मत्ती 28
28
यीशु दुबारी जीण
मरकुस 16:1-8; लूका 24:1-12; यूहन्ना 20:1-10
1भक्ति करणे रोज केआं पता, हफ्ते पेहलकण रोज पथवारी ईं मगदला ग्रांए मरियम त दोकी मरियम यीशु लाश रखो कुड हेरण जे पुजी। 2त अजगता यक बोडा भुंजल गा, स्वर्ग केआं प्रभु यक दूत आ, कुडे मुंहे पठ उघाड़ कइ तेस पुठ बिश गा। 3तसे रूप बिजली ईं चमकताथ त झिणे डंगे ईं हच्छे थिए। 4तेस हेर डर कइ पेहरेदार मरो मुड़दे ईं भोई गे। 5पर स्वर्गेदूते तेन्हि जिल्हाणु जे बोलु, “डरे नउ! मोउं पता असा कि तुस यीशु तोपुण लगो असी, जे क्रूस पुठ मरो थिआ। 6से इठि नेईं, पर अपु वचने हिसाब जोई दुबारी जी गो असा। एईए, हेरिण दिए, जेठि प्रभु रखो थिआ। 7तोउं झठ घेई कइ यीशु चेली जे बोले कि से मरण केआं दुबारी जी गो असा त तुसी केआं पेहलाई गलील राज्य जे घेण लगो असा। तठि तुसी से केता। हेरे! मेईं तुसी जे बोल छउ।”
8से डरो बि थी त खुश बि। तोउं कुड केआं दौड़ कइ तसे चेली समाचार देण जे गई। 9त अचानक यीशु तेन्हि मेईंया त बोलु, “होर ठीक असी ना, तुस”? तेन्हि भेएड़ एई कइ उटेऊ तसे खुर बिने त गुणगान किआ। 10तोउं यीशु तेन्हि जे बोलु, “डरे नोउ! घेई कइ में भाई जे बोले कि तुस गलील राज्य जे एई घिए। तठि अउं तुसी जोई मीता।”
पेहरेदारी के झुठी खबर
11से घेण लगो थी कि पेहरेदारी अन्तरा केनि शेहर घेई कइ मुख्य पुजारी पूरा हाल शुणाई छड़ा। 12तोउं तेन्हि पुजारी त टजे स्याणे ब्योरा कर कइ तेन्हि सपाही कें धे सुआ रुपेई दिते त बोलु, 13“तुसी ईं बोलुण कि ‘रात जपल अस उंघो थिए, तसे चेली एई कइ तसे लाश चोरी कइ नी छड़ी।’ 14अगर ए बोक राज्यपाल पिलातुस केईं पुजियेल, त अस तेस समझान्ते त तुसी बचाई छते।” 15तोउं तेन्हि रुपेई नीए त जीं शिचालो थिउ, तीं किउ। ए झुठी बोक आज तकर बि यहूदी मेह्णु के बुछ चलो असी।
यीशु निछिटि निआंग
मरकुस 16:14-18; लूका 24:36-49; यूहन्ना 20:19-23; प्रतिनिधि 1:6-8
16त से ग्याराह चेले गलील राज्ये तेस फाट पुठ गे, जेठि घेण जे यीशु तेन्हि जे बोलो थिउ।#मत्ती 26:32; मरकुस 14:28 17जपल तेन्हि तसे दर्शण भुओ, त तेन्हि तसे खुर बिन कइ अराधना की। पर केसे केसे शक बि भुआ। 18यीशु तेन्के भेएड़ एई कइ बोलु, “स्वर्गे त धरती सोब हक मेन्धे दुतो असे। 19तोउं त तुस घिए, सोब जाति मेह्णु चेला बणाए, त तेन्हि बोउए, कोईये त शुची आत्माई नओएं बेलि पाणि अन्तर चुसीण दिए। 20होर जे जे निआंग मेईं तुन्धे दुतो असी, तेन्हि सोब मनण जे तेन्हि शिचालिण दिए। शुणे, अउं मतोके मुकुण तकर तुसी जोई साते असा।”
Селектирано:
मत्ती 28: pgg
Нагласи
Сподели
Спореди
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2023 (Active) Wycliffe Bible Translators, Inc. All rights reserved.