Ɛ́séɖɔ̀ 19
19
Éézùɖùɛ̀-nyɔ̀ ɓěɔ̀ dyɛ̀ìn Sányà-tòɖòɔ̀
1Ti ɓɛ́ Éézùɖùɛ̀-nyɔ̀ ɓěɔ̀ sɔ̀ ma ɖé Íjè-ɓòɖòɔ̀ kɔ̃ɛɛ, wa nyini ma ɖé Sányà Gbǎùn-fúɖúáɔ̀ kɔ̃ ɓó waà zɔ̃ɔ̀ dɛ̀nɛ̀ tã nììnɔ̀ wé kĩ́ín-kĩ́ínɔ̀ ɓaɖa. 2Wa sɔ̀ ma ɖé Wɛ̀ɖɛ̀fíɖììn-pàɔ̀ mú, hwɛ̀ ké wa nyinià Sányà Gbǎùn-fúɖúáɔ̀ kɔ̃ɛ̀. Ké wa nyànàìn ma waà jàɖàìn-gbò ɓěɔ̀ dyi ɖé gbǎùn-fúɖúáɔ̀ kɔ̃, ɓó Sányà-tòɖòɔ̀ xwíɖíi.
3Wé ɖòɛ̀ ɓaɖaa, Mózè dyá ma toɖoɔ̀, ké ɔ mu ma ɖé Gèɖèpɔ́ɔ̀ gbo. Ké Bounɓoɔ̀ ɖá ma Mózè sɔ̀ìn ɖé toɖoɔ̀ dya, ké ɔ ɖá, “Cɛ̃ɛ Éézùɖùɛ̀-dyù ɓě mɔ̀à Jékɔ̀ɛ̀ xwíníín-dyù ɓěɔ̀ kɛɛ gbo, ɓɛ́ m̀ ké níiń, ‘Bounɓoɔ̀ ɖá 4ɓě mìɔùn ɖǎ ɖɛ ɔ nyu ma Íjè-nyɔ̀ ɓěɔ̀ bũ̌ɛɛ dyé, ké ɓě ɖǎa dyé kà ɓɛ́ ɔ gmɔ̀ ma ɓě dyí kà ke gmɔ̀à ɔ dyú dyíɛ, ké ɔ ɖǎ ɓě ɔ mìɔùn gbo dyàa. 5Ɓó kàǔn wɛ̃ɛ, ɔ jǔ ké ɓě dyi ɔ wuɖuɔ̀ nyu gàná cá, ké ɓě dyi dèè-wùɖù nìà ɓó ɓě kè ɔ pṹa kɛɛ dyi kpɔ̃ ní, nìí, ɔ kɔ̃̀ ɓóɖó-kpà gànáà dyɛo, kɛɛ ɓě mu ɔ hwòɖǒǔn-dyù jǔùn ɖé ɓóɖó-dù séín hwìɛ̀. 6Ɓě mu ɔ gbo-nì-nyɔ̀ ɓě jǔùn kà sáa-zà-nyɔ̀ ɓě nìà kɛ, ké ɓě mu ɓóɖó-dù ɓɛ́ ɔ kpá wáká ɓó ɔ bììɛɛ jǔùn.’ Kǎà m̀ mɛ nyu kà ɓó wuɖu ɓěɛ̀ Éézùɖùɛ̀-dyù ɓěɔ̀ gbo cɛ̃ɛ.” 7Ɔ jèɛɛ, Mózè kɔ́ìn ma ɖe, ké ɔ poìn ma Éézùɖùɛ̀-nyɔ̀ ɓěɔ̀ nyɔ vɛ̀nɛ̀ ɓěɔ̀ dyí, ké ɔ cɛ̃ ma wuɖu séín ɓɛ́ Bounɓoɔ̀ cɛ̃ ma kà ɔ gboɛɛ wa gbo. 8Ké nyɔ vɛ̀nɛ̀ séín ɓěɔ̀ jĩìn ma mú, ké wa zà ma ɖé wuɖu, ké wa ɖá, “À mu ɖɛ séín ɓɛ́ Bounɓoɔ̀ cɛ̃à à gboɛɛ nyuùn.” Ké Mózè kpa ma waà gɔ̃̌-jǔ-wùɖùɔ̀ Bounɓoɔ̀ gbo ɖe.
