Acts 4
4
1ఓ జనూతి వాతే కర్రేజనా, యాజకన్ దేవళేర్ సర్దారన్ సద్దూకయూల్
2ఓ జనూన బోధకర్తే రేన్, యేసూర్ కార్ణే మర్గేజేర్ మాఁయితీ ఉటేర్ జరూర్ కన్ బోధ కర్రే జేన దేకన్ ఘబ్రాగే.
3ఓ ఉందేర్ ఉంపర్ జోర్బారేతీ ఆన్ ఉందేన పకల్డీదె. జనా సాంజ్ పడ్గి. జేతీ లారేర్ దాడేతాణు ఉందేర్ ఉంపర్ నిగ్రాణి కరేవాళూన రకాడె.
4వాత్ సామ్ళేజే మాఁయిర్ వార్సేక్ జణా విశ్వాస్ రకాడే. ఉందేమా మాటియూఁర్ లేకో కమ్ జాదా పాంచ్ హజార్ వేగే.
5లారేర్ దాడ ఉందేర్ హకమ్దారన్ మోటన్ శాస్త్రీ సే యెరూషలేమేమా గోళావేగె.
6మోటొయాజక్ అన్నా, కయపాన్ యోహాన్, అలెక్సంద్రన్ మోట్ యాజకేర్ సే భాయి బందన్ ఉందేర్ సాత్ ర.
7ఓ పేత్రూనన్ యోహానేన వచ్చ హూబ్ రకాడన్ - తమ్ కేర్ జోరేతీన్, కేర్ నామేర్ కార్ణే ఈ కామ్ కీదెకన్ పూఛే.
8జనా పేత్రు ఆత్మాతీ భరాన్ హన్నూకో- జనూర్ హకమ్దారో, డావ్ సాణో,
9ఓ కమ్జోరి ఆద్మీన కీదెజకో భలాయీర్ బారేమా ఊ కూఁ ఆచో వేగోకన్ ఆజ్ హమేన పర్చో కర్రేచో.
10జేతీ తమ్సేన్, ఇశ్రాయేల్ జన్ సే, మాలమ్ కర్లేణో జకో కాఁయిఁకతో తమ్ సిల్వా మారేజకోన్ మర్గేజేర్ మాఁయితీ దేవ్ వాటాడొజకో నజరేతేర్ యేసు క్రీస్తూర్ నామేమాజ్ ఈ ఆచోవేన్ తమార్ ముణాంగ హూబోచ.
11ఘర్ భాందేవాళ్ ఫేంక్దీనే జకో భాటా ఊజ్. ఊ భాటా మూలార్ ఉంప్రేర్ ఠాఁసేరొ భాటా వేగో.
12ఉజ్జీ కేతీసదా రక్షణ్ మళెనీ. ఏ నామేతీజ్ రక్షణ్ పాలేణో పణ్, ఆస్మానేర్ హెట ఆద్మీయూమా ఛజకో కుణ్సీ నామేతీ రక్షణ్ మళేనీ కన్ కో.
13ఓ పేత్రూరన్ యోహానేర్ హిమ్మత్ దీటేజనా, ఏ లక్ణీ ఛేనిజకోన్ కాఁయి కళేనిజకో మన్క్యా కన్ మాలమ్ కర్లేన్, అప్సోస్ వేన్, ఓ యేసూర్ సాత రేజకో కన్ మాలమ్ కర్లీదే.
14అచో వేగోజకో ఆద్మీ ఉందేర్ సోబతేమా హూబోజెన దేకన్ కాఁయి ఖిలాప్ జవాబ్ దేసకేకొని.
15జనా సభార్ బార జావో కన్ ఉందేన హకమ్ దేన్ ఉందేమా ఓ మత్రో కరన్
16ఏ ఆద్మీయున ఆపణ్ కాఁయిఁ కరాఁ? ఉందేర్ హాతేతీ ఘణ్ మోటో అ ఛమ్ కళార్ కామ్ హుయొ కన్, యెరూషలేమేమా వస్రేజేన సేన మాలమ్. ఊ హుయో కొనికన్ కేసకానీ.
17హనూవతో ఈ జనూమా ఉజ్జీ నఫ్యాలజుఁ అబ్బెతీ ఏ నామేర్ కార్ణే కేతీ వాతే న కర్ణోకన్ ఆపణ్ ఉందేన చమ్కావాఁకన్ కేల్దే.
18జనా ఉందేన బలామంగాన్ - తమ్ యేసూర్ నామేర్ కార్ణే కాఁయిఁతోయి కేతీ వాతే నకేణోకన్, బోధ సదా న కర్ణోకన్ ఉందేన హకమ్ దీనె.
19జేతి పేత్రూన్ యోహాన్ ఉందేన దేకన్, దేవేర్ వాత్ మాన్ ణోక, తమార్ వాత్ మాన్ణో? కుణ్సోదేవేర్ నంజ్రేమా న్యాయ్ కో తమజ్ కో.
