫరన్ ధూడజ్ వేజాయీస్ కన్ కో.
20ఆదామ్ ఓర్ బీరేన హవ్వకన్ నామ్ పాడో; కసెనకతో ఊ జీవన్ ఛజేన సేన యాడి.
21యెహోవాదేవ్ ఆదామేనన్ ఓర్ బీరేన ఖాల్డేర్ ఝగ్లా బణాన్ ఉందేన పెరాయెు.
22జనా యెహోవాదేవ్ - ఇదేక్ ఆచ్చొ బల్లాన మాలమ్ కర్లేన ఆదామ్ అపణ్మా ఏకేర్నాఁయీ వేగోచ. జేతి ఊ ఏక్ వకత్ ఓరో హాత్ లాంబో కరన్ జీవేర్ ఫళేన సదా తోడన్ ఖాలేన్ హర్ హమేశా జీవ్ సకచ కాఁయిఁకోకన్.
23యెహోవా దేవ్ ఓన కుణ్సీ ధూడెమాఁయిఁతి కాడోకో, ఓన దూనేన ఏదేన్ బాగె మాఁయిఁతి ఓన బార భడ్కాదీనో.
24జనా ఊ ఆదామేన భడ్కాదేన్ ఏదేన్ బాగేర్ ఉగ్మణేసామ్ కెరూభేవున జీవేర్ ఝాడేసామ్ జాయేర్ వాటేపర కావ్లిరేన ఓవ్డి ఏవ్డి ఫరెవాళ్ తర్వారేర్ ఝాళేవున హాూబ్రకాడో.
Селектирано:
genesis 3: Lambadi
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2025, The Bible Society of India
All rights reserved