Génesis 3
3
Nkininkava rá ñɨvɨ xíꞌnañúꞌún nu̱u̱nꞌ kua̱chi
1Ko̱o̱ꞌ kúvi kitɨ máñáꞌ ka̱ꞌ nsú ka̱ꞌ inka ka̱ꞌ rá kitɨ yúkú ya̱ nsa̱ꞌá I̱toꞌoꞌ‑ó Ndiosíꞌ. Suviti̱ꞌ vá nkachiꞌ nu̱u̱nꞌ ñaꞌan vá:
―¿Á nijia kúvi ya̱ nkachiꞌ Ndiosíꞌ nu̱u̱nꞌ rán ya̱ ntu íyó kajiꞌ niva̱ꞌa rán rá vixíꞌ néni ɨɨn yutun íñɨ́ nu̱u̱nꞌ viiꞌ víꞌí íyó, réja?
2Jee nna̱xiníkó ñaꞌan vá nu̱u̱nꞌ ko̱o̱ꞌ:
―Kuvi kajiꞌ ránꞌ rá vixíꞌ kúun rá yutun íñɨ́ nu̱u̱nꞌ viiꞌ víꞌí íyó. 3Soo nkúvi kajiꞌ ráníꞌ ya̱ vixíꞌ kúun ɨɨn yutun ya̱ íñɨ́ ma̱ꞌñú ñuꞌun yaꞌá. Nkachiꞌ Ndiosíꞌ:
Koto yájíꞌ rán ni koto kéꞌí rán maa,
sáva nku̱víꞌ rán.
4Soo nkachiꞌ ko̱o̱ꞌ nu̱u̱nꞌ ña:
―Nsáꞌ kuviꞌ rán. 5Chi Ndiosíꞌ jíníꞌ ya̱ ki̱vɨ̱ꞌ kajiꞌ rán maa kenta kune antúníꞌ rán kuníchí rán, jee koo rán kua̱ꞌ íyó Ndiosíꞌ, chi kuniꞌ rán ya̱ váꞌa jín ya̱ niváꞌa.
6Jee niniꞌ ña ya̱ va̱ꞌa íyó ya̱ vixíꞌ vá kajiꞌ maa. Jee tóó túvi néꞌyá ña maa. Jee síkúvi ya̱ vixíꞌ vá iniꞌ ña kajiꞌ ña maa sáva kuníchí ña. Jee nka̱neeꞌ ña ɨɨn ya̱ vixíꞌ vá jee nyajiꞌ ña maa jee suni njia̱ꞌa ña maa nu̱u̱nꞌ yɨɨ́ ña ya̱ nééꞌ re̱ꞌ jín ña yukuán, jee nyajiꞌ re̱ꞌ maa. 7Jee nkenta nine antúníꞌ ni núvíꞌ ráa, jee niniꞌ ráa ya̱ íyó ñɨɨ́n ráa. I̱ña̱jée nki̱ku ráa rá naꞌá yu̱ku̱ꞌ yutun naní higuiera, jee nsa̱ꞌá ráa maa ya̱ kasɨꞌ ráa nu̱u̱nꞌ sɨ́ꞌɨn ráa.
8Jee máá hora jiákɨ̱ꞌɨ ta̱chi̱ꞌ víjin ya̱ kuáini, jee ña̱kuso̱ꞌo ráa ya̱ jíkónúun I̱toꞌoꞌ‑ó Ndiosíꞌ nu̱u̱nꞌ viiꞌ víꞌí íyó, jee ña̱kɨ̱ꞌɨ yuꞌuꞌ te̱e vá jín ñasɨ́ꞌɨ́‑ɨ nu̱u̱nꞌ re̱ꞌ nteñu rá yutun íñɨ́ yukuán nu̱u̱nꞌ viiꞌ víꞌí íyó.
9Jee nkana I̱toꞌoꞌ‑ó Ndiosíꞌ te̱e vá, jee nkachiꞌ re̱ꞌ:
―¿Né nú íñɨ́ nú?
