Maˍkuˆ 10
10
Biˍ yaˍ hkaˍ ba hangˉ lang naeˉ lawng na Yeˍsuˆ maˍ jiˍ
1Yeˍsuˆ hiˉ keung ca yao Yawˍtanˍ langˍ ba hingˉ tawngˉ kyaˉ Yuˉdaˆ ang meungˉ hingˉ naiˍ uiˍ beu aeˉ laeˍ jiˍ. Changˉ ang muˉ uiˉ yang kawngˉ laˉ chawnˉ yao, Yeˍsuˆ mangˉ muiˉ yang cu pawk maˍ myang naeˉ lawˉ changˉ uiˉ na ang buinˉ tangˍ maˍ biˍ jiˍ. 2Haeˉ mae beu, Hpaˍriˆsaeˉ changˉ htiˍ baˍ uiˍ muiˉ Yeˍsuˆ na camˍ naeˍ nae, yang htang veu laˉ jiˉ. Ang bongˉ uiˉ aˍ yang beu hkaˍ ba mangˉ na hangˉ laeˍ naeˍ ningˉ ngaˍ ang liˍ ang kawngˍ veu ang yaˍ laˍ nae naˉ jiˉ. 3Yeˍsuˆ mangˉ muiˉ, Moˉseˍ nawˍ nawng na aˉ mae ang tangˍ piˍ saˍ langˍ ngaeˇ nae naˉ jiˉ. 4Hpaˍriˆsaeˉ uiˉ muiˉ, Hangˉ lang naeˉ ang laiˍ htiˍ hpeunˍ taemˉ yao hangˉ lang voˍ nae Moˉseˍ aˉ hkvangˍ piˍ saˍ laˍ jiˍ nae tawpˍ laeˍ jiˍ. 5Yeˍsuˆ mangˉ ha biˍ jiˍ. Nawng nuing ba kaenˍ naeˍ hka naeˉ pa nae Moˉseˍ ang liˍ ang kawngˍ ningˍ taemˉ saˍ jiˍ. 6Hta yao muiˉ, tawngˍ hpanˍ ngangˍ beu Ang suingˉ Hpaˍcaoˍ nawˍ yawng na kaˍ hpaˍ yaˍ nae hkaˍ ba yaˍ yaˉ yetˍ na taeng jiˉ. 7Hingˉ pa nae yao, kaˍ hpaˍ yaˍ nawˍ yang muing yang vangˉ na hpakˍ nga saˍ yao, yang hkaˍ ba kawngˉ htuˍ yaˍ laˉ mae ya ca naeˉ. 8Yaˇ yetˍ nyiˍ hu aˍ htiˍ saˍ htiˍ hu naeˍ yaˇ hpeuˍ naeˍ. Hingˉ pa nae yao, yaˇ yetˍ nyiˍ hu aˍ nyiˍ hu baˍ aˍ laˇ. Caˇ, htiˍ saˍ htiˍ hu naeˍ naˇ. 9Hingˉ pa nae yao, Ang suingˉ Hpaˍcaoˍ piˉ yuˉ lang yao saˉ caˉ chiˉ biˍ jiˍ hingˉ na changˉ baˍ yuˍ hpakˍ biˍ jo nae ha biˍ jiˍ. 10Ta peˍ uiˍ yumˉ hkaoˉ veu ca beu, ningˉ lawng ningˉ Yeˍsuˆ na htiˍ cangˍ naˉ laeˍ laeˍ jiˍ. 11Yeˍsuˆ mangˉ muiˉ, Hkaˍ tawng beu hkaˍ ba na hangˉ nga laeˍ yao, hkaˍ ba yaˍ htiˍ baˍ na yuˉ laeˍ naeˍ maˇ hkaˍ ba yaˍ hiˍ mangˉ na suˉ yaˍ linˉ yaˍ yao, yang hkaˍ ba na tiˍ si byaˇ. 12Hkaˍ ba yaˍ mangˍ muiˉ yang bongˉ na hangˉ nga laeˍ yao, kaˍ hpaˍ yaˍ htiˍ baˍ na yuˉ laeˍ baoˉ vaˍ, suˉ yaˍ linˉ yaˍ byaˇ nae ha biˍ jiˍ.
