Mak 6
6
1Ke esisit ini ama ekebe Enye ama ọwọrọ ọkpọñ idut oro onyuñ asaña ye mbet Esie afiak ọnyọñ ke Nasaret, obio emana Esie. 2Ke usen ikọ Abasi mme Ju, Enye ama oduk ke ufọk ukpono Abasi mme Ju, onyuñ ọtọñọ ndikpep ñkpọ, ndien idem ama akpa ediwak mmọ emi ekekpañde utọñ enọ Enye. Mmọ enyuñ ebup ete, “Enye ada kpukpru mme ñkpọ emi oto mmọñ? Nso oruk ifiọk ke enọ Enye emi, emi Enye adade anam mme utibe ñkpọ!
3Nte idighe Enye edi eyen kapinta, emi Meri amande, eyen eka Jems, Josef, Judas ye Saimọn? Nte nditọ eka Esie iban ñko iduñọke mi ye ñnyin?” Ntre mmọ ema ekop idiọk esit ebaña Enye.
4Ntem ke Jisọs ọkọdọhọ mmọ ete, “Ekpekpono oku Abasi ke kpukpru ebiet, ke mibọhọke ke obio emana Esie, ye ke otu nditọ ete ye mbon esit ufọk esie.” 5Ndien okoto ke ntak emi mmọ mikenimke ke akpanikọ, anam Enye ikekemeke ndinam ediwak mme utibe idiọñọ ke otu mmọ ibọhọke ndidori mbon udọñọ ifañ ubọk ke idem ñnyuñ nnam mmọ ekop nsọñidem. 6Ama odu Enye ke ata ñkpaidem ndikut nte mmọ etrede ndinim ke akpanikọ. Ntem ke Enye ọkọwọrọ asaña ke mme obio iñwañ efen ndikpep ñkpọ. 7Ndien Enye okot kpukpru mme mbet Esie duopeba obon ọtọ kiet onyuñ osioño mmọ owo iba iba ọdọñ onyuñ ọnọ mmọ odudu ndibin mme ndedehe spirit nsioño. 8Enye ama ọnọ mmọ uyo ete, “Ekukama ñkpọ ndomokiet ke isañ mbufo ibọhọke esañ, ekukama uyo, ekpat, mme okuk ke mme ekpat mbufo. 9Esine ikpaukot ke ukot mbufo, edi ekukama ukpuhọ ọfọñ ndomokiet.
10Enye ama ọdọhọ mmọ ete, Ufọk ekededi emi edidukde edu do tutu mbufo ekpọñ obio oro. 11Ndien ke ebiet ekededi ke obio emi mme owo minyimeke ndidara mbufo, minyuñ imaha ndikpañ utọñ nnọ mbufo, ekeñ ntan ikpat mbufo ebon do ke adaña ini nte mbufo ekpọñde mmọ. Oro eyedi idiọñọ nduri utọñ ọnọ mmọ.”
12Ntre ke mbet esie ekewọñọ eka, eketiñ enọ kpukpru owo emi mmọ ekekutde ete yak mmọ ekabade esit ekpọñ idiọkñkpọ. 13Ndien mmọ ema ebin ediwak ndedehe spirit esioño enyuñ ekọk ediwak mbon udọñọ ndien eyet mmọ aran ke ibuot.
14Ikebighike edidem Erọd ama okop abaña Jisọs, koro ema etiñ ebaña mme utibe idiọñọ Esie ke kpukpru ebiet. Edidem ekekere ete ke ekedi Jọn enim owo babtisim akafiak eset ke ñkpa. Ntre ke mme owo ekedọhọ ete, “Imosuk ise nte Enye ekemede ndinam kpukpru mme utibe ñkpọ emi.” 15Ndusuk mme owo ema edọhọ ete ke Jisọs ekedi Elaiya, akwa prọfet Abasi eke eset, ndien idaha emi, Enye afiak eset odu uwem, edi ndusuk esuk eka iso eda Enye nte obufa prọfet Abasi emi etiede nte ñkani mme prọfet Abasi eke eset.
16Ke ini Erọd okokopde emi enye ama ọdọhọ ete, “Jọn, owo emi ñkesibede ibuot. Enye eset ke ñkpa ọtọñọ ntak odu uwem.”
