Mak 8
8
1Usen kiet, nte otu owo efen ekebohode, mmọ ikenyeneke se ediade, Jisọs ama okot mbet Esie, onyuñ ọdọhọ mmọ ete, 2“Mmokop mbọm eti eti mbaña otu owo emi, koro mmọ edu ye ami usen ita, ndien idiaha baba ñkpọ ndomokiet. 3Ndien edieke ndọhọde nte yak mmọ enyọñọ, ke mmennọhọ mmọ ñkpọ edia; isiọñ ọbiọñ eyenam mmọ esuhọ ke usuñ. Koro, ndusuk mmọ eto ata anyan ebiet.”
4Mbet Esie ema ebup Enye ete, “Mmọñ mi ke isọñ utatan ke idikut udia emi edikemde ndinọ ofuri otu emi?”
5Enye ama obup mmọ ete, “Mbufo enyene ebok uyo ifañ?” Mmọ ema ebọrọ ete, “Itiaba”. 6Ntre Enye ama ọdọhọ otu owo ete esuhọde etetie ke isọñ. Ntem ke Enye ekemen ebok uyo itiaba emi, ọkọm Abasi abaña mmọ. Obuñ mmọ ñkeñe ñkeñe onyuñ ayak mmọ ọnọ mbet Esie. Ndien mbet esie emen mmọ edeme enọ mme otu owo. 7Ema enyene ñkpri iyak ifañ, ntre ñko Jisọs ama ọnọ Abasi ekọm abaña mmọ emi, onyuñ ọdọhọ mbet Esie ete yak emen edeme enọ mmọ.
8Kpukpru owo ema edia enyuñ eyuhọ. Ndien ke oro ebede ema etañ mbeñe uyo emi ọkọyọhọde ọsuhọ ọyọhọ akpasa duopeba. 9Ñkpọ nte tọsin owo inañ ekedu ke itie udia oro, ndien Jisọs ama anam mmọ enyọñọ.
10Idaha oro, ke emi ama ekekure, Enye ama oduk ubom ye mbet Esie enyuñ ebe eka ke ñkanñkuk Dalmanuta. 11Mbon ñka mme Farisi ema editọñọ ndibup Jisọs mbume. Mmọ ekeyom ndidomo enye, do mmọ ema eyom eto Enye idiọñọ emi otode enyọñ.
12Enye ama asiama ko-o ke esit Esie onyuñ obup ete, “Ntaha emana emi eyomde utibe idiọñọ-ọ? Ntiñ akpanikọ nnọ mbufo nte idinọhọ enye baba idiọñọ kiet.”
13Ntre ke Enye akafiak okoduk ubom onyuñ adaha ọkpọñ mmọ ndien ewat ebe inyañ ekebehe ke mben ñkpọdiọhọ mmọñ eken. 14Edi mbet Esie ema efre ndida uyo efen ñkama ye mmọ mbemiso mmọ ekpọñ isọñ ndien mmọ ekenyene ebok uyo kiet kpọt ke ubom.
15Jisọs ama oduri mmọ utọñ ete, “Ekpeme eti eti kabaña ibọk ndom uyo mbon ñka Farisi ye eke Erọd.”
16Mmọ ema eneme ye kiet eken ete, “Enye etiñ ikọ emi sia ñnyin minyeneke uyo ndomokiet.”
17Jisọs ama ọdiọñọ abaña se mmọ ekenemede, ndien Enye ama obup mmọ ete, “Ntaha etiñde ebaña unana edinyene uyo-o? Nte mbufo ikemeke ndidioño? Nte esit mbufo ñko ọsọñ akaha ndidiọñọ? 18Mbufo emenyene enyin, edi etre ndida ñkut usuñ, enyuñ enyene utọñ, edi esin ndikop ikọ, mme nte mbufo ikemeke nditi baba ñkpọ ndomokiet?”
19Ke ini ñkọbọkde tọsin owo ition ye ebok uyo ition, akpasa mbeñe uyo ifañ ke mbufo eketañ ke ema ekedia udia ema? Mmọ ema ebọrọ ete, “Duopeba”.
20Ndien ke ini ñkebọkde tọsin owo inañ ye ebok uyo itiaba, ñyọhọ nsuhọ esie akawak adaña didie? Mmọ ema ebọrọ ete, “Akpasa itiaba”.
