Romanji 1
1
1Pavlu, huzmichear al Hristolu Isus, acljimat tra s-hibã apostul sh-aleptu trã evanghelu al Dumnidzãu. 2Aestu evanghelu tsi Dumnidzãlu u tãxi ma-nãinti prit prufitsilji a lui tu Sãmtili Scrituri, 3ti Hiljilu a lui, nãscut dit fara al David dupã trup, 4tsi s-arãdãpsi Hiljiu al Dumnidzãu tu puteari dupã Duhlu Sãmtu prit nyearea dit mortsã, Isus Hristos Domnul a nostru. 5Prit nãsu noi avem loat har sh-apostulii, trã adutseari ascultarea a pistiljei ntru tuti fãrili trã numa a lui, 6la cai hits sh-voi acljimatslji al Isus Hristos.
7Vã scriu a tutulor tsi hits Roma, vruts di la Dumnidzãlu, acljimats tra s-hits sãmtsã:
Har sh-pace a voauã di la Dumnidzãlu, Tatãl a nostru sh-di la Domnul Isus Hristos.
Vrearea al Pavlu trã Vizitari Roma
8Nãinti di tuti hãristisescu Dumnidzãlu a meu prit Isus Hristos trã tuts voi, cã pistea a voastrã ma s-hãbãrseashti tu tutã lumea. 9Dumnidzãlu, a cui lji huzmitipsescu cu duhlu a meu prit evanghelu a Hiljilui a lui, easti martirlu a meu cã cum mini nidãnãsit vã aduc aminti, 10tu rugãciunjili a meali totãna spigiurãnda cã, vahi tora tu soni va nji si fac ambarã prit vrearea al Dumnidzãu s-yinã la voi. 11Voi multu s-vã ved tra s-mpartu cu voi vãrã doarã duhuroasã tsi voi s-vã nvãrtushits, 12tra s-nã inimusim deadun cu voi, prit pistea a unui-alantu, pistea a voastrã sh-a mea.
13Voi s-shtits, frats sh-surãri a meali, cã di multi ori aveam tu minti s-yineam la voi tra s-aveam vãrã frut shi ntrã voi ashãtsi di cum am avut shi ntrã alti fãri, ma pãnã tora fui nchidicat. 14Mini lj-mprumutedz a gretsilor sh-a barbarilor, a shtiutslor sh-a nishtiutslor. 15Ashãtsi, ti cãt si spindzurã di mini, escu etimu s-vã dimãndu evanghelu sh-a voauã tsi hits Roma. 16Cã mini nu am rushini di evanghelu, cã elu easti putearea al Dumnidzãu trã ascãparea a cathiunui cai pistipseashti, ma nãinti Iudeu sh-apoea Pãngãnlu. 17Cã ndriptatea al Dumnidzãu easti aspusã tu nãsu dit pisti tu pisti cum easti scriatã: “Ndreptul va bãneadzã prit pisti.”#Hab 2:4.
Inatea al Dumnidzãu cu Oaminjlji
18Cã inatea al Dumnidzãu s-discupireashti dit tser pri tuti nidumnidzãsirili sh-nindriptãtsili a oaminjlor tsi neacã alihea cu nindriptãtsili a lor, 19cã atsea tsi poati si s-cunoascã di la Dumnidzãlu easti aspusã tu elji, cã Dumnidzãlu lã u-aspusi a lor. 20Ashãtsi, calitãtsili a lui atseali nividzutili, fuchia a lui di daima sh-natura a lui dumnidzãsitã, hinda vidzuti prit faptili a lui di cu adrarea a lumiljei, s-veadã curatã cã oaminjlji s-hibã discãbãtitsã. 21Cã, cu tutã cã-l cunuscurã Dumnidzãlu nu-l multumãrirã sh-nu lu hãristisirã ca Dumnidzã, ma s-featsirã fãrã minti tu minduirili a lor sh-inima a lor nisãmtsãtã si scudisi. 22Dzãcãnda cã suntu mintimenji, agiumsirã glari. 23Elji u-alãxirã mãrirea a Dumnidzãlui nimuritor cu undzita a icoaniljei a unui om muritor, a puljilor, a prãvdzãlor cu patru cicioari sh-a azvãrnãtoarilor. 24Trã atsea Dumnidzãlu lji alãsã atselji tu orixili a ininjilor a lor tu lãvushituri tra si s-pãnĝãneascã trupurili a lor cu un-alantu. 25Elji alãxirã alihea al Dumnidzãu tu arãdeari sh-alãvdarã sh-lji huzmitipsirã a adãrãturiljei, andi s-lji huzmitipsea a Adãrãtorlui, tsi easti ghinicuvintat di totãna. Amin!
26Trã atsea, Dumnidzãlu lji alãsã atselji tu orixi arushinoasi, cã sh-muljerili a lor li alãxirã relatsili a lor naturali tu atsea tsi easti contra di natura. 27Tut ashã sh-bãrbatslji, alãsãnda relatsili a lor naturali cu muljerili, s-apreasirã tu orixili a lor cu un-alantu. Adrãnda lucri arushinoasi bãrbats cu bãrbats, loarã cu nãshi arãsplata tsi prindea trã cãbatea a lor.
28Metsi elji nu vidzurã ca ndreptu s-cunushtea Dumnidzãlu, aestu li alãsã tu unã minti zurlã, trã fãtseari lucri tsi nu prindi si s-fac. 29Elji suntu mplinji di itsi nindriptati, arãutati, nifãntiri sh-arali, mplinji di nchizmã, vãtãmãri, ngrãnji, ilei, arãu-fãcãturi, munaficlãchi, 30cacuzburãtori, aurãscu Dumnidzãlu, violenti, pirifanji, alãvdãtori, masturi di arãutãtsi, niascultãtori di pãrintsã, 31nipututs trã achicãsiri, nipistimenji, fãrã di vreari, fãrã di njilã. 32Elji cu tutã cã cunuscurã dimãndarea atsea ndreapta al Dumnidzãu, cã atselji tsi fac ahtãri lucri hãrzãeascã moartea, nu mash cã li fac atseali, ma dau sh-ndriptati la atselji tsi li-adarã.
