Isáak 3
3
Panɔ́ nuónyonyée, ɛ́nuɛtíkɛ́n pilémbi píánɔ́
1Paandimán, nutipísukún panɔ́ peem ó kuónyonyi, á kiákí ɛ́ɛ́: pasɔ́ epé tuónyonyée, isɔ́ɔ́sɔ yáásɔ́ áányípá pukaaka kutápɔk pɔsɔ́k pólotí. 2Tuápínanan puólíkóoli pasɔ́ peem. Índɛ mɔɔnd tipá upínanan kisikɛl ukálanɛ́ɛ, ukáánɛ́ nyɛ indɛ́ndɛ́nɛ, weékendesi nuɔ́l núɛ́yɛ́ peseé. 3Índɛ tuákáákan nuolí é niít ní pikapílɛ́ ɛ́ɛ́ pítúɔ́pinɔn, tuákaand kuendesi tuɔ́l tú pɛ́ɛ kitikit. 4Ónuyoósín pesitíme, tɛ aná pɛ́nyɛɛ́ piandákáand imfúnu siikɔ́n tíítiken pɔ́, nɔ muɔ́nɔ́ u nuɛyɛ okóókí sitíme éndesié pɔ́ na núu páyuukan kɔɔ́mɔ kitikit wɔɔyɔnɛ́ɛ. 5púnyɛ pilɔŋ pímoómí ne kilémbi, kínyɛ muɔ́nɔ́ u pulááŋ ɔ́ nuɔ́l, maná ɛ́nuɛ́nɛ́ aná kíkɔ́lɔnɛ́ɛ nuúmu á maandá kutek. Ɔ́nukɔ́l pulinsí é kilémbi kí yiik, kíápian pukaaka pú kupiki kiandákáand kí putíɛ́púlɛ́ɛ. 6Kilémbi nyɛ imfúényée elɛɛ́ yiik; kínyɛ kilɔk kí puandá punyɛɛ́ káásɔ́ ɔ́ tuɔ́l, kíenyúkuse tuɔ́l túásɔ́ kitikit. Kí kíákanɛ́ yiik káásɔ́ kuetúm káásɔ́ é nupién kuám é niku yiik yɛ́ɛ́yɛ́ óókoólinon ké eŋulúm ú punyím wɔ́ muɛ́t. 7Mɔɔnd áápian pukaaka ɛ́ɛ́ manyam mɛ́ putíɛ́púlɛ́ɛ, mononí méélekenenée, muɔpɔ́ nɔ mɔnyɔ́ki kitikit nyɛɛ́ kuɔ́pinɔn wɔ. 8Maná, mɔɔnd tipá na pukaaka pú kuɛtikɛn kilémbi kíɛ́yɛ́ kíɔ́pɛn wɔ. Unyɛ ɔkɔnɔ́ útiányípá na puanyɛ́, kíépíeyen á siki kisikilɛ, kínyɛ kiwóónón ni ilɔk í niku. 9Tuékúmesi Ɔkɔ́n waasɔ́ ne Síí waasɔ́ ne kilémbi, na kíi andíkɛ́k tunyɔmɔnɛ́ pɛɛnd epé Támbák maáluŋá kɛ́ɛ́yɛ́ kí imfúényée. 10Paandimán, pútipá púɛ́sikɛɛnɛn kupá nɔ́ ɛ́ɛ́ ɛ́ niɛ́tɛ niít táŋ nimoómí kipínúúne ni inyɔmɔ ááminan kɔ́ɔk. 11Yiíyi ékeémenyi moomb mé peseé na má kunua? Pútipá kupíɛl. 12Paandimán, puɔ́tɔ nyɛ púkuóm piyoyó kúnyaánɛ pusumbú óóm iŋɔŋɛ́ á? Yiíyi í masɔk tipá pékuémi moomb maatámb.
Tutátɔ́ tuólinonée mɛnɛ́mɛnɛ́ɛ
13Ewú unyɛɛ́ atátɔ́tatɔ kúnyaánɛ ne meéne káánɔ́ ɛ́ kikɛtɛ́kɛtɛ́ɛ ɛ́ɛ́kɛɛsikɛnɛn kutíínyi tutátɔ́ ne meéne mɛ́ɛ́yɛ́ ɔ́ kusɔ́t kuutámb. 14Maná índɛ nunyɛ powóónón ɔtɛ́m na yaák ne kiliínditíe kí imbimísán, nutiandá ɛ́pímɛlɛt ɛ́ɛ́ nunyɛ na tutátɔ́, nutiandá eséésitenyi kémuémue na pisupɔ́ píánɔ́. 15Nunamá nú tutátɔ́ nukáánɛ́ tipá núólinon mɛnɛ́mɛnɛ́ɛ; núnyɛ enú núólinonée akɛ e kúúsí, nunyɛ nú pɛɛnd, núókoólinon ku sáátan. 16Á kiákí ɛ́ɛ́ kɔɔ́mɔ yaák ni imbimísán nyɛɛ́, kɔ́ɔk kipueŋitenye na tunamá tú kilɔk nyɛɛ́. 17Maná tutátɔ́ tú mɛnɛ́mɛnɛ́ɛ nyɛ kati kipalalá kisíósíó, tuókoólon ne kiyeéwe nɛ lɛpɛlɛpɛ ɛ́ɛ́ ɛ́ kikɛtɛ́kɛtɛ́ɛ kí pɛɛnd túond túamba kipílatɛ; tuwóónón nɛ niɛ́nɔsúkɛ tuómo pinɔ́k pí masamɔ́, tútipá túpianan insala, tútipá ni iŋɔsikɔ. 18Epé páákanɛ́ɛ kiyeéwe kɔ́ɔ́p ɛ́ mɛɛŋɛ́l épuenené kiyeéwe, niok níɔ́p nyɛ kusɔ́t kú indɛ́ndɛ́nɛ.
Селектирано:
Isáak 3: yav
Нагласи
Копирај
Спореди
Сподели
Дали сакаш да ги зачуваш Нагласувањата на сите твои уреди? Пријави се или најави се
© 2026, CABTAL