Деяния 26
26
Павел Мысиӷалӷӣ Сивуңани Умӣлгым Агриппам
1Агриппам пика̄ Павел: «Та̄ўа мысиӷаӷьяҳқа̄ҳтутын, ся̄қсин акузи».
Павелым ӣхыни ныңугулъюки, пика̄:
2«Умӣлыгми Агриппами, аӷныӷми хўани ынңа̄талъ аныӷныҳтуңа сивухпыни мысиӷаӷнақылӷӣңа Иудеит анахутылъқынъикаңитның, 3қаюҳлъяк налъюкынӷитңўа̄ӷатын Иудеит наңаӷныӷитлъю, апалъюқуткақыхкаңитлъю. Ынка̄м наңлъыхсипихлъюңа а̄птамкын нагатаҳтысқылъюңа.
4Нунамнилңӯтлъю, Иерусалимымылңӯтлъю қамахлъютың Иудеит лӣсимака̄т кияҳта̄лъқа аңлинҳа̄тымның има. 5Апыӷьюгьяқумыхтыху лӣсимакыхкаҳтың апыӷнаяӷа̄тңа ӣўлың қа̄ткутңалӷӣңа Иудеит Лӣлиҳтӯсӣтнун. 6Хўа̄ Иудеит тагиста̄тңа хўавык нанқихтысқылъюңа қаюҳлъяк ныӷьюкңукыхка Кияӷныӷым уңуваҳтилъыҳқа̄ туқуканың акықусяқыхка̄ сивунымнъун. 7Та̄ната акықусяқ қуля ма̄лӷук сӣпнықылӷӣт рамкымта ныӷьюкыхкаңат алъхыҳналюку, ынңа̄талъ манигӯтңулютың Кияӷныӷмун унухтӯма̄н, аӷныҳтӯма̄н. Умӣлыгми, иўырңа та̄на ата̄сиқ ныӷьюкилъық апалъюқлъюку Иудеит нанқихтысюга̄тңа. 8Сяңафси сюмыҳтаӷаӷақыстык Кияӷнық уңуваҳтипагниңинъилюку туқуканың?
9Сивунӷани агани ухпықыпихтыкақақа кипулъхина̄лъыҳлъяка ылъқуӷутңанилюку а̄тҳаның Иисусым Назаретыӷмӣм. 10Таўатын пика̄гуңа Иерусалимыми. Первосвященнигының пилъыҳқаңыхка̄гуңа анусимиңлъяҳтысналюки ухпықалӷутыт. Туқуқуӷнақңатки итагнақыпихтыкақанка туқутысқылъюки. 11Угляӷңа̄н аӷью̄ҳтыстыкақанка тамаҳӣтни синагогаңитни, хўатынлъю писнақуткыхкақанка: “Ухпықнанӣма̄қа Иисус”. Угумиягутыпихтыкақанка рыпалъ малиҳқақақанка талўа язычнигыт нунаңитнун амью̄ткынъалюки».
Павелым А̄пқаңа Ухпықа̄ҳтылъыни
12«Тама̄кын апалъюқлъюку Дамаскытуңа пилъыҳқалиӷлюңа, қылылъылиӷлюңа первосвященнигының. 13Умӣлыгми, иглыҳта̄люта аӷнық қукаӷитақуқлъю ысҳаӷақа ниӷук ниӷугатаӷалӷӣ сиқиныӷмың, кӯкхулъҳӣ қилягмың памакын. Ынңа̄талъ ниӷупихлъюни кӯкхутка̄гуқ увитымнун, иглыӷалгутымнунлъю. 14Қамахлъюта улъыӷа̄тукут нунамун. Та̄хкын ма нагақуӷақа хўатын пилӷӣ Еврейлъимистун: “Савля, Савля! Сяңама амью̄ткысиңа? Ақниҳқӯгутын лъпынун амью̄ткилъыҳпыгун, таўатыҳпигақ волым ақниҳқулъҳатун кытңиҳқулъыӷмикун югми маӷьяҳқӯсӣ”. 15А̄птақа: “Кинаңузин Атанық?” Атанӷым кӣмсиӷа̄ңа: “Иисусыңӯңа, амью̄ткыхкын. 16Ныкыви. Алӣӷвикамкын қаюҳлъяк накмикамкын қыпҳаҳтыңулютынлъю, лӣсимакистыңулютынлъю. Апыӷнакытын тама̄кут ысҳақаҳтын аӷныӷми хўани, тама̄кутлъю кылгусяҳқанка киңувақун алӣӷвикыхкумкын. 17Югулӣқна̄ӷамкынлъю лъпык катам юхпының, язычнигнуңлъю. Лъңитнун каяхнақңўа̄мкын 18ысҳаҳтыстысқылъюки, тунулъюки мамлыгмың қӣвысқылъюки ниӷуӷмун, тунулъюки Туӷныӷа̄м аҳтуӷьяҳқа̄нӷилъҳаның қӣвысқылъюки Кияӷныӷым аҳтуӷьяҳқа̄нӷилъҳанун. Та̄хкын Кияӷныӷым сыӷывулъықӣ сыӷлыҳқылъҳитның, илялъықӣлъю тама̄вык а̄фтыкаминун ухпықилъҳитхун хўаңамның”».
