Ɛ́séɖɔ̀ 13
13
Nyíɔ́-dyù Gèɖèpɔ́ɔ̀ xwáɖáún-zàìn-zàìn
1Ké Bounɓoɔ̀ cɛ̃ɛ ma Mózè gbo ɖe, ké ɔ ɖá, 2“Ɓě mɛ zàìn ḿ nyíɔ́-dyù séín mɔ̀ gàa-dyùɛɛ xwáɖáún. Nyíɔ́-dyù séín ɓɛ́ ɔ wóɖó ɖé ɔ ɖe xwíníín nyɛɛ mɔ̀ ní kɔ̃̀ɔ̀-ɖɛ̀ kɛbì ɔ mɛ mɔ̀ nyɔǔn-dyù mɔɔ nyúà-ɖɛ̀ɛ.”
Bɛɖɛɛ̀-Se-Dyáìn-Ɖɛ̀-Gbo-Nì-hwɔ̀
3Ti ɓɛ́ Bounɓoɔ̀ ɖǎ ma Mózè gbo wùɖùɛ̀ hwɔɛɛ, Mózè cɛ̃ɛ ma Éézùɖùɛ̀-nyɔ̀ ɓěɔ̀ gbo, ké ɔ ɖá, “Ɓě kpɔ̃ wé nìà kɛ dyi, sepóɛɖé ɔ mɔ̀ wé kɔ̃̀ ɓaɖa ɓě sɔ̀ Íjè-ɓòɖò mɔ̀à ɓěɛ̀ gǐì-ɓòɖò kɛɛ kɔ̃ɛ. Bounɓoɔ̀ zà ɓě ɓóɖóɛ̀ kɔ̃ dyììn ɖé ɔ gana-sɔ̃̀ɔ̀ mú. Ɓěɛ̀ nyɔ ɖò ní ɖá ɔ ké ɖɛ ɓɛ́ bɛɖɛɛ̀-dyáìn-ɖɛ̀ nì gboɛɛ ɖò ɖi. 4Ɓě nì zɛ̃̌ɛ̀ ɓóɖó nìà kɛ kɔ̃ sɔ̀ǔn ɖé Áɓì-dɛ̀nɛ̀ɔ̀#13:4 Áɓì-dɛ̀nɛ̀ɔ̀ mɔ̀ǒ zɔ̃̌ɔ̀ Éézùɖùɛ̀-nyɔ̀ ɓěɔ̀ nììn zɔ̃ɔ̀ dɛ̀nɛ̀ kĩ́ín-kĩ́ín kà dyúáɖò kà Nísàùn-dɛ̀nɛ̀ɔ̀ mɔ̀à waà zɔ̃ɔ̀ dɛ̀nɛ̀ kĩ́ín-kĩ́ín ɓó kàǔn wɛ̃. xwíníín. 5Ti ɓɛ́ Bounɓoɔ̀ mu ɖé ɓě ɓóɖó kɔ̃̀ kɔ̃ ɓɛ́ Kénà-nyɔ̀ ɓěɔ̀ kè Hítì-nyɔ̀ ɓěɔ̀ kè Ámɔ̀-nyɔ̀ ɓěɔ̀ kè Hívì-nyɔ̀ ɓěɔ̀ ɔ kè Jɛ́ɓù-nyɔ̀ ɓěɔ̀ cĩ́à kɛɛ kpaùn wɛ̃ɛ, ɓě mɛ kpɔ̃ wé nìà kɛ dyi ɖé dɛ̀nɛ̀ nìà kɛ mú. Ɓóɖó kɔ̃̀ kɔ̃ ɔ nìà ɓě kpauń wɛ̃ɛ mɔ̀ bãa-ɓòɖò ɓɛ́ ɔ ɖáìn zɔ̃̌ɔ̀ ɓě ɓǎ nììn ɓǎ ɓěɔ̀ nyɛ́nɛ́ín, ɓɛ́ ɔ ké ɓě nyíɛ. 6Ɓě mɛ ɖi bɛɖɛɛ̀ se dyáìn-ɖɛ̀ gbo nìɛɛ ɓó wé mɛ̀nɛ̌ìn-sɔ̃́ xwíníín. Ɓó wéɔ̀ mɛ̀nɛ̌ìn-sɔ̃́ nììnɔ̀ ɓaɖaa, ɓě mɛ pa hwɔ ɓó Bounɓoɔ̀ bìì. 7Ɓó wé mɛ̀nɛ̌ìn-sɔ̃́ɔ̀ xwíníín nyɛɛ, ɓě mɛ ɓɔ́ bɛɖɛɛ̀ nì dyáìn-ɖɛ̀