Ɛ́séɖɔ̀ 16
16
Gèɖèpɔ́ɔ̀ nyí Éézùɖùɛ̀-nyɔ̀ ɓěɔ̀ ɖii-ɖɛ̀
1Ti ɓɛ́ Éézùɖùɛ̀-nyɔ̀ ɓěɔ̀ ɖǎ ma ɓó Éɖììn-pàɔ̀ mú hwèɖèìn kpã́ún wɛ̃ɛ, wa séín sɔ̀ ma ɓó dyí, ké wa mu ma ɖé gbǎùn-fúɖúá kɔ̃̀ nyɛ́nɛ́ mɔ̀ ma Sĩ́ìn kɛɛ kɔ̃. Gbǎùn-fúɖúáɔ̀ nì ma ɓó Éɖììn-pàɔ̀ kè Sányà-tòɖòɔ̀#16:1 Sányà-tòɖòɔ̀ kɔ̃̀ nyɛ́nɛ́ ɖò mɔ̀à Hówèɖè kɛ. pṹa. Wa nyini ma ɖé ɓó waà zɔ̃ɔ̀ dɛ̀nɛ̀ sɔ̃́ nììnɔ̀ wé ɓaɖa-bùè sè hm̀m̌ nììnɔ̀ ɓaɖa ti wa sɔ̀ ma Íjè-ɓòɖòɔ̀ kɔ̃ɛ. 2Ké Éézùɖùɛ̀-nyɔ̀ séín ɓěɔ̀ ɖú ma Mózè kè Eɖóún dúi jɛ̀ìn kpàǐ ɖé gbǎùn-fúɖúáɔ̀ kɔ̃. 3Nyɔ ɓěɔ̀ cɛ̃ɛ ma wa gbo, ké wa ɖá, “Ɔ muɔ́ má dyíin nɔ̀mɔ̀ùn ɓɛ́ Bounɓoɔ̀ mìɔùn kéɔ́ má à ɖé Íjè-ɓòɖòɔ̀ kɔ̃ ɖáɓáìn. Ti à nì ma ɖéɛɛ, à kò ma à suaɖɛ̀-hwùɖùǔ ɓě gbɔ dyi, ké à ɖi ma ɖii-ɖɛ̀ jĩ̀ kà à hwòɖǒ mɔ́ ma kɛ. Kɛɛ dyéɛ, m̀ dyà à nyɔ jĩ̀ kàà nɔ̄ gbǎùn-fúɖúáà kɔ̃, ɓɛ́ m̀ ké à séín mɔ́ dyí ɖáɓáìn.”
4Ké Bounɓoɔ̀ cɛ̃ɛ ma Mózè gbo, ké ɔ ɖá, “Gmɔ̀ nɔ̄, ní muɛ nyuùn ɓɛ́ ɖii-ɖɛ̀ ɖò ké dyɔún sɔ̀, ɓɛ́ ɔ ké wáɖá kà ní ɖaɓaà kɛɛ ɓó ɓě bìì. Wé séín ní, nyɔ ɓěɔ̀ mɛ mu, ɓɛ́ wa ké jĩ̀ kà wa ɓɛ́ìn ɖiɛ ɓó wéa ɓaɖaa kuɖu. Dyììn ɖé ɖɛ nìà kɛ múɛɛ, ní mu wa mú dɔ̃̌ùn, ɓɛ́ ḿ kéɛ dyé kɛbì wa mu ɖɛ ɓě ɓɛ́ ḿ cɛ̃ wa gboɛɛ nyuùn ní. 5Ɓó wéɔ̀ mɛ̀nɛ̌ìn-ɖò nììnɔ̀ ɓaɖaa, wa mɛ kuɖu wé sɔ̃́ɔ̀ ɖii-ɖɛ̀.”
