Romanɛ 11
11
Izraɛlanɛ Gɔgɔɛ
1Ibisi alɛ sɛ: Kpaya ashɛ̃nahwɛ yɛanɔalɛ nɛ shu? Kɛma kidzo nyɛdzoa bha na! Mɛnahwɛ inu Izraɛleyi, gɛ ide Abraham oku nɛm, denɔ Bɛndzyamɛnɛ kɛmadi nɛm. 2Kpaya adɛ shɛ̃nahwɛ yɛanɔalɛ nɛ shu, gɛ eputɔenyi. No tinyi kɛdɔnɔ nɛ gɛ Kpayɛbuieplukpa nɛ aɖɔ denɔ Eliya shu— kana gɛ ebisi Kpaya kititilulɔ nɛ Izraɛl shu: 3“Apalete, be ti yi wɔ batɔnu klɛ la yɛɛ wɔ busɔlɛvumokpo; mɛ ko mɛ nu anɔ nɛ gɛ ɛgɔ, klɛ bee tsyina ahwɛ sɛ tɛ be yim.” 4Klɛ kide gɛ nu Kpaya kibuinu bubu? “Ɛtɛ bala banɔ akpã tegene kɔ mɛ shu gɛ balɛ beke dzu ekuisie si kɔ Baal.” 5So tsyɛ, nɛ ɔtsɔ̃ nɛ mɛ be teli agɔ gɛ be ti bu ganɔ eshutukubui didi mɛ. 6Klɛ onu gɛ kɛɛ nu eshutukubui didi, kɛlɛ alɛ kɛ da nu sɛ ganɔ kɛxwɛ wɛwa mɛ, onu ki nu kana, eshutukubui didi etie dzi eshutukubui didi. onu gɛ kɛɛ nu ana, kɛxwɛ tɛa dzi kɛxwɛ. 7Kɛlɛ kide? Kɛdɔnɔ nɛ gɛ Izraɛl apɛɛ gɛganɛɛ adɛ mɔɛ lɛ, pɔ agɛ be kulu nɛ xũ amɔɛ lɛ. Bagɔgɔɛ nɛ agɛganɛ atrɔ, 8ansɛ gɛ ba ŋlɔmɛ elu asɛ:
“Kpaya akpɛ alɛ ɔfufɔɛ omumu,
anhũ epu sɛ ba tɛa mɔ
klɛ batɔ epu sɛ be tie nu,
ɔbɔ nanɔ oboewi.”
9Klɛ Ɖaviti aɖɔ asɛ:
“Kɔ balɛ ɔkplɔ̃ nɛ edzi kihui anɛ kɛgba,
kɛdɔ gɛ ba ba kpatanɔ nɛ butɔtɛtɛta kɔa lɛ.
10Kɔ balɛ amɛ adɔ otumu dɛa na sɛ tɛ ba taa mɔ,
tɛ balɛ bude nɛ eku epu ɔyɛkɔ vɛnɔ mabeke mabekem.”
Ɛshɛ Nɛ Ɛshɛa Bha
11Ɛkaa bisi sɛ: ba kpatanɔ kɛdɔ adɔ oboe gɛ ba tɛa naa lɔ? Kɛma ana! Akpɛa sɛ, balɛ buzizi nɛ so, tɛbubu ba kɔ Baga dɛ nu Izraɛlanɛ tɛ kɛbhɛtɛ Izraɛlanɛ sɛ ba kpɛalɛ awɔ̃. 12Pɔ onu gɛ balɛ buzizi nɛ nu kɛkesrɔdɔ kɔ kanɔ, klɛ balɛ kɛdɔlɛlɛla nɛ nu kɛkesrɔdɔ kɔ baga dɛ yɛkɛaŋa, kɛlɛ kɛkesrɔdɔ gbɛgbla dɛa na nɛ balɛ ahwɛ nɛ taa mɛna!
13Ɛɖɔ kaɖɔ tsre wɔnɔ bagɛ adɛ yɛkɛaŋa. Nɛ kibelɛ mɛ gɛ mɛ nu anɔkpɛkpɛ kɔ bagɛ adɛ yɛkɛaŋa, ɛwa mɛ kɛxwɛ nɛ gelee 14nɛ kidzoenu didi mɛ sɛ ɛba nyɛmɛ mɛnahwɛ manɔalɛ sɛ tɛ kɛ dza awɔ̃ sɛ tɛ ibu balɛ beteli. 15Alasɛ onu gɛ balɛ shu tɛshɛshɛ̃nahwɛ nɛ kɛlɛ nu kanɔ nɛ ɛhwɛ kpɛkpɛetsu, kidee gɛ ba dzi tɛdɛdɛmɛ gɛ odinu ɛkpã gɛ de bekpum? 16Onu gɛ mawɛɛ kapɛ nɛ gɛ ba kɔ ansɛ beyuyu tutɔpu nɛ shu bhui, kɛlɛa lɛ kɛkpukpɔ nɛ shu petee bhui; onu gɛ ogu nɛ shu bhui, kana ɛshɛ nɛ tsyɛ ba za.
17Onu gɛ ɛshɛ nɛ tili idzyini tɛɛ̃, klɛ wɔ, oozo dzi olivɛ ɔshɛ tɛta koeyi tsyɛ, gɛ ba yɛkɔ anyata ɛbhlatɔ klɛ ɛlɛ petee ŋa kɛdɔ denɔ igu nɛ mɛ, 18tɛ feke ishu nɛ osishɛ lɛ nɛ shu. Onu gɛ ɔbhɛtɛ ana, lu awɔ̃ sɛ: Ɔdɛ nyɛna igu nɛ ovunɔ, pɔ igu nɛ ɛlɛ nyɛna wɔ vunɔ. 19Ɔbɔ bɔ ɖɔ ɔtsɔlɛ ɔsɛ, “Be dzyini ɛshɛ nɛ atɛɛ̃ sɛ tɛ ba yɛkɔ mɛ anyata.” 20Yɛkɔɛ lɛ sɛ kɛ bɛɛ lɛm ana. Pɔ be dzyini lɛ atɛɛ̃ akpɛ mayɛkɛ mayɛkɛŋa so, klɛ oli titi nɛ tɛyɛyɛkɛŋɛa bha. Tɛ za ɔwɔ̃dzu mɛ, pɔ za kifusisi mɛ. 21Alasɛ onu gɛ Kpaya adɛ yɛkɔ etsye osishɛ nahwɛ, atɛ ba yɛkɔ etsye wɔ tsyɛ.
22Klɛso luawɔ̃ nɛ Kpaya ɛyamyuyɔ nɛ yɛ amɛgɛganɛ: amɛgɛganɛ anɛ bagɛ ba wɔlɛ, pɔ ɛyamyuyɔ kɔ wɔ, onu gɛ ɔbɔ vɛ kɛlɛa bha nɛ yɛ yamyuyɔ nɛ na. Odinuana, wɔ tsyɛ be be bhui wɔ atɛɛ̃. 23Klɛ onu gɛ ba dɛ kpa za kabha mayɛkɛŋae de, ba ba yɛkɛa lɛ akpɛ kɛlɛm, alasɛ Kpaya aba na anɔnyanɔa fla nya ta ɛshɛ. 24Kɛɛ nu sɛ, be bhui nɔ atɛɛ̃ nɛ olivosi shu gɛ lɔ lɛ ayakpa mɛ, klɛ ba yɛkɔ nɔ anya ata olivosi gɛ ɔlɛ buya mɛ shu, kɛlɛ kɛ taa za bubuɛbɔɛ sɛ tɛ ba yɛkɔ ɛshɛ gɛ ta de osi nɛ shu, etsodzini anyɛ ata ɛlɛnahwɛ olivosi nɛ shu!
Be Be Bu Izraɛl Petee
25Badzya mɔ, ɛtɛɛ pɛ sɛ tɛ nɔ za matimatim ɔkɔ ebui kpukpua, sɛ tɛ nɔ tɛ bo ku ishuawɔ̃: Izraɛl atɛ za nɛ batɔm gɛganɛ edi nɛa pɛ tie lim ɔdɔnanɔ kibelɛ mɛ gɛ bagɛ dɛ nu Yuɖanɛ nɛ tɛkɛklam petee be tsoku. 26Kɛlɛso be be bu Izraɛl petee, ansɛ gɛ ba ŋuŋlɔmɛ lu sɛ:
“Agɛ aba yɛkɛ kɔ anɔ nɛ ebe de Zaɛon;
ebe tsyina kpayam mazamaza nɛ Yakɔb shu.
27Klɛ kɛɛ nɛ kɛlɛ nu mɛ onugbu nyɛnyam nɛ balɛ
gɛ ixule balɛ buzizi.”
28Nɛ kibuidzyɔgo nɛa pɛ mɛ, be nu banɔ gɛ ba dɛ pɛɛ anɔ nɛ wɔnɔa pɛm; pɔ nɛ Kpaya anɔ kuklua pɛ mɛ, ba ɖɔa lɛ nɛ balɛ akalɛ nɛa pɛm, 29Alasɛ Kpaya kɛdɔkukɔ anɔ anɛ yɛ anɔkuklu nɛ ama gɛ ɔbɔ tsrakɛ. 30Ansɛ gɛ wɔnɔ nɛ kibe tilim gɛ nɔ dɛ ta Kpaya batɔ pɛ ɔtsɔ̃ nɔ bɔ mɔ eshutuku didi denɔ balɛ batɔ matamata shu, 31kana so balɛ tsyɛ be dzi banɔ ga ba dɛ ba tatɔ sɛ tɛ balɛ tsyɛ ɔtsɔ̃ tɛ ba yɛkɛ eshutukubui didi ganɔ Kpaya eshutukubui didi nɔ mɛ. 32Alasɛ Kpaya atɛ nya banɔ nɛ petee akpɛ batɔ matamatam sɛ tɛ ebe di balɛ petee eshutukubui.
Kpayakpɛkpɛ Nɛa Bha
33O, Kibuinyinyi dzudzu mɛ kɛkesrɔdɔ anɛ Kpaya kibuititi!
Yɛ kebhuikuklu kama gɛ ɔbɔ na kalɛ mɛ nyɔ,
klɛ yɛ kidzo buwanu ma gɛ ɔbɔ naa kpɛ!
34“Anee yɛ eti ti Apalete nɛ kɛtɔkpum?
Ɔdɔgɔsɛ anee gɛ yɛ edzi anɔ gɛ akasɛ yɛ ɔtsrɛodzukɔ?”
35“Anee yɛ atɛ kɔ Kpaya kɛdɔ tili edi,
gɛ kɛlɛ sɛ Kpaya abuya kɛlɛ bhɛ akɔ yɛ?”
36Alasɛ denɔ yɛ ɔkɔ klɛ ganɔ yɛa bha klɛ kɛdɔnyɛdɔ kinu yɛyɛ.
Yɛyɛ kɛlɛ nu ishubhubhui ɔvɛnɔ mabeke mabekem! Tɛlɛbɛlɛm.
Селектирано:
Romanɛ 11: tcd
Нагласи
Копирај
Спореди
Сподели
Дали сакаш да ги зачуваш Нагласувањата на сите твои уреди? Пријави се или најави се
© Ghana Institute of Linguistics, Literacy and Bible Translation