20హమ్ దీటెజేనన్ సామ్ళేజేన నకజుఁ రేసకానీ కన్ ఉందేన జవాబ్ దీన.
21జన్ సే హుయొ జేన దేకన్ దేవేన మహిమా కర్తేరే, జేతీ సభావాళ్ జనూతీ చమ్కన్, ఇందేన సజాదేర్ వాట్ దకాయికొని జేతి, ఇందేన జోర్తి చమ్కాన్ ఛోడ్దినె.
22ఈ నిశానేర్ కామ్ కేర్వడి హుయోకో ఓ ఆద్మీన చాళిస్ వర్సేతీ జాదా ఉమ్మర్ ర.
23ఓ ఛూటన్ ఉందేర్ తన్నేర్ లోగూ కన ఆన్, మోట్ యాజకన్ మోటేన్ ఉందేతీ కేజకో వాతే సేన ఉందేన మాలమ్ కీదె.
24ఓ సామ్ళన్, ఏక్ దల్లేతీ దేవేన హనూ జోర్తి అరజ్ కీదె. ప్రభూ, తూఁ ధర్తీ, అస్మానేన్ సమ్దరేన్ ఉందేమా ఛజకో సొక్ళీన పేదా కీదోజకో.
25అన్యజన్ కస్సెన గడ్బడ్ కీదె?
26జన్ కస్సెన కామ్దేని జకో మత్రో కీదె, ప్రభూర్ ఉంప్రన్, ఓర్ క్రీస్తూర్ ఉంపర్, ధర్తీర్ రాజ్ ఉటే, అధికారీ ఏక్వేన్ గోళావేగె కన్ తూఁ తార్ పవిత్తర్ ఆత్మార్ వడీతి హమార్ బాపన్ తార్ సేవక్ దావీదేర్ మూండేతి బొలాయొ.
27-28కాఁయి చాల్ణో కన్ తార్ హాతేనన్ తార్ సంకల్ప్ ఆంగ నియమ్ కీదోకో ఓసేన కరేన, తూఁ అభిషేక్ కర్మేలో జకో తార్ పవిత్తర్ సేవక్ యేసూతీ ఖిలాఫ్ హేరోదన్ పొంతిపిలాతన్, పరల్ జనూతీన్ ఇశ్రాయేల్ జనూతీ ఏశేరేమా సాసీజ్ గోళా వేగే.
29ప్రభూ, అబ్బ ఉందేర్ డరావ్ణీన దేకన్,
30రోగేవాళూన ఆచో కరేనన్, తార్ పవిత్తర్ సేవక్ యేసూర్ నామేపర నిశానేర్ కామ్ కరేనన్, ఆచమ్కళార్ కామ్ కరేన తార్ హాత్ లాంబొ కర్మెలో జనా, తార్ సేవక్ ఘణ్ హిమ్మతేతీ తార్ వాతేన బోధ కరజుఁ దయాకర్.
31ఓ అరజ్ కర్తేఖమ్, ఓ హుబెజకో జాగ్ ధూజ్ ఉటీ. జనా ఓసే పవిత్తర్ ఆత్మాతీ భరాన్ దేవేర్ వాతే హిమ్మతేతీ బోధ కీదే.
32విశ్వాస్ కీదేజకో సే ఏక్ దల్లేతీన్ ఏక్ ఆత్మాతీరే. కుణీ సదా ఓన ఛజకో కుణ్సీ సదా ఓరోకన్ కేల్దే కొని. ఉందేర్ ఛజకో సే ఉందేర్ సేర్ వేన్ ర.
33ఈజ్ కోని. అపొస్తల్ ఘణ్ జోరేతీ ప్రభూ ఛజకో యేసు మర్గేజేమాఁయితీ ఉటోకన్ గవాయి దీనె. దేవేర్ కృపా సేమా ఘణ్ వేన్ ర.
34జమ్మీవతోయిక ఘర్ వతోయి రజకో సే ఉందేన వేచన్, వేఛే జకో పిసాలాన్ అపొస్తలేర్ పగె కన మేల్తే ఆయె.
35ఓ హర్యేకేన ఓన ఓన చావజత్రా వేంట్దినే. జేతీ ఉందేమా కేనీసదా కాఁయి కమ్ నరజుఁ ర.
36కుప్రమా హుయొజకో లేవీర్ వలాదేవాళో యోసేప్ కజకో ఏక్ ర. ఏన అపోస్తలే వాళ్ జతాయెవాళో బేటాకన్ అరత్ దజకో బర్నబా కజకో నామ్ పాడ్మేలే. ఈ ఖేతారీవాళో వేన్ ర. ఊ ఓన వేచన్
37ఓర్ పీసాలాన్ అపొస్తలేర్ పగె కన మేలో.
Селектирано:
Acts 4: Lambadi
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2025, The Bible Society of India
All rights reserved