Romanɛ 16
16
Anɔ Tɛsɛsɛnɔ
1Ɛɖɔaɖɔ dzyɔgo nɛ blɔada Foebe shu tsre nɔ, enu axwɛdɛ kɔ busɔlɛɔha nɛ Sɛntsyria. 2Ibisi sɛ tɛ nɔ yɛkɛ yɛ nɛ Apalete nɛm nɛ banɔnɛna kidzoa bha klɛ tɛ nɔ kɔ yɛ tɛpɛplɛnɔ kanyakɛdi gɛ aba pɛɛ edenɔ wɔnɔ kɔ, alasɛ eti dzi apɛplɛnɔ gbla kɔ banɔ gelee, ɔyɛkɔ plɛnɔ mɛ.
3Sɛnɔ Prislla anɛ Akuila, be nu mɛɔhayɛalɛ baxwɛwa nɛ Kristo Yesu mɛ. 4Batɛ yɛkɔ balɛ ɛkpã nɛ eluesi nɛ mɛ tɔkpu. Ganɛ kɔ mɛ tite pɔ kɔ bagɛ ba dɛ yɛkɛaŋa anɛ basɔlɛha nɛ petee tsyɛ behua lɛ ahwɛ.
5Ɛsɛnɔ basɔlɛha tsyɛ gɛ ɔzaesi nɛ balɛ bapa nɛ mɛ.
Ɛsɛnɔ mɔbhɛa dzyɔgo Epenetusɛ, gɛ edzi anɔ tutɔpu gɛ etsyina ku Kristo mɛ nɛ Esia kɛdɔnɛm.
6Ɛsɛnɔ Maria, gɛ awa kɛxwɛ gɛganɛɛ kɔ nɔ.
7Ɛsɛnɔ Andronikusɛ anɛ Yuniasɛ, meshopoalɛ nɛ gɛ baza buvu aplɛnɔ mɛ. Balɛ ba vɛ otugba nɛ banɔkpɛkpɛ nɛɛ shi, klɛ ba za Kristo mɛ flogo pɛ ɛba tsoku.
8Ɛsɛnɔ Ampliatusɛ, gɛ ɛɖɔ nɛ Apalete nɛm.
9Ɛsɛnɔ Yubanusɛ, bulɔ ɔhayɛ axwɛwa nɛ Kristo mɛ, anɛ mɔbhɛa dzyɔgo Statsyisɛ.
10Ɛsɛnɔ Apellesɛ, gɛ be tsyina yɛ di klɛ batrɔahwɛ yɛa bha nɛ Kristo mɛ.
Ɛsɛnɔ bagɛ be nu Aristobulusɛ bupamɛanɛ. 11Ɛsɛnɔ Heroɖiɔnɛ, mɛ eshopo.
Ɛsɛnɔ Nasissusɛ bupamɛanɛ gɛ akpasɛ Apalete nɛ mɛ.
12Ɛsɛnɔ Traɛfena anɛ Traɛfosa, badzɛ alɛ nɛ gɛ awa kɛxwɛ gɛganɛɛ nɛ Apalete nɛ mɛ.
Ɛsɛnɔ mɔbhɛa dzyɔgo Pɛsisɛ, enu adzɛ teli tsyɛ gɛ awa kɛxwɛ gɛganɛɛ nɛ Apalete nɛ mɛ.
13Ɛsɛnɔ Rufusɛ, gɛ be bu denɔ Apalete nɛ mɛ, anɛ yɛeni, gɛ edzi eni kɔmɛ, tsyɛ.
14Ɛsɛnɔ Asinkritusɛ, Flegɔnɛ, Hɛmisɛ, Patrobasɛ, Hɛmasɛ anɛ badzya nɛ gɛ alɛ plɛnɔa lɛ.
15Ɛsɛnɔ Filologusɛ, Yulia, Neriusɛ anɛ yɛada, anɛ Olimpasɛ anɛ banɔnɛna nɛ petee gɛ ba lɛ plɛnɔa lɛ.
16Nɔ sɛnɔ ɔhaglɔ nɛ tɛtsyɛtsyanɔ dzyɔgo.