Павелым А̄пқаңа Қыпҳақани
19«Умӣлыгми Агриппами, қа̄ткыхкақақа та̄на ысҳаӷўа̄лъқа қилягмың. 20Сивуклъюңа уңипақӣңа Дамаскыми та̄хкын Иерусалимыми, тамаңанилъю Иудеями. Уңипақӣңа Иудеянунлъю, язычнигынунлъю авутыҳқылъюки сыӷлыҳқынъаниӷлюки қӣвысқылъюки Кияӷныӷмун, пинитунлъю писқанка ипапиҳқуткысқылъюку авутыҳқылъютың сыӷлыҳқынъанӣматаңи. 21Таўатын уңипақилъқа апалъюқлъюку Храмыми Иудеит тугулюңа туқунъақуткыхкақа̄тңа. 22Иўырңа Кияӷныӷым каюсӣтақа̄ңа хўавымун кынляңа, ынка̄м сивухпысигун ныкывлюңа а̄пҳақа̄ Христос пиңўа̄ҳлъягнунлъю, укаванталӷӣнунлъю. А̄пқақа та̄наңӯқ ата̄сиқ ӯкналиқистытлъю, Моисейемлъю ӯкналиқуткыхка̄т. 23Пика̄гут Христос икфиқыпыста̄ҳлъықнилюку ынка̄м сивулӣлюни уңуваӷьяҳқа̄нилюку туқулъыӷмың. Апыӷьяҳқа̄нилюкулъю ниӷуга югулилъҳым югнунлъю, язычнигнунлъю».
Фестым Налъюңуҳникаңа Павел
24Павел мысиӷа̄малюку Фестым акилӷӯҳлъяка̄: «Павел, налъюңуҳтутын! Лӣтылъыҳлъяхпык налъюңуҳтыста̄тын!»
25Иўырңа Павелым пика̄: «Правитель Фестыми, налъюңуҳтылъҳитуңа, лӣсималюңа ипамың акузиңӯңа. 26Умӣлгым Агриппам лӣсимакңўа̄ӷа̄ тама̄на ынка̄м тытухпына̄н алыҳқуӷақа. Лӣсимакақа нагақуқақӣ қамахлъюки тама̄кут қаюҳлъяк аксяқлъюку пика̄нӷитут. 27Умӣлыгми Агриппами, ухпықақсикӣ ӯкналиқистыт игақыхкӣт? Лӣсимакамкын ухпықақатын!»
28Умӣлгым Агриппам а̄птыка̄ Павел: «Сюмыҳпынӣи хўа̄ такысқуҳа̄н алыҳқуӷлюңа ухпыҳтыснақсиңа̄ Христосымың?»
29Павелым кӣмсиқа̄: «Такысқуҳа̄ӷңа̄н, налиӷмың та̄клъюку алыҳқуӷьяӷңа̄мкын юӷа̄ткыңъўа̄мкын Кияӷныӷмун ухпыӷысқылъютын. Лъңинаҳпык юӷа̄ткыңъунӷитамкын, юӷа̄ткыңъўа̄мси қамахлъюси нагалъҳӣни хўаңамның аӷныӷми хўани, хўаңамтун лъӣӷысқылъюси иўырңақун қӣпшаӷутңунаси!»
30Та̄хкын Умӣлык Агриппа, Правитель Феста, Вереника, тама̄кутлъю иляңи ныкывӯткат. 31А̄нлютың лъмыхнының алыҳқӯткат: «Ӯмун югмун сямың апалъӣтукут туқутусиҳқамың налиӷмың анусимиңлъя̄сиҳқамың». 32Агриппам пика̄ Феста: «А̄ныснаяӷаҳпут Умӣлыхпигаӷмун нанқихтысқылъюни пика̄нӷисяқан».
Селектирано:
Деяния 26: ess2
Нагласи
Сподели
Спореди
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2022, Wycliffe Bible Translators, Inc. All rights reserved.