Yaˍ ke uiˉ na Yeˍsuˆ ang buinˉ piˍ jiˍ
13Haeˉ mae beu, yaˍ ke uiˉ htaˍ veu Yeˍsuˆ laˍ puˍ boeˉ biˍ naeˍ uiˉ saˍ laiˍ, yawng na Yeˍsuˆ kawngˉ suiˍ langˉ jiˉ. Caˇ, yaˍ ke na suiˍ laˉ jiˉ changˉ uiˉ na ta peˍ uiˍ iˍ jiˍ. 14Yeˍsuˆ hingˉ na myangˉ beu nuing ba yinˍ yao, Yaˍ ke uiˉ na ga kawngˉ piˉ laˉ voˍ. Yawng na baˍ tatˍ biˍ jo. Aˉ mae yao nae baoˉ vaˍ, Ang suingˉ Hpaˍcaoˍ beu ang meungˉ hingˉ ngaˍ yawng beu ang meungˉ yaˇ. 15Ga nawng na maˉ manˉ nae hkai hkaemˍ laˍ vaˍ. Ang suingˉ Hpaˍcaoˍ beu ang meungˉ hingˉ na yaˍ ke htiˍ hu mangˉ laˉ mae baˍ hap yuˉ nae baoˉ vaˍ, ang meungˉ hingˉ hkaoˉ veu baˍ ya awngˉ lae nae ha biˍ jiˍ. 16Haeˉ mae beu, Yeˍsuˆ nawˍ yaˍ ke uiˉ na am yao yawng htaˍ veu laˍ puˍ boeˉ biˍ yao ang buinˉ piˍ jiˍ.
Yaˍ hkaˍ ang ca pang mangˉ
17Yeˍsuˆ kaˉ ba yawˍ yao lae beu, yaˍ hkaˍ htiˍ hu yang kawngˉ huinˍ lui yao tawngˍ naˍ veu hpaˍ tuˍ laˍ hku nae, Saˍ laˉ ang maenˍ veuˉ, tuingˍ co tuingˍ cat a sak ya hkiˍ naeˍ uiˉ saˍ laiˍ, ga baˍ ceuˉ ya ha naeˇ nae naˉ jiˉ. 18Yeˍsuˆ mangˉ muiˉ, Ga na saˍ laˉ ang maenˍ nae ba ceuˉ ha yao haoˉ laˍ naeˇ. Ang suingˉ Hpaˍcaoˍ htiˍ hu caeˉ laˉ laeˍ yao changˉ ang maenˍ htiˍ hu nae muiˉ baˍ ca. 19Changˉ na baˍ ya saeˍ. Baˍ suˍ baˍ linˍ ya jo. Baˍ ya hkaoˍ yaˍ. Baˍ yaˍ nae uiˉ saˉ hkiˉ baˍ ya hkamˉ. Tuiˍ keˍ keˍ yaˍ yao baˍ ya yatˍ yaˍ. Nang muing nang vangˉ na ya saˍ ya nyamˉ naeˉ nae ang liˍ ang kawngˍ ningˍ uiˉ na nang ang bae yaˇ nae ciˍ jiˍ. 20Yaˍ hkaˍ hiˍ mangˉ muiˉ, Saˍ laˉ veuˉ, gaˇ ningˉ uiˉ ceuˉ hkaˉ hko laˉ hko na ga yaˍ ke ang iˉ yaˍ nae beu cheˉ yao langˉ byaˇ nae ha biˍ jiˍ. 21Yeˍsuˆ yang na hu yao hak naeˉ nuing ba ca yao, Nang hkaoˉ veu htiˍ ceuˍ loˉ suiˍ naeˍ. Nang beu ang keungˍ hkaˉ ca naeˉ uiˉ kawngˍ hko aeˉ yao changˉ ang saˍ ang baeˍ uiˍ na piˍ vo. Haeˉ mae ha baoˉ vaˍ, buingˍ htaˍ ang meungˉ veu ang keungˍ ang kawˉ ang paengˉ na ya naeˉ yaˇ. Peunˉ na yao, ga nawngˍ veu hkeˍ lao nae ha biˍ jiˍ. 22Changˉ hingˉ maˇ ang ca ang pang nae yao, ciˍ tangˍ hingˍ na ya kyaˍ beu, mae kaˍ bawˍ lawˍ nae nuing ba kangˍ yao awkˍ taw aengˉ jiˉ.
