Ichedendik 11
11
Ẹnyạng ch'egor-ogoru k'Babẹl
1Wa anạng ma ọyagbin phyibh akhaam efon jạnẹ, abẹ abạra akpaak udik gwạnọ. 2Masẹ anạng n'asenga afona k'ukhubha kw'okpebhadudon n'uyin, abẹ akwu ase ibyi s'isi ẹkpẹmẹ k'ukhubha kw'Shina, abẹ atima sẹ asi uruk kwabẹ.
3Ma wọ abẹ n'abeni ayok bẹ́, “Tte ambạnga idọhngọ k'apyi k'apyi, anyaan sẹ tạrr asẹ igwu, ikpọhkhọ bẹ́ geng.” Ma wọ abẹ abạng adọhngọ-pyi p'abẹ atim atera ata p'ọchọhm, ọttạra k'ana p'abạng-ọbạnga, p'apyi bẹ́ kkạạng, atima atera idọhngọ idwukhasẹ. 4Ma wọ abẹ abeni bẹ́, “Akwu ansi efhon-diden, ambạra ansi ẹnyạng ch'egoru bẹ́ kotooong, tạrr ikpira k'ọrạngkpaang, annạng amạna mba oyeni, deja, m'anwena-owena ma ọyagbin e.”
5Ma wọ Ọvaar Ubinọkpaabyi ọsạk ukwu ose ofhon ngwọ, ọttạra ẹnyạng-gorada ch'ayokhanạng n'asi. 6Ọvaar Ubinọkpaabyi oben bẹ́, “Mạma ttạng, yeyema sabẹ atim ade ẹkhạma jạnẹ, p'n'akpaak efhon jạnẹ, abẹ asi ọttọhk demapfẹ mva, kw'uyini bẹ́, ọttọhk f'abẹ akhạmọ bẹ́, abẹ asi, f'abẹ n'mákke asi kòde. 7Akwu ansạkha anta ampfura efhon chabẹ, ọfha abẹ nạngẹ adạkhẹ ayok abhaang.”
8Ma wọ Ọvaar Ubinọkpaabyi usi anạng mbọ awena k'ibyi sidede ma ọyagbin, ọbạra ukuma bẹ efhon-diden njọ sisi. 9Ẹgwọ usi abẹ ayeri ibyi nnọ Babẹl#11.9 Babẹl ọbạra okpena Babilọn, okhenka, k'eHiburu, Babẹl iyini ọttọhk masẹ, dạdạma., ukwuru bẹ́, ma ibyi nnọ rọ s'uwa Ọvaar Ubinọkpaabyi ufhuru mfhon s'ọyagbin phyibh. Tạma mạma wọ kw'Ọvaar Ubinọkpaabyi upfhuru bẹ, abẹ atạma wạwena abaabha ọyagbin.
Ẹnạmma ch'Shẹm
10Maa wọ ode ẹnạmma ch'Shẹm.
K'icho ifa s'kk'isenga s'asi achi ọyagbin, k'okpe kw'Shẹm n'ode icho arạbh asen, ma wọ ofhonu Arphaksad. 11Masẹ kk'Arphaksad ofhona, wa Shẹm ọbạra uruk icho ẹnọhna ukuma arạbh asen, ọbạra ofhon ajunungva ọttạra apanạngva adwạkh-ọdwạk.
12Masẹ Arphaksad ode icho ẹrạbh ukuma chi, ofhonu Shẹla. 13Masẹ kk'Shẹla ofhona, wa Arphaksad ọbạra uruk icho ẹnọhna ukuma ittaan, ọbạra ofhon ajunungva ọttạra apanạngva adwạkh-ọdwạk.
14Masẹ Shẹla ode icho ẹrạbh ukuma jobh, wa ofhonu Ẹbẹr. 15Masẹ kk'Ẹbẹr ofhona, wa Shẹla ọbạra uruk icho ẹnọhna ukuma ittaan, ọbạra ofhon ajunungva ọttạra apanạngva adwạkh-ọdwạk.
16Masẹ Ẹbẹr ode icho ẹrạbh ukuma sọnaachi, ofhonu Pẹlẹg. 17Masẹ kk'Pẹlẹg ofhona, wa Ẹbẹr ọbạra uruk icho ẹnọhna ukuma arạbh jobh, ọbạra ofhon ajunungva ọttạra apanạngva adwạkh-ọdwạk.
18Masẹ Pẹlẹg ode icho ẹrạbh ukuma jobh, ofhonu Rewu. 19Masẹ kk'Rewu ofhona, wa Pẹlẹg ọbạra uruk icho arạbh jobh ukuma sọwạnọ, ọbạra ofhon ajunungva ọttạra apanạngva adwạkh-ọdwạk.
20Masẹ Rewu ode icho ẹrạbh ukuma jobh-kamfa, ofhonu Serug. 21Masẹ kk'Serug ofhona, wa Rewu ọbạra uruk icho arạbh jobh ukuma isenọfa, ọbạra ofhon ajunungva ọttạra apanạngva adwạkh-ọdwạk.
22Masẹ Serug ode icho ẹrạbh ukuma jobh, ofhonu Nahọr. 23Masẹ kk'Nahọr ofhona, wa Serug ọbạra uruk icho arạbh jobh, ọbạra ofhon ajunungva ọttạra apanạngva adwạkh-ọdwạk.
24Masẹ Nahọr ode icho ẹrạbh ukuma sọwạnọ, ofhonu Tẹra. 25Masẹ kk'Tẹra ofhona, wa Nahọr ọbạra uruk icho arạbh asen ukuma sọnẹrạbh, ọbạra ofhon ajunungva ọttạra apanạngva adwạkh-ọdwạk.
26Masẹ Tẹra ode icho arạbh attaan ukuma jobh, ofhonu Abram, ọttạra Nahọr, ọttạra Haran.
Ẹnạmma ch'Tẹra
27Maa wọ ode ẹnạmma ch'Tẹra. Tẹra ofhonu Abram, ọttạra Nahọr, ọttạra Haran. Haran ọbạra ofhon Lọt. 28Wa Haran ope, urik otte. Ma okpe ngwọ, wa abẹ aning k'Ur, k'ukhubha kw'abạKaldi, kw'ode ofhon kw'uwa Haran ọmmaan.
29Wa Abram ọttạra Nahọr atạk ipanạng. Ikwanạng kw'Abram okpen Sarai, kw'Nahọr okpena Milka. Milka ọkhaam nnwọkka kw'okpen Iska, Haran wọ wa ofhonu bẹ anạng afa. 30Okhenka, Sarai wa ode ujidim, nnwa nọ́maana.
31Wa Tẹra ọtạk Abram kw'ode nnwa kwẹ, ọttạra Lọt, kw'ode nnwa kw'Haran, ọttạra Sarai, kw'ode ikwanạng kw'nnwa kwẹ, Abram, abẹ abina osenga afona k'ukhubha kw'Ur kw'aKaldi, ọfha abẹ afona k'ukhubha kw'Kenaan. Okhenka, masẹ abẹ aseng akpira k'Haran, abẹ n'akpong ma aruk ma.
32Wa Tẹra ope ma Haran s'ode icho arạbh jobh ukuma asen.
Селектирано:
Ichedendik 11: mfn-x-os
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
©️2025 West Africa Christian Mission