6Ɔ jèɛɛ, Mózè kè Eɖóún cɛ̃ɛ ma Éézùɖùɛ̀-nyɔ̀ séín ɓěɔ̀ gbo, ké wa ɖá, “Ɓó hwìo ní, ɓě muɛ dyuòùn kà Bounɓoɔ̀ mɔ̀ nyɔ zà ɓě ɖé Íjè-ɓòɖòɔ̀ kɔ̃ɛ, 7ké ɓó gànà-kṹún ní, ɓě mu Bounɓoɔ̀ dĩ́ín-dĩ̀ìnɔ̀ dyéìn, sepóɛɖé ɔ ɖǎ ɔ dúi-jɛ̀ìn-jɛ̀ìn ɓɛ́ ɓě nyuà kɛɛ wɔ̃́. À mɔ̀ nyɛ́ ɓɛ́ ɓě kéà à dúi jɛ̀ìn nyɛ́? 8Bounɓoɔ̀ mɔ̀ nyɔ mu ɓě suaɖɛ̀ nyíìn ɓó hwìo, ké ɔ mu ɓě ɖii-ɖɛ̀ jĩ̀ kà ɓě mɔ́ ɖiɛ dyiɛɛ nyíìn ɓó gànà-kṹún, sepóɛɖé ɔ ɖǎ kà ɓě nyu ɔ dúi jɛ̀ìn nyɛɛ wɔ̃́. À mɔ̀ nyɛ́ kɛ́? Nyɔ ɓɛ́ ɓě jɛ̀ìn kà dúiɛɛ, ɔ se à, kɛɛ ɔ mɔ̀ Bounɓoɔ̀.”
9Hwɛ̀ ké Mózè cɛ̃ɛ ma Eɖóún gbo, ké ɔ ɖá, “Cɛ̃ɛ Éézùɖùɛ̀-nyɔ̀ séín ɓěɔ̀ gbo, ɓɛ́ wa ké ɓó Bounɓoɔ̀ dyúa dyi, sepóɛɖé ɔ ɖǎ waà jɛ-wùɖùɔ̀ wɔ̃́.”
10Ti ɓɛ́ Eɖóún nì ma Éézùɖùɛ̀-nyɔ̀ ɓěɔ̀ gbo wùɖùɛ̌n keɛɛ, púɛɛ, wa gmɔ̀ ma ɖé gbǎùn-fúɖúáɔ̀ kɔ̃in, ké wa dyé ma Bounɓoɔ̀ dĩ́ín-dĩ̀ìnɔ̀ ɖé ní-kpòɔ̀ mú. 11Ké Bounɓoɔ̀ cɛ̃ɛ ma Mózè gbo, ké ɔ ɖá, 12“Ḿ ɖǎ Éézùɖùɛ̀-dyù ɓěɔ̀ jɛ-wùɖùɔ̀ wɔ̃́. Cɛ̃ɛ wa gbo kà ɓó hwìo pɛ̀ɛ ní, wa mu suaɖɛ̀ ɖiìn, ké ɓó gànà-kṹún ní, bɛɖɛɛ̀ mu wa dyí ɖoɓoùn wɛ̃, ɓɛ́ wa kéɛ dyuò kà mɔ̄ Bounɓoɔ̀ mɔ̀ waà Gèɖèpɔ́ɔ̀ kɛ.”
13Ti ɓɛ́ hwìo jǔ ma kɛɛ, gbɔ̌ɔ̀ kúɖúú wáɖá ma ɓíɖíi, ké wa ɓáìn ma Éézùɖùɛ̀-nyɔ̀ ɓěɔ̀ jàɖàìn-hwɔ̀ɖɔ̀ gànáɔ̀ kɔ̃in, ké ɓó gànà-kṹún wɛ̃ɛ, dunu ɓuɖu ma jàɖàìn-hwɔ̀ɖɔ̀ɔ̀ ɖei dà séín. 14Ti ɓɛ́ dunuɔ̀ cɛ̃̀ ma dyiɛɛ, púɛɛ, Éézùɖùɛ̀-nyɔ̀ ɓěɔ̀ dyé ma ɖɛ mɛ̀nɛ̀ɛ̀-mɛ̀nɛ̀ɛ̀ hwɔìn tĩ́ɔ-pɛ̀ɛ̀ kɛɛ ɓó ɓíɖíi ɖé waà jàɖàìn-hwɔ̀ɖɔ̀ɔ̀ ɖei, ɖé gbǎùn-fúɖúáɔ̀ kɔ̃. 15Ti ɓɛ́ Éézùɖùɛ̀-nyɔ̀ ɓěɔ̀ dyéɛ ma kɛɛ, wa dièìn dìèìn ma dyi, ké wa ɖá, “Ɖɛ́ nìà kɛ́?” Sepóɛɖé wa se ma ɖɛ ɔ ké jǔɛɛ dyí dyuò.