17Erọd ke idem esie ọkọnọ uyo ete yak emum Jọn ebọp enyuñ esin enye ke ufọk ñkpọkọbi. 18Koro Jọn akasuade ọnọ enye ete ke ifọnke enye ndidọ ñwan eyen ete esie, Filip. 19Erọdias ama oyom ndiwot Jọn ke usiene, edi enye ikekemeke, sia Erọd mikenyimeke ewot enye. 20Ndien Erọd ama okpono Jọn eti eti koro enye ọkọdiọñọde ete ke enye ọfọn onyuñ edi edisana owo ndien ntre enye ama onim enye ke idak ukpeme esie. Ekikere esitimede Erọd ini kiet ekededi emi enye esikopde uyo Jọn, edi okposuk edi ekedide ntre, enye okosuk amama ndikpañ utọñ nnọ ukwọrọ ikọ esie ke inemesit.
21Ke akpatre, Erọdias ama enyene usuñ esie. Ekedi ke ini usọrọ emana Erọd, enye akanam usọrọ ọnọ mme ikọt ufọk esie, ikpọ mme etubom mbon ekọñ ye ikpọ mme ọwọrọ iso nditọ isọñ ke Kalili.
22Eyen Erọdias, ñwan, ama oduk edi, onyuñ enek unek ke usuñ emi ekenemde Erọd ye mme isenowo esie esit eti eti, anam edidem ama ọdọhọ enye ete, “Beñe mi ñkpọ ekededi emi oyomde, ndien ami ñyenọ fi.” 23Enye ama ọsọñọ ọñwọñọ ete, “ñkpọ ekededi emi edibeñede, ñyenọ fi, ekpededi ubak obio mi ñkañ kiet.”
24Enye ama ọwọrọ okobup eka esie ete, “Nso ñkpọ ke ñkpebeñe?” Enye ama ọbọrọ enye ete, “Ibuot Jọn enim owo babtisim.”
25Enye ama ọsọp idem inikiet afiak ebine edidem onyuñ ekebeñe ete, “Ñyom ọnọ mi ibuot Jọn enim owo babtisim idaha emi ke akwa.”
26Ntem ke Edidem ọkọfuhọ ke esit esie, edi but ama anam enye ndibiat uñwọñọ esie ke iso mme isenowo esie. 27Ntre ke enye ọkọdọñ kiet ke otu mbon ekọñ esie ete aka ke ufọk ñkpọkọbi ekesibe ibuot Jọn emen ọsọk imọ. Owo ekọñ oro ama okowot Jọn ke ufọk ñkpọkọbi, 28ndien ama ada ibuot Jọn edi ke akwa, ediyak ọnọ eyenañwan emi, ndien enye ama emen enye ọsọk eka esie.
29Ke ini mme mbet Jọn ekekopde se iketibede emi, mmọ ema ekemen okpo esie ekebuk ke udi.
30Mbet Jisọs duopeba ke idaha emi ema enyọñ isañ ukwọrọ ikọ mmọ edi, ndien ebine Jisọs enyuñ ekesian enye se mmọ ekenamde ye se mmọ eketiñde enọ mme owo ekededi emi mmọ ekesobode.
31Ntem ke Jisọs akanam ekikere ete, “Eyak ñnyin ikpọñ otu owo esisit ika ikọduọk odudu.” Koro ediwak ke ededi, enyuñ enyenyọñọ, ndien baba ifet ndomokiet iduhọ inọ ñnyin ndidia ukpọk udia. 32Ntre ke mmọ ekeduk ubom ewat ewọrọ eka ebiet emi uyom miduhe. 33Edi ediwak owo ema ekut nte mmọ edahade, ndien mmọ ema efeñe obot obot ebe ke mme obio ke mben inyañ ebem mmọ iso ekesim ebiet emi mmọ ekekade. 34Ntre ke akwa otu owo kpa nte ido esidide, ekeda do ebet mbemiso Enye ọwọrọ ke ubom. Ndien Enye ama okop mmọ mbọm koro mmọ ekebietde mme erọñ eke minyeneke andikpeme. Enye ama ekpep mmọ ediwak ñkpọ emi mmọ ekeyomde ndidiọñọ mbaña.
35Edi ke ini akade ko, mme mbet Esie ema eka ebine Enye enyuñ ekedọhọ Enye ete, “Ebiet emi edi isọñ utatan, ndien ini ababiara. 36Dọñ mme owo emi eka ke mme ñkpri obio emi ekperede ye mme obio iñwañ, ekedep se mmọ edidiade.”