21Enye ama obup mmọ ete, “Nte isuk inwañake mbufo tutu emi?”
22Ke mmọ ema ekesim Betsaida, mme owo emen owo nnan esọk Enye enyuñ ekpe Enye ubọk ete otuk enye onyuñ anam udọñọ esie okure. 23Jisọs ama omum owo nnan oro ke ubọk onyuñ ada enye ọwọrọ ọkpọñ esit obio, ndien afiari etap eyet enye ke enyin onyuñ otuk enye ubọk ke enyin, ndien obup enye ete, “Afo emekeme ndikut ñkpọ ndomokiet idahaemi?”
24Owo oro ama ese akanade onyuñ ọbọrọ ete “lh. Mokut mme owo, edi mmọ etie nte mme eto esañade ekanade.”
25Ntem ke Jisọs akafiak odori ubọk ke enyin esie, ndien enye etim owuk enyin esie ese ñkpọ, enyin esie ama atara ọfọn, enye onyuñ okut kpukpru ñkpọ nte ọfọnde.
26Jisọs ama ọnọ enye ọnyọñ aka ufọk mmọ, onyuñ ọdọhọ enye ete, “Kufiak unyọñ uka ke obio.”
27Jisọs ye mbet Esie ema ekpọñ Kalili edaha eka ke mme obio emi ekedude ke Siseria Filipai. Nte mmọ ekesañade ke usuñ, Enye ama obup mmọ ete, “Mme owo edọhọ ete ke Ami ndi anie?”
28Mbet Esie ema ebọrọ Enye ete, ndusuk mmọ edọhọ ete Afo edi Jọn enim owo babtisim. Ndien mbio efen edọhọ ete ke Afo edi Elaiya, ndusuk ete kiet ke otu mme Asiak Uduak Abasi.
29Ndien Enye obup mmọ ete, “mbufo edọhọ ete Ami ndi Anie?” Pita ama ọbọrọ Enye ete, “Afo edi Kraist Andinyaña.” 30Edi Jisọs ama akpan mmọ ete ekutiñ enọ baba owo kiet ebaña Imọ.
31Ntem ke Enye ọkọtọñọ nditiñ nnọ mmọ, nte ke Eyen Owo enyene ndibọ ediwak nsio nsio ufen. Ndien ke mme ikpọ owo ufọk Abasi ye mme ikpọ oku Abasi ye mme ada ibuot ñka ukpono mme Ju eyesin Enye enyuñ ewot Enye, ndien ke Enye eyeset ke ñkpa ke ọyọhọ usen ita. 32Enye ama etim etiñ ikọ emi añwa añwa, do Pita ama ada Enye ọwọñọde ada onyuñ ọtọñọ ndisua nnọ Enye.
33Jisọs ama ọwọñọde enyin ese mbet Esie, onyuñ ọdọhọ Pita ke ata ọkpọsọñ uyo ete, “Setan da ke edem Mi. Afo ekere nte owo ekerede, edi idighe nte Abasi ekerede.”
34Ntem ke Enye okokot mbet Esie ye ofuri otu owo esaña ekpere, enyuñ ekpañ utọñ. “Edieke owo mbufo kiet ekededi oyomde ndidi mbet Mi, enye enyene ndikpọnọde kpukpru inemesit esie nnim ñkañ kiet ndien emen krọs esie odori ke afara onyuñ etiene Mi. 35Edieke owo ndomokiet akade iso oyom uwem esie, ọyọduọk enye; edi owo eke ọduọkde uwem esie ke ntak Mi ye ke ntak Eti Mbuk eyenyaña uwem esie.
36Ndien nso udori ke owo edibọ edieke enye adiade ofuri ererimbot ndien ọduọk uwem esie ke oruk usuñ oro? 37Mme, nso ke owo edinọ ke ndida ñkpuhọ ukpọñ esie? 38Ndien owo ekededi emi okopde but abaña Mi ye etop Mi ke mme usen emi ọyọhọde ye unana edinim ke akpanikọ ye idiọk ñkpọ, Ami, Andinyaña, ñyenyuñ ñkop but mbaña enye ke ini ndifiakde ndi kubọñ Ete Mi ye mme ndisana enjel.”
Селектирано:
Mak 8: OOÑE
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Biblica® Open Efik Living New Testament™
Copyright © 1995 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.