Ké Mózè cɛ̃ɛ ma wa gbo, ké ɔ ɖá, “Ɔ mɔ̀ ɖii-ɖɛ̀ ɓɛ́ Bounɓoɔ̀ nyí ɓě, ɓɛ́ ɓě ké ɖiɛ. 16Gma ɓɛ́ Bounɓoɔ̀ tò ɓáa jè dyíɛɛ kɛà kɛ̀. Gàa ɖò-ɖò séín mɛ kuɖu jĩ̀ kà ɓɛ́ ɔ gbǒ-xwíníínɔ̀ ɓɛ́ìn ɖiɛ kɛ. Ɔ mɛ kuɖu kópò-wè mɛ̀nɛ̌ìn-tã mɛ̀nɛ̌ìn-tã ɓó nyɔ jĩ̀ kà nì ɖé ɔ jàɖàìn-gbòɔ̀ múɛɛ bìì.” 17Ké Éézùɖùɛ̀-nyɔ̀ ɓěɔ̀ nyuɛ kà Mózè nyuɛ ma kà wa gbo cɛ̃ɛ kɛ. Nyɔ ɖíɛ́ ɓě kuɖu ma ɓáún-ɓáún, ké ɖíɛ́ ɓě kuɖu ma tííwè. 18Ti ɓɛ́ wa ɖàɓàìn ma kɛɛ, nyɔ ɓɛ́ ɔ kuɖu ɓáún-ɓáún wɛ̃ɛ nììnɔ̀ se kɔ̃ zi, ké nyɔ ɓɛ́ ɔ kuɖu tííwèɛɛ nììnɔ̀ se dyí ɓíè. Gàa ɖò-ɖò kuɖu ma jĩ̀ kà ɔ gbǒ-xwíníínɔ̀ ɓɛ́ìn ma ɖiɛ kɛ. 19Ké Mózè cɛ̃ɛ ma wa gbo ɖe, ké ɔ ɖá, “Nyɔ ɖò ní ɖá ɓɛ́ ɔ ké ɖò goò.” 20Kɛɛ nyɔ ɖíɛ́ ɓě se ma Mózèɛ̀ wuɖuɔ̀ ɖùǔ gbo tò, ké wa goò ma ɖíɛ́ ɓě, kɛɛ ɔ kpá ma nimiìn mú, ké ɔ nyìnììn ma nyɔ́ún. Ɔ jèɛɛ, Mózè kpáìn ma wa dyoɖoún mìɔ.
21Gànà-kṹún ti séín ní, gàa ɖò-ɖò séín kuɖu ma jĩ̀ kà ɔ gbǒ-xwíníínɔ̀ ɓɛ́ìn ɖiɛ kɛ. Ti ɓɛ́ dyóɖóɔ̀ mu sùmùùn nyɛ̀nɛ̀ɛ̀ kɛɛ ní, ɔ ɖe ma ɓó ɓíɖíi dyi nyɛ̀nɛ̀ɛ̀. 22Ɓó wéɔ̀ mɛ̀nɛ̌ìn-ɖò nììnɔ̀ ɓaɖa ní, wa poìn wé sɔ̃́ nììn dyí. Ɔ xwíníín mɔ̀ wa kuɖu kópò-wè ɓaɖa-bùè sè mɛ̀nɛ̌ìn-ɖò ɓó nyɔ ɖò-ɖò bìì. Ké Éézùɖùɛ̀-nyɔ̀ ɓěɔ̀ nyɔ vɛ̀nɛ̀ ɓěɔ̀ diè ma Mózè dyi ɓóɛ jè. 23Ké Mózè cɛ̃ɛ ma wa gbo, ké ɔ ɖá, “Bounɓoɔ̀ ɖá gàɖàà mɔ̀ ɔ fɔ̀-wè hwɛ̀ǐn-hwɛ̀ǐnɔ̀. Ɔ jèɛɛ, ɓě mɛ pĩ ɖii-ɖɛ̀ jĩ̀ kà ɓě ɓɛ́ìn pĩɛ kɛ, ɓɛ́ ɓě ké ɖò goò.” 24Ɔ jèɛɛ, wa goò ma ɖò kà Mózè nyuɛ ma kà wa gbo cɛ̃ɛ kɛ, ké ɔ se ma nyɔ́ po, mɔɔ ké nimiìn seɛ ma mú kpá. 25Ti ɓɛ́ Bounɓoɔ̀ fɔ̀-wèɔ̀ ɖǎ ma dyiɛɛ, Mózè cɛ̃ɛ ma nyɔ ɓěɔ̀ gbo, ké ɔ ɖá, “Ɓě ɖi ɖii-ɖɛ̀ɔ̀ nyɔ ɓɛ́ ɓě dè ma kà dyiɛ, sepóɛɖé zɛ̃̌ɛ̀ mɔ̀ Bounɓoɔ̀ fɔ̀-wèɔ̀. Ɓě se ɖii-ɖɛ̀ɔ̀ ɖò ɖé gbǎùn-fúɖúáɔ̀ kɔ̃ dyéɛ ɓɛ́ìn ɓó zɛ̃̌ɛ̀. 26Ɓě mɛ kuɖuɛ ɓó wé mɛ̀nɛ̌ìn-ɖò xwíníín, kɛɛ wéɔ̀ mɛ̀nɛ̌ìn-sɔ̃́ nììn mɔ̀à fɔ̀-wèɔ̀ kɛɛ, ɖò se wáɖáa mu.”
27Ɓó wéɔ̀ mɛ̀nɛ̌ìn-sɔ̃́ nììnɔ̀ ɓaɖaa, nyɔ ɖíɛ́ ɓě mu ma ɖé gbǎùn-fúɖúáɔ̀ kɔ̃ wɛ̃́ɛ́, ɓɛ́ wa ké ma ɖii-ɖɛ̀ɔ̀ ɖò kuɖu, kɛɛ wa se ma ɖé ɖò dyé. 28Hwɛ̀ ké Bounɓoɔ̀ cɛ̃ɛ ma Mózè gbo, ké ɔ ɖá, “Tiɔ̀ nyɛ́ ɓě mu ní gma ɓěɔ̀ mú jaɖaa ɓɔ́ùn wɛ̃́? 29Ɔ mɛ nì ɓě hwìɖǐi kà ḿ nyí ɓě fɔ̀-wèɔ̀ kɛ. Ɔ jèɛɛ, ɓó wéɔ̀ mɛ̀nɛ̌ìn-ɖò nììnɔ̀ ɓaɖaa, ḿ nyí ɓě ɖii-ɖɛ̀ ɓó wé sɔ̃́ bìì. Nyɔ séín ɓéɖé wa ké waà jàɖàìn-gbò ɓěɔ̀ xwíɖíi nì ɓó wéɔ̀ mɛ̀nɛ̌ìn-sɔ̃́ nììnɔ̀ ɓaɖa. Nyɔ ɖò se ɓéɖé ɔ ké dà ɖò mu.” 30Ɔ jèɛɛ, nyɔ ɓěɔ̀ fɔ̀ ma ɓó wéɔ̀ mɛ̀nɛ̌ìn-sɔ̃́ nììnɔ̀ ɓaɖa.
31Ɓó tia ɓaɖaa, Éézùɖùɛ̀-nyɔ̀ ɓěɔ̀ jǔìn ma ɖii-ɖɛ̀ɔ̀ mánà-nyɛ̀nɛ̀.#16:31 Mánà-nyɛ̀nɛ̀ɔ̀ kè ɖɛ-dyi-diè-wùɖù mɔ̀à ɖɛ́ nìà kɛ́ɛ hwɔìn ní ɖé Híìbúɖúù-wùɖùɔ̀ mú. Gmɔ̀ ɖé 16:15 mú. Ɔ hwɔìn ma ɓáá-ɖɛ̀-dyùà mɛ́nɛ́ɛ́ púú ɖò, ké m̀ dyiɛ wɔ̃ dɔ̃̌ ní, ɔ ɖéè kà bɛɖɛɛ̀-kpò pɛɛ́-pɛɛ́ ɓɛ́ wa nyùìn ɖo-nì kɛɛ nìà kɛ. 32Ké Mózè cɛ̃ɛ ma Éézùɖùɛ̀-nyɔ̀ ɓěɔ̀ gbo, ké ɔ ɖá, “Bounɓoɔ̀ ɖá ɓě mɛ ɖú mánàɔ̀ kópò-wè mɛ̀nɛ̌ìn-tã dyí, ɓɛ́ ɓě kéɛ dyi dè ɓó ɓěɛ̀ xwíníín-dyù deìn dúún ɓě bìì, nìí ɓɛ́ wa ké mánà ɓɛ́ ɔ nyí ma ɓě ɖi jè ɖé gbǎùn-fúɖúáɔ̀ kɔ̃ ti ɓɛ́ ɔ zà ma kà ɓě ɖé Íjè-ɓòɖòɔ̀ kɔ̃ɛɛ dyé.” 33Hwɛ̀ ké Mózè cɛ̃ɛ ma Eɖóún gbo, ké ɔ ɖá, “Ɖú mɛ-dyàà ɖò dyí, ɓɛ́ m̀ ké mánàɔ̀ kópò-wè mɛ̀nɛ̌ìn-tã ɖéɛ mú po. M̀ mɛ dèɛ̀ ɓóɛ Bounɓoɔ̀ gma-gbɔ̀ɖɔ̀ɔ̀ dyúa dyi ɓó ɓěɛ̀ xwíníín-dyù deìn dúún ɓě bìì, ɓɛ́ wa kéɛ dyé.” 34Ké Eɖóún dè ma mánàɔ̀ ɓó gma-gbɔ̀ɖɔ̀ɔ̀ dyúa, ɓɛ́ ɔ ké sèìn-sèìn-ɖɛ̀ jǔ kà Bounɓoɔ̀ nyuɛ ma kà Mózè gbo cɛ̃ɛ kɛ. 35Ké Éézùɖùɛ̀-nyɔ̀ ɓěɔ̀ ɖi ma mánà ɓó zɔ̃ kpáɖá-nyɔ sɔ̃́ xwíníín. Wa gã̀à ma ɖiɛń dyi tee, ké wa nyini ma Kénà-ɓòɖò kɔ̃̀ kɔ̃ ɓɛ́ wa cĩ́ ma kɛɛ hwɛ̀.
36Kópò-wè mɛ̀nɛ̌ìn-tã mɔ̀ ma Éézùɖùɛ̀-nyɔ̀ ɓěɔ̀ nììn ɖɛ-mú-ɖàɓàìn-ɖɛ̀ kɔ̃̀ nyɛ́nɛ́ mɔ̀ ómɛ̀ kɛɛ wé dyúáɖò, ké ómɛ̀-wè ɓaɖa-bùè mɔ̀ ma wa nììn ɖɛ-mú-ɖàɓàìn-ɖɛ̀ kɔ̃̀ nyɛ́nɛ́ mɔ̀ ífà kɛɛ wé dyúáɖò.
Селектирано:
Ɛ́séɖɔ̀ 16: ƁB02
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Bassa Bible © Bible Society Liberia, 2002.