37Edi Jisọs ama ọdọhọ mmọ ete, “Mbufo ke idem mbufo enọ mmọ ñkpọ edia.” Mmọ ema ebup Enye ete, “Nte ñnyin inyene ndika ñkedep udia ke bọn ikie iba nda ndinọ mmọ emi edia?”
38Jisọs ama obup mmọ ete, “Udia emi ñnyin inyenede awak didie? Eka ekeduñọde efiọk. Mmọ ema efiak edidọhọ Enye ete ke edi uyo ition ye iyak iba.” 39Ndien Jisọs ama ọdọhọ mbet Esie ete yak enam mme owo ebahade idem mmọ esin ke otu, ke otu, enyuñ esuhọde etetie ke awawa mbiet. 40Ndien mme owo ema etetie ke udim, owo ikie ikie, ye aba ye duop aba, ke otu ke otu. 41Enye ama emen ebok uyo ition emi ye iyak iba, ndien Enye ama emenerede enyin Esie ese enyọñ, ọnọ ekọm onyuñ obuñ mme uyo odo. Enye ama emen ọnọ mbet Esie edeme enọ otu owo. Enye ama onyuñ edeme iyak ọnọ kpukpru mmọ ñko. 42Ndien kpukpru owo oro ema edia udia eyuhọ.
43Ndien mme mbet ema etañ mme mbeñe uyo ye eke iyak ọyọhọ akpasa duopeba. 44Ekedi tọsin irenowo ition ekedia udia oro.
45Ndo ndo oro ke ñkpọ emi ama ekebe, Jisọs ama ọdọhọ mbet Esie eduk ke ubom, ebem Enye iso ewat ebe inyañ eka ke Betsaida, ke ini Enye ke idem Esie enyenede ndisuan otu owo ñnyuñ nnam mmọ enyọñọ.
46Ke Enye ama akanam mmọ enyọñọ, ekem Enye ama adaha aka ke obot ndibọñ akam. 47Ke usuhọde mbubreyo, ubom okodu ke ufọt ñkpọdiọhọ mmọñ, ke ini Jisọs ọkọsuhọde ikpọñ ke obot. 48Ndien Enye ama okut ete ke mmọ ekedu ke ata akamba afanikọñ, ke emi ofum ọkọwọrọde ọbọi iso mmọ ke enyuñ eñwana ye ofum ye mbufit mmọñ inyañ ibom. Edi ke ñkpọ nte ñkanika ita usenubọk, Enye ama asaña ke enyọñ mmọñ oyom ndibe. 49Edi ke ini mmọ ekekutde Enye asañade ke enyọñ ñkpọdiọhọ mmọñ mmọ ema efiori ke ọkpọsọñ ndik koro mmọ ekekerede ete ke Enye ekedi ekpo. 50Koro kpukpru mmọ ema ekut Enye, ndien ndik ama anam mmọ eti eti. Ke ndo ndo oro Jisọs ama ọdọhọ mmọ ete, “Esọñ esit, edi Ami. Ekufehe ndik.” 51Ndien Enye ama asaña ọkọdọk oduk esit ubom ndien mbufit inyañ odobo ana suñ-ñ. Mme mbet Esie ekedu ke ata ñkpa idem, 52koro mmọ mikọfiọkke se idiọñọ mme eboho uyo oro ọkọwọrọde, koro ikike mmọ okosuk odude ke ekim.
53Ke ini mmọ ema ekedibehe ke Kenesaret, ke mben inyañ eken, mmọ ema eyiri ubom mmọ do ke esuk. 54Mmọ ekenyuñ ewewọñọ ke ubom edọk obot, mme owo emi ekedade ekanade do, ema ediọñọ Jisọs ini kiet. 55Ntre mmọ ema efeñe ekanade ofuri ñkanñkuk oro, enyuñ emen mme mbio udọñọ ke mme mbri mmọ eka ebiet ekededi emi mmọ ekekopde ete Enye odu. 56Ebiet ekededi emi Enye akakade ke ñkpri ye mme ikpọ obio, ye ke obio iñwañ, mmọ ema ekebon mbon udọñọ ke mme añwa urua ye mme efak obio, ndien ekpe Enye ubọk ete yak Enye ayak mmimọ ikam itotuk mben ọfọñidem Esie ndien adaña ediwak mbon udọñọ emi eketukde mben ọfọñidrm esie ema ekop nsọñidem.
Селектирано:
Mak 6: OOÑE
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Biblica® Open Efik Living New Testament™
Copyright © 1995 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.