Kristo busɔlɛha petee ɛsɛnɛ nɔ sɛsɛ.
17Badzya mɔ, itsre nɔ, no vu anhũ nɛ bagɛ balɛ amɛna tɛpupɔɛhle klɛ baa yɛkɔ kɛgɛ ba kpatanɔ nɔ nɛ elu wɔnɔɛ dzo mɛ gɛ enu agɛ alɔɛ titi nɛ kɛdɔkɛkasɛ nɛ gɛ nɔ tɛ kpasɛ nɛ shu. Nɔ za odzidzekɔ nɛ balɛ ɔbha. 18Alasɛ banɔa lɛ nɛɛ di na taa dɛ kɛxwɛ kɔ bulɔ Apalete Kristo, pɔ kɔ balɛ nahwɛ ahali mɛ. Ganɔ onugbum zɛzandzyɛ anɛ bugã kpɛkpɛanɔ mɛ ba yɛkɔ awɛɛ bagɛ be ti nyi kibuinyɛbui. 19Anɔnyanɔ eti nu wɔnɔ batɔtɛta nɛɛ dɔ, kɛlɛso, iyuku nɛ same nɛ wɔnɔ shu; pɔ ɛpɛɛ sɛ tɛ no tii bui odenɔ kɛgɛ nu kɛdzyɔgo nɛ shu, klɛ tɛ no ti kɛkanyaka denɔ buzizi shu.
20Eti be dze ishuyuyɔ Kpaya nɛ aba yɛɛ Satana akpɛ wɔnɔ butsrukpɔesi.
Apalete Yesu eshutukubui didi aza plɛnɔ nɔ.
21Timotio, mɔhayɛ axwɛwa, asɛnɛ nɔ asɛsɛ, ansɛ gɛ Lusiusɛ, Yasɔnɛ anɛ Sosipata gɛ nu meshopoalɛ nɛ tsyɛa bhɛtɛ.
22Mɛ, Tɛtiusɛ, gɛ ŋlɔmɛ keplukpɛa nɛ lu, ɛsɛnɛ nɔ nɛ Apalete nɛɛ nyi mɛ.
23Gaiusɛ, gɛ yɛ anɔyɛyɛkɛ mɛ nɛ busɔlɛha nɛ ɔkɛ nɛ mɔ same nɔ, asɛnɛ nɔ asɛsɛ.
Ɛrastusɛ, gɛ enu anɔ nɛ gɛ edi ɔmagbla nɛ axwɛ nɛa bha, anɛ bulɔadzya Kwatusɛ ba sɛnɛ nɔ asɛsɛ. 24Kɔ Apalete Yesu Kristo eshutukubui didi nɛ aza plɛnɔ nɔ petee. Tɛkɛbɛlɛm.
25Ɔtsɔ̃, kɔ anɔ nɛ gɛ yɛ ana wɔnɔesi dzu ganɔ mɛ kibui dzyɔgo nɛ Yesu Kristo kibui nɛ tɛbubuɖɔ, anɛ ebuikpukpu tɛbubukasɛ gɛ ekpu agɔagɔ gɛ atɛ ba fla nɛ nu, 26pɔ ɔtsɔ̃ gɛ be ti bu akasɛ klɛ ba kɔ le ti kɛlɛ ganɔ atɔnu nɛ ebuiŋuŋlɔmɛ ganɔ Kpaya gɛ eti beke nɛ ɔshã nu, sɛ tɛ amadi nɛ petee aba yɛkɛaŋa tɛ bata yɛ atɔ— 27kɔ ebuinyi Kpaya lɛlɛ nɛ tite edzi ishubhubhui denɔ nɛ ɔvɛnɔ ganɔ Yesu Kristoa mɛ! Tɛlɛbɛlɛm.
Селектирано:
Romanɛ 16: tcd
Нагласи
Копирај
Спореди
Сподели
Дали сакаш да ги зачуваш Нагласувањата на сите твои уреди? Пријави се или најави се
© Ghana Institute of Linguistics, Literacy and Bible Translation