10Jee nkachiꞌ te̱e vá:
―Ña̱kuso̱ꞌo ni̱ꞌ ya̱ maánú íñɨ́ nú nu̱u̱nꞌ viiꞌ víꞌí íyó, jee yúꞌví ni̱ꞌ, chi íyó ñɨɨ́n ni̱ꞌ, jee saáva ña̱kɨ̱ꞌɨ yuꞌuꞌ ni̱ꞌ.
11Jee nkachiꞌ Ndiosíꞌ:
―¿Né ɨɨn nkachiꞌ nu̱u̱nꞌ nú ya̱ íyó ñɨɨ́n nú rúja? ¿Á nyajiꞌ nú ya̱ vixíꞌ nínta yutun nta̱túníꞌ ni̱ꞌ ya̱ koto yájíꞌ nú rúja?
12Jee nkachiꞌ te̱e vá:
―Ñaꞌan ntaji nú nu̱u̱nꞌ ni̱ꞌ sáva kuneeꞌ ña jín ni̱ꞌ, maáña ntaji nu̱u̱nꞌ ni̱ꞌ ya̱ vixíꞌ yutun vá, jee nyajiꞌ ni̱ꞌ maa.
13I̱ña̱jée I̱toꞌoꞌ‑ó Ndiosíꞌ nkachiꞌ nu̱u̱nꞌ ñaꞌan vá:
―¿Na̱kuá kúvi ya̱ nsa̱ꞌá nú rúja?
Jee nkachiꞌ ñaꞌan vá:
―Ko̱o̱ꞌ nxi̱náꞌví nuꞌuꞌ, jee nyajiꞌ ni̱ꞌ ya̱ vixíꞌ vá.
14Jee I̱toꞌoꞌ‑ó Ndiosíꞌ nkachiꞌ nu̱u̱nꞌ ko̱o̱ꞌ vá:
―Jie̱ꞌe̱ꞌ ya̱ nsa̱ꞌá nú yaꞌá, kosoni̱nu nú ka̱ꞌ nsú káꞌ nta̱ká rá kitɨ náka ñɨvɨ jín nu̱u̱nꞌ nta̱ká rá kitɨ yúkú. Siúꞌun nú maánú kɨchíjíꞌ nú. Jee kajiꞌ nú ti̱ka̱cha̱a̱ꞌ nɨꞌɨ ki̱vɨ̱ꞌ kutekuꞌ nú. 15Jee saꞌá ni̱ꞌ ya̱ tu̱fi̱ꞌ ta̱ꞌán noꞌó jín ñaꞌan vá, jín ya̱ tu̱fi̱ꞌ ta̱ꞌán se̱ꞌya ichiyúkúnꞌ nú jín se̱ꞌya ichiyúkúnꞌ ña. Jee ɨɨn se̱ꞌya ichiyúkúnꞌ ña xtufíꞌ re̱ꞌ xi̱ni̱ꞌ nú, jee suvinú xtufíꞌ xu̱jieꞌéꞌ re̱ꞌ.
16Nkachiꞌ Ndiosíꞌ nu̱u̱nꞌ ñaꞌan vá:
―Xiníꞌin yɨɨ́ ni̱ꞌ kuyajiꞌ iniꞌ nú sáá kuneeꞌ kue̱ꞌi̱ꞌ nú. Kuteꞌneꞌ iniꞌ nú sáá xtaꞌvíꞌ nú rá se̱ꞌya nú. Niyo iniꞌ nú kutóó nú yɨɨ́ nú. Jee maáréꞌ kosoꞌ re̱ꞌ nu̱u̱nꞌ nú.