Changˉ ang ca ang pang nae Hpaˍcaoˍ beu ang meungˉ
23Yeˍsuˆ yang ta peˍ uiˍ na hu cawtˍ yao ciˍ jiˍ. Changˉ ang ca ang pang uiˉ aˍ Hpaˍcaoˍ ang meungˉ veu awngˉ lae yaeˉ yakˍ yaeˍ sutˉ nae ha biˍ jiˍ. 24Ta peˍ uiˍ Yeˍsuˆ ciˍ tangˍ hingˍ na ya kyaˍ beu manˍ hko jiˉ. Yeˍsuˆ yawng na htiˍ cangˍ ciˍ laeˍ sangˍ jiˍ. Ga changˍ yawng veuˉ, hkaˍ tawng beu ang ca ang pang hingˉ na puing laeˍ naeˍ maˇ Hpaˍcaoˍ ang meungˉ hkaoˉ veu awngˉ lae yaeˉ ang yakˍ nae ha biˍ jiˍ. 25Kaˍ laˍ okˆ htiˍ mangˍ hkuingˍ kyaeoˍ ang honˉ veu awngˉ lae naeˉ ningˉ ngaˍ ang ngaiˍ. Changˉ hpuˉ ang ca ang pang nawˍ Hpaˍcaoˍ ang meungˉ veu awngˉ lae naeˉ ningˉ ngaˍ ang yakˍ maˍ manˉ nae ha biˍ jiˍ. 26Yawng ya caeˉ manˍ hko yao haeˉ mae baoˉ vaˍ, htaiˍ awkˍ naeˍ na aˍ sangˍ ya taw naeˇ nae yawng tawˉ yawng ha lang ga jiˉ. 27Yeˍsuˆ yawng na hu yao ciˍ sangˍ jiˍ. Changˉ nawˍ ningˉ na baˍ ha hkiˍ. Hta yao muiˉ, Hpaˍcaoˍ baˍ ha hkiˍ nae uiˉ aˍ htiˍ ceuˍ baˍ ca. Hpaˍcaoˍ nawˍ hkaˉ hko laˉ hko na ang taeng hkiˍ yaˇ nae ha biˍ jiˍ. 28Haeˉ mae beu, Peˍtruˆ maˇ, Gu aˍ hkaˉ hko laˉ hko na paek nga saˍ yao, nang nawngˍ veu langˉ byaˇ nae ha biˍ jiˍ. 29Yeˍsuˆ ciˍ sangˍ jiˍ. Ga nawng na maˉ manˉ nae hkai hkaemˍ laˍ vaˍ. Aˍ sangˍ na baˍ upˍ, ga pa nae mawnˍ pyawˉ naeˉ uiˉ ang buingˉ tangˍ saˍ laiˍ yumˉ na, yaˍ chaˍ paw namˉ na, ang muing ang vangˉ na, ang yaˍ ang hkyaˉ na nae naˍ teuk hyaˉ teuk na paek taw saˍ baoˉ vaˍ, 30Changˉ hingˉ maˇ ya muiˉ cawˍ veu htiˍ pakˍ pun nae a coˉ yumˉ, naˍ teuk hyaˉ teuk, yaˍ chaˍ pawn namˉ, ang muing ang vangˉ na, ang yaˍ ang hkyaˉ nae hkanˍ yaˍ chuiˍ yaˍ naeˍ uiˉ na ya hkamˉ buˉ yao nawngˍ cangˍ coe veu muiˉ tuingˍ co tuingˍ cat a sak na ya naeˉ. 31Caˇ, kaˉ hu veu uiˉ aˍ kaˉ nawngˍ kaˍ lin veu hpeuˍ yao kaˉ nawngˍ liˍ lin veu uiˉ aˍ kaˉ huˍ kaˍ lin veu uiˉ ya hpeuˍ naeˍ nae ha biˍ jiˍ.