9Hwɛ̀ ɓɛ́ Mózè ké ma nyɔ vɛ̀nɛ̀ ɓěɔ̀ gɔ̃̌-jǔ-wùɖùɔ̀ tòɛɛ, Bounɓoɔ̀ cɛ̃ɛ ma Mózè gbo, ké ɔ ɖá, “Ní mu m̀ gbo dyiìn ɖé ní-kpò kpɛ̃̀ ɖò mú, ɓɛ́ ḿ dyi m̀ gbo wùɖùɛ̌n nìǐn, nyɔ ɓěɔ̀ kéɛ wɔ̃́, nìí ɓɛ́ wa ké m̀ hwòɖǒ kɔ̃ dè kánáá pū.” Ké Mózè cɛ̃ ma ɖɛ ɓɛ́ nyɔ ɓěɔ̀ cɛ̃ ma kà kɛɛ Bounɓoɔ̀ gbo.
10Ké Bounɓoɔ̀ cɛ̃ɛ ma Mózè gbo ɖe, ké ɔ ɖá, “Mu ɖé nyɔ ɓěɔ̀ gbo, ɓɛ́ m̀ kéɛ wa gbo cɛ̃, ɓɛ́ wa ké wa mìɔùn wáká po ɓó zɛ̃̌ɛ̀ kè gàɖàà, ɓɛ́ wa ké mú hwɛ̀. Cɛ̃ɛ ɓɛ́ wa ké waà ɖɔ ɓěɔ̀ wɔɔ̀, 11ɓɛ́ wa ké ti dyé ɓó zɔ̃̀ɔ̀, sepóɛɖé ní mu ɓíɖíi dyiìn ɖé Sányà-tòɖòɔ̀ dya ɓó nyɔ ɓěɔ̀ dyéɖé waí. 12M̀ mɛ cɛ̃ɛ nyɔ ɓěɔ̀ gbo, ɓɛ́ wa ké toɖoɔ̀ bũ̌in xwɛ̃́ìn, kɛɛ m̀ mɛ po bã̀à toɖoɔ̀ ɖei, ɓɛ́ ɔ kéɛ nyɔ ɓěɔ̀ dyí tɛ̀mɛ̀ìn dɛ̀ wa ké sèìn nyɛ. Nyɔ ɖò mɛ ɓɔ́ toɖoɔ̀ dyáa, mɔɔ ké wa ɖò mɛ ɓɔ́ toɖoɔ̀ dyi tìnìɛ̀n fɔɔ cá. Nyɔ kã̀ìn séín mu toɖoɔ̀ dyi tìnììn nyɛɛ ɓéɖé ɔ ké mɛ́. 13Ɓě ɓéɖé ɓě ké ɔ sɔ́ɔ́-kpò dyi taɓaìn, mɔɔ ɓě ɓéɖé ɓě ké ɔ sé-kpìì dyí ɖáɓá. Nyɔ ɖòɛ̀ sɔ̃ ɖò mɛ ɓɔ́ ɔ dyi tìnìɛ̀n. Kɛbì ɔ mɛ mɔ̀ nyɔǔn-dyù mɔɔ nyúà-ɖɛ̀ kɛɛ, ɔ ɓéɖé ɔ ké mɛ́. Ti ɓɛ́ ɓě mu gã̀à-wùɖù tuu wɔ̃́ùn wɛ̃ɛ, nìí, nyɔ ɓěɔ̀ ɓɛ́ìn toɖoɔ̀ bũ̌in xwɛ̃́ìn.”
14Ké Mózè mu ma ɓíɖíi ɖé nyɔ ɓěɔ̀ gbo, ké ɔ nyuɛ ké wa po ma wa mìɔùn wáká, ɓɛ́ wa ké mú hwɛ̀, ké wa wɔɔ̀ ma waà ɖɔ ɓěɔ̀. 15Ké ɔ cɛ̃ɛ ma wa gbo, ké ɔ ɖá, “Ɓě mɛ dyé ti ɓó zɔ̃̀ɔ̀. Ɓě mɛ sɔ̀ màa jè bũ̌.”
16Ɓó wéɔ̀ tã nììnɔ̀ gànà-kṹún wɛ̃ɛ, wɛ́ɖɛ́-wɛ́ɖɛ́ ɖú ma po kpàǐ, ké zɛ ɖú ma páná kpàǐ. Ké ní-kpò kpɛ̃̀ ɖò nì ma toɖoɔ̀ kɔ̃in, ké gã̀à-wùɖù vɛ̀nɛ̀ ɖò dyi ma, ké nyɔ séín nì ma ɖé jàɖàìn-hwɔ̀ɖɔ̀ɔ̀ múɛɛ tɛɖɛ ma kɔ̃in. 17Hwɛ̀ ké Mózè sí ma nyɔ ɓě nì ma jàɖàìn-hwɔ̀ɖɔ̀ɔ̀ múɛɛ dyúa, ké wa mu ma, ɓɛ́ wa kè Gèɖèpɔ́ɔ̀ ké ma gmɔ̌ìn, ké wa nyànà ma ɓó toɖoɔ̀ xwíɖíi dyi. 18Ké nyànà-sò dyíìn ma ɖé Sányà-tòɖòɔ̀ dya dyi, sepóɛɖé Bounɓoɔ̀ dyi ma ɓíɖíi ɖé toɖoɔ̀ dya dyììn ɖé nyɛ mú. Nyànà-sò nì ma toɖoɔ̀ mú sɔ̀ǔn pū kà nyànà-sò sɔ̀à nyɛ-ɓɔ́ɔ́ ɖò múɛ, ké toɖo gànáɔ̀ tɛɖɛ ma kɔ̃in gìɖì-gìɖì. 19Ké gã̀à-wùɖùɔ̀ nì ma dyií muɛń kánáá pū. Ké Mózè wùɖù ma, ké Gèɖèpɔ́ɔ̀ jǔ ma ɔ gɔ̃̌. Gèɖèpɔ́ɔ̀ wuɖuɔ̀ dyi ma kà zɛ pánáà kɛ. 20Ti ɓɛ́ Bounɓoɔ̀ dyi ma ɓíɖíi ɖé Sányà-tòɖòɔ̀ dyaa, ɔ ɖá ma Mózè, ɓɛ́ ɔ ké ma ɖé toɖoɔ̀ dya mu. Ké Mózè mu ma ɖé. 21Ké Bounɓoɔ̀ cɛ̃ɛ ma ɔ gbo, ké ɔ ɖá, “Mu ɓíɖíi, ɓɛ́ m̀ ké nyɔ ɓěɔ̀ náún po kóɖó-kóɖó, wa ɖò ní kɔ̃̀ ɖà bã̀àɔ̀ péɖé ɓó ní dyé jè. Wa dyiɛ náa nyuín, wa ɓáún-ɓáún mu mɛ́ìn. 22Wa mɛ hwɛ̀ mú, ké sáa-zà-nyɔ̀ ɓě ɓɛ́ wa dyi ɓó mɔ̄ mɔ̀à Bounɓoɔ̀ kɛɛ dyúa kɛɛ ɓéɖé wa ké wa mìɔùn wáká po, ɓɛ́ wa ké mú hwɛ̀ ɖekè. Wa seɛ náa nyuín, nìí, ní mu wa mú gbɔɔ̀ùn.”
23Ké Mózè cɛ̃ɛ ma Bounɓoɔ̀ gbo, ké ɔ ɖá, “Nyɔ ɓěɔ̀ se nɔ̄ Sányà-tòɖòɛ̀ dya dyiɛ ɓɛ́ìn, sepóɛɖé m̀ mìɔùn po ma à náún kóɖó-kóɖó kà ɓɛ́ à mɛ po ma bã̀à toɖoɛ̀ ɖei, ɓɛ́ ɔ ké wáká kpá ɓó m̀ bììɛ.”
24Hwɛ̀ ké Bounɓoɔ̀ cɛ̃ɛ ma Mózè gbo, ké ɔ ɖá, “Mu ɓíɖíi, ɓɛ́ m̀ ké Eɖóún nɔ̄ toɖoɛ̀ dya dyà. Kɛɛ sáa-zà-nyɔ̀ ɓěɔ̀ kè nyɔ tɔ̀ɔ̀ ɓěɔ̀ mɛ ɓɔ́ bã̀àɔ̀ péɖéɛ, ɓɛ́ wa ké nɔ̄ ḿ gbo dyi. Wa dyiɛ náa nyuín, ní mu wa mú gbɔɔ̀ùn.” 25Ké Mózè mu ma ɓíɖíi ɖé nyɔ ɓěɔ̀ gbo, ké ɔ cɛ̃ ma wa wuɖu ɓěɔ̀ gbo.
Селектирано:
Ɛ́séɖɔ̀ 19: ƁB02
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Bassa Bible © Bible Society Liberia, 2002.