17Jee nkachiꞌ Ndiosíꞌ nu̱u̱nꞌ te̱e vá:
―Jie̱ꞌe̱ꞌ ya̱ nka̱níjiá nú ñasɨ́ꞌɨ́ nú, jee nyajiꞌ nú ya̱ vixíꞌ yutun nta̱túníꞌ ni̱ꞌ: “koto yájíꞌ nú maa”, saáva yósóni̱nu nu̱u̱nꞌ ñuꞌún jie̱ꞌe̱ꞌ ya̱ nsa̱ꞌá nú. Satíñú yɨ́ɨ́ nú kunoꞌo nú sáva ni̱ꞌi̱nꞌ nú ya̱ kajiꞌ nú nɨꞌɨ rá ki̱vɨ̱ꞌ kutekuꞌ nú. 18Jee nu̱u̱nꞌ ñu̱ꞌún ta̱ꞌvi̱ꞌ yu̱ku̱ꞌ ne̱ꞌén jín yu̱ku̱ꞌ iñu. Jee kajiꞌ nú yu̱ku̱ꞌ jiáꞌnu nu̱u̱nꞌ kúꞌúꞌ. 19Ne̱ kene ta̱a̱nꞌ nu̱u̱nꞌ nú satíñú yɨ́ɨ́ nú sáva ni̱ꞌi̱nꞌ nú tataꞌ kéne nu̱u̱nꞌ ñu̱ꞌún kajiꞌ nú. Suꞌva saꞌá nú ne̱kua̱ꞌ kuviꞌ nú jee nikó nú nu̱u̱nꞌ ñu̱ꞌún. Chi nu̱u̱nꞌ ñu̱ꞌún ntavaꞌ ni̱ꞌ noꞌó. Ti̱ka̱cha̱a̱ꞌ kúvi nú jee ti̱ka̱cha̱a̱ꞌ nuvi tuku nú ―nkachiꞌ Ndiosíꞌ.
20Jee nsi̱kúnání te̱e vá Eva ñasɨ́ꞌɨ́ re̱ꞌ. #3:20 Eva kuíni káchíꞌ: tékúꞌ, jee tu̱ꞌun stíláꞌ kuíni káchíꞌ: vida. Chi nkuvi ña nánáꞌ nu̱u̱nꞌ nɨꞌɨ ñɨvɨ tékúꞌ. 21Jee I̱toꞌoꞌ‑ó Ndiosíꞌ nsa̱ꞌá re̱ꞌ saꞌma ñɨɨn nsi̱kúnijin re̱ꞌ Adán jín ñasɨ́ꞌɨ́‑ɨ. 22Jee nkachiꞌ I̱toꞌoꞌ‑ó Ndiosíꞌ: “Vitan jee ya kenta kúvi te̱e vá ɨɨn ya̱ íyó kuéntáꞌ íyó ɨɨn‑ó chi jíníꞌ re̱ꞌ ná kúvi ya̱ váꞌa jín ya̱ niváꞌa. Vitan jee sáva nkúkání naꞌá re̱ꞌ tɨɨn re̱ꞌ ya̱ vixíꞌ yutun ya̱ sáꞌá‑a ya̱ kutekuꞌ ñɨvɨ jee kajiꞌ re̱ꞌ maa jee koto kutekuꞌ re̱ꞌ nɨ́ɨ́nkání saꞌá‑a.”
23Jee ntavaꞌ I̱toꞌoꞌ‑ó Ndiosíꞌ ráa nu̱u̱nꞌ Edén nu̱u̱nꞌ viiꞌ víꞌí íyó. Jee ñani re̱ꞌ te̱e vá satíñú‑u nu̱u̱nꞌ ñu̱ꞌún. Chi ñuꞌun ví ya̱ nsa̱ꞌá re̱ꞌ maa. 24Saájee ntavaꞌ re̱ꞌ te̱e vá jín ñasɨ́ꞌɨ́‑ɨ, jee ñani re̱ꞌ rá najiáꞌáꞌ ííꞌ naní querubine ichi kénta nka̱niiꞌ yuꞌú nu̱u̱nꞌ viiꞌ víꞌí íyó ya̱ káá‑a ñuunꞌ Edén sáva kúmí ráa yukuán. Suni ñani re̱ꞌ ɨɨn yuchiꞌ tɨ́ɨn ñuꞌunꞌ ya̱ jíkó nɨꞌɨ ichi sáva kumí ráa násɨ́ꞌ ráa ichi íñɨ́ yutun ya̱ sáꞌá ya̱ kutekuꞌ ñɨvɨ nɨ́ɨ́nkání.
Селектирано:
Génesis 3: meh
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2022, Wycliffe Bible Translators, Inc. All rights reserved.