Yeˍsuˆ yang ya siˉ naeˉ lawng sumˍ cangˍ htiˍ cangˍ ha biˍ jiˍ
32Hingˉ nawngˍ veu Yeˍsuˆ nae yang ta peˍ uiˍ Yeˍruˆsaˍlaemˍ vengˍ veu lae beu, kaˉ ba veu Yeˍsuˆ nawˍ yawng huˍ veu lae jiˉ. Ta peˍ uiˍ manˍ yao yawng kawngˉ hkeˍ yao lae jiˉ changˉ uiˉ muiˉ hkae jiˉ. Haeˉ mae beu, ta peˍ tiˍ cheˍ nyiˍ hu uiˉ na htiˍ yaˍ Yeˍsuˆ haoˉ yao, yang aˉ mae ya hkamˉ buˉ naeˉ hingˉ lawng na hkai biˍ jiˍ yang, 33Gu Yeˍruˆsaˍlaemˍ vengˍ veu lae beu, Changˉ maˇ yit pa rawˉ hek ang huiˍ uiˍ nae Camˉ lik ang hkiˍ saˍ laˉ uiˉ yawng kawngˉ ap naeˉ na ya hkamˉ naeˉ. Yawng ngaˍ changˉ mangˉ na siˉ naeˉ uiˉ aˉ muˍ tatˆ yao Yuˉdaˆ changˉ baˍ aˍ nae changˉ uiˉ kawngˉ ap lae naeˉ. 34Yuˉdaˆ changˉ baˍ aˍ nae changˉ uiˉ muiˉ yang na ciˍ bawˍ bawˍ naeˍ. Hkanˍ hpitˍ naeˍ. Hkanˍ yaˍ chuiˍ yaˍ yao saeˍ naeˍ. Hta yao muiˉ, sumˍ nuing hkeu beu yaˇ taeˍ laˉ laeˍ naeˍ nae ha biˍ jiˍ.
Yaˍ kok nae Yoˉhanˍ yaˉ yetˍ duingˉ kyaˉ ang maenˍ na paˉ jiˉ
35Haeˉ mae beu, Seˍbeˍtaeˉ beu ang yaˍ Yaˍkok nae Yoˉhanˍ yaˉ yetˍ Yeˍsuˆ kawngˉ laˉ yao paˉ jiˉ. Gu hkaˉ ya siˉ naeˉ uiˉ gu paˉ jiˉ laˉ mae taeng laˍ bao nae Yeˍsuˆ na paˉ jiˉ. 36Yeˍsuˆ mangˉ muiˉ naˉ yetˍ saˍ laiˍ ba ceuˇ ha lao nae naˉ jiˉ. 37Yaˇ yetˍ muiˍ, Nang beu mun hpungˉ hkaoˉ veu laˍ maˍ kaˍ seu htiˍ hu nae laˍ saiˍ kaˍ seu htiˍ hu piˉ duingˉ lao nae paˉ jiˉ. 38Naˇ yetˍ ba ceuˉ na paˉ ngaeˇ nae baˍ bae laeˍ nae Yeˍsuˆ ha biˍ jiˍ. Ga tangˉ naeˉ kawkˆ hkak hingˉ nae ga ya hkamˉ buˉ naeˉ uiˉ baˆtiˆsamˍ hingˍ na#10:38 Yeˍsuˆ yang ya tuk hpan naeˉ ya hkanˉ buˉ naeˉ na ha siˉ naeˉ. nawng ang hkamˉ taw laˍ nae naˉ jiˉ. 39Yaˇ yetˍ muiˍ, Gu ang hkamˉ kaˍ yaˇ nae ha biˍ jiˍ. Yeˍsuˆ mangˉ muiˉ, Ga tangˉ naeˉ kawkˆ hkak hingˉ nawng ang ya tangˉ yaˇ. Ga baˆtiˆsamˍ hingˍ na muiˉ nawng ang ya hkamˉ yaˇ. 40Hta yao muiˉ, ga laˍ maˍ nae ga laˍ saiˍ hingˍ keung duingˉ lae naeˉ uiˉ ga aˉ hkvangˍ baˍ piˍ laˍ hkiˍ. Ca kyaˉ hingˉ ngaˍ Hpaˍcaoˍ haenˍ hangˉ yao chiˉ jiˉ uiˉ changˉ saˍ laiˍ naeˍ naˇ nae ha biˍ jiˍ. 41Ta peˍ htiˍ cheˍ hu uiˉ hingˉ lawng na ya kyaˍ yao Yaˍkok nae Yoˉhanˍ yawng na nuing ba yinˍ jiˍ. 42Yeˍsuˆ yawng na haoˉ chawnˉ laeˍ beu Yuˉdaˆ changˉ baˍ aˍ nae changˉ uiˉ upˆ peungˍ naeˍ aˉ yaˍ na ya jiˉ maˇ yawng na upˆ peungˍ yao, changˉ awn hoˉ changˉ uiˉ na yang hkaˉ ha siˉ laˉ mae ha naeˉ na nawng ang bae yaˇ. 43Nawng hkaoˉ veu ningˉ mae baˍ ya hpeuˍ biˍ. Nawng hkaoˉ veu huiˍ law siˉ naeˉ maˇ nawng caiˍ yaˍ soeˉ yaˍ naeˍ uiˉ ya hpeuˍ naeˍ. 44Nawng beu awn hoˉ hpeuˍ siˍ naeˇ maˇ hkaˉ hko laˉ hko uiˉ beu caiˍ yaˍ soeˉ yaˍ naeˍ uiˉ ya hpeuˍ naeˍ. 45Aˉ mae yao nae baoˉ vaˍ, Changˉ maˇ yang saˍ laiˍ hao na kanˉ caiˍ yaiˍ ceuˉ nae baˍ aˍ lui jiˉ. Hao caiˍ yaˍ naeˍ uiˉ saˍ laiˍ lui yao changˉ ang byaˍ na htaiˍ awkˍ naeˍ uiˉ saˍ laiˍ yang beu a sak hingˉ ta ta piˍ naeˍ nae ha biˍ jiˍ.
Baˍtiˆmaeˉ mangˉ mi nuing myangˉ laˉ laeˍ jiˍ
46Yeˍsuˆ nae yang ta peˍ uiˍ Yeˍriˆhkoˉ vengˍ veu hkeu laeˉ jiˉ. Yeˍsuˆ nae yang ta peˍ yawng ngaˍ changˉ ang byaˍ uiˍ ta ta nae Yeˍriˆhkoˉ vengˍ veu awkˍ taw aeˉ beu Tiˉmaeˉ beu ang yaˍ Baˍtiˆmaeˉ nae maengˉ jiˉ mae paw changˉ paˉ htiˍ hu maˇ kaˉ ba htang veu duingˉ yao ca jiˉ. 47Naˍzaˍraet vengˍ changˍ Yeˍsuˆ mangˉ yaˇ nae yang ya kyaˍ beu yang ciˍ jiˍ. Daˍvet beu ang yaˍ Yeˍsuˆ ga na muiˉ saˍ kyaˍ kyaˍ lao nae haoˉ jiˉ. 48Changˉ uiˉ aˍ yang na kyapˆ nae ca voˍ nae iˍ yao muiˉ, Daˍvet beu ang yaˍ Yeˍsuˆ ga na saˍ kyaˍ kyaˍ lao nae ya caeˉ haoˉ jiˉ. 49Haeˉ mae beu, Yeˍsuˆ maˇ cung yao, Yang na haoˉ ngangˉ lui nae ha biˍ jiˍ. Yawng uiˉ muiˉ changˉ mae paw mangˉ na, Hta laˉ bao. Nuing ba mawnˍ bao. Yeˍsuˆ nang na haoˉ langˍ ngaeˉ nae ha biˍ jiˍ. 50Changˉ mangˉ muiˉ yang beu hkaˍ lao yangˍ paek ngangˉ saˍ yao, ang vaiˍ nae hta laˉ yao, Yeˍsuˆ kawngˉ lae jiˉ. 51Yeˍsuˆ maˇ, Nang saˍ laiˍ ba ceuˉ ha lao nae naˉ jiˉ. Mae paw maˇ, Ang suingˉ veuˉ, ga mi nuing myangˉ laˉ naeˉ uiˉ saˍ laiˍ nang na piˉ taeng laˍ siˍ naeˉ nae ha biˍ jiˍ. 52Yeˍsuˆ mangˉ muiˉ aeˉ bao. Nang yumˉ saˉ naeˉ hingˉ nang na taeng pyo laˍ byaˇ nae ha biˍ jiˍ. Haeˉ mae beu, tiˍ chitˍ nae mi nuing myangˉ laˉ laeˍ yao, Yeˍsuˆ nawngˍ veu hkeˍ yao lae jiˉ.
Селектирано:
Maˍkuˆ 10: pyy
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2022, Wycliffe Bible Translators, Inc.