Génesis 3
3
Bëbu ꞌimainun xanu Diosan kakësabi oi ꞌisama tani ꞌitabati ꞌucha bana
1Nukën ꞌIbu Diosan uniokë bëtsi ñuina raëkëma kamasamaira ka runu ꞌiakëxa, usa ꞌixun ka xanu ñukákëxa:
—¿Asérabi kara Diosan i bimi naësa ënu ꞌikëkama ënë pixunma anun mi kax? 2Kakëxun ka xanun kakëxa:
—Bëtsi i bimibi naësanu ꞌikë kananuna piti ꞌain, 3ꞌaínbi kananuna naësa nëbëtsi ꞌikë i bimi ashi pitima ꞌain. Diosan ka a i bimi pixunma ꞌanan mëxunma ꞌanun a pibi isanuna bamati ꞌai kixun nu kaxa. 4Kakëxunbi ka runun xanu kakëxa:
—Ama, usama ka kamina bamatima ꞌain. 5Diosan ka upíokin ꞌunánxa uisa nëtën kaina a i bimi pi a nëtënbi kamina mitsux sinánñuira ꞌixun uisa ñu kara upí ꞌikë ꞌunánan uisa ñu kara upíma ꞌikë, aribi ꞌunáni asaribi ꞌiti ꞌain.
6Usakin kakëxun ka xanun a bimi kuisa, upíira upí ꞌikë isakëxa, a piax sinánñuira ꞌisa iskin ka anun kuëënkin xanun i bimi biakëxa. I bimi bixun kukin, ka aín bënëribi ꞌinánkëxa. ꞌInánkëxun ka anribi piakëxa. 7Pikinshi ka a rabë́xunbi chupañuma kananuna ꞌai kixun sinánkëxa. Usai ꞌikin ka chupañuma ꞌixun higo kakë i pëi xëokëxa, xëotankëx ka a rabëtaxbi anun tsitatakiakëxa.
8Usakë a xupibukëbëtan ka bëbu ꞌimainun xanun Nukën ꞌIbu Dios bari kuainakëkëbëa suñu bëkikëbë nitsia kuakëxa, kuati ka uni aín xanubë abákiani kuanx naësanu ꞌikë ikama tanain unëakëxa. 9ꞌAínbi ka Nukën ꞌIbu Diosan kuënkin uni kakëxa:
—¿Uinu kaina ꞌain? 10Kakëxun ka unin kakëxa:
—Mi kana naësa nëbëtsi nitsia kuan, usa ꞌaish kana chupañuma ꞌaish rakuë́ti unëa. 11Kakëxun ka Nukën ꞌIbu Diosan ñukákëxa:
—¿Uin kara chupañuma kamina aín kixun mi kax? ¿Karamina a pixunma ꞌanun ꞌën mi kakë i bimi a pikëma ꞌain? 12Kakëxun ka unin kakëxa:
—Minmi abë ꞌinun ꞌinánkë xanu ënën ka i bimi ꞌë ꞌinánxa, ꞌinánkëxun kana ꞌën pian.
13Usakian kakëxun ka Nukën ꞌIbu Diosan xanu ñukákëxa:
—¿Uisa kupí kaina usokin ꞌan? Kakëxun ka xanun kakëxa:
—Runun ꞌë paránkëxun, kana a i bimi pian.
14Usa ꞌain ka Nukën ꞌIbu Diosan runu kakëxa:
—Min kamina ësokin ñu ꞌan, usa ꞌaish kamina raíri ñuina kamasama ꞌiti ꞌain. Min shikanëinshi niriti kamina ninuxun ꞌain. Usa ꞌain kamina me putuishi pinuxun ꞌain.
15ꞌËn kana mixmi xanubë nishananun ꞌimiti ꞌain, ꞌën ꞌimikëx ka min rëbúnki ꞌimainun xanun rëbúnki nishananti ꞌikën. Aín rëbúnkinën ka min maxkánu mi amánuxun ꞌaia, ꞌakëxun kamina aín taë tsipútunu ꞌanuxun ꞌain.
16Usakin runu katankëxun ka Nukën ꞌIbu Diosan xanuribi kakëxa:
—ꞌËn kana min tuia chaiira paë tanimi bakënun ꞌimiti ꞌain, paën kamina bakënuxun ꞌain. ꞌAínbi kamina usai ꞌibi min bënëbë ꞌinuxun ꞌain, ꞌianan kamina, an kakësabiokin ꞌati ꞌain.
17Ësakin xanu katankëxun ka bëburibi kakëxa:
—Min kamina min xanun kakëxun kuan. Usa ꞌixun kamina a pixunma ꞌanun ꞌën mi kakë i bimi a pian, ënë pixunma ka ꞌat ꞌën kakëxunbi, usa ꞌain ka bërí me ꞌaisama min ꞌucha kupí ꞌiti ꞌikën; usa ꞌain kamina ꞌitsaira ñu mëëkin menu ñu ꞌapáxun anun mix bamati nëtë ꞌitámainun pinuxun ꞌain. 18ꞌIanan ka menu ñu muxañu tubënrui ꞌirunuxun ꞌaia, ꞌimainun kamina barixun ninu ꞌikë ñukamabi piti ꞌain. 19Min nichakin ꞌitsaira ñu mëëtankëxun kamina pinuxun ꞌain, me ꞌakë kamina ꞌain, usa ꞌain kamina anúnmi me ꞌitëkënti ꞌitámainun ñu menuxun ꞌain, me ꞌakë kamina ꞌain, usa ꞌaish kamina me ꞌitëkënuxun ꞌain.
20Usa ꞌain ka unin aín xanu Eva kakin anëakëxa, ax ka kamabi uni axa tsókë aín tita ꞌitiokin.
21Nukën ꞌIbu Diosan ñuina xaká xanu aín ri ꞌaxuanan bëbu aín tari pañunun ꞌaxunkin, 22kakëxa: Ka is, bërí ka unix nukama achúshisa ꞌikën, usa ꞌixun ka uisa ñu kara upí ꞌikë ꞌunánan uisa ñu kara ꞌaisama ꞌikë aribi ꞌunánti ꞌikën. Usa ꞌain kamina a pi tsóti i bimi aribimina xënibua ꞌaínbi tsónuxun pi bërúanti ꞌain. 23Usakin katankëxun ka Nukën ꞌIbu Diosan uni Edénnua chikínkin, an uniokë ꞌixuan me naëoxun anu ñu mëënun kixun ëankëxa.
24Usakin uni chikíntankëxun ka Nukën ꞌIbu Diosan naësa amiaxa bari urukë au ain ángel raíri Edénu ꞌikë bainu nitsíankëxa. Ax ka ángel suntárusa ꞌiakëxa. An ka manë xëtokë tsi rëkirukësa ꞌixuan kuainakë bëkinkin anun bamatima i bimi anua uíxbi kuantirabanan bai bëarati anu nankëxa.
Селектирано:
Génesis 3: cbrPB
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 1978, 1995, 2008, 2022 Wycliffe Bible Translators, Inc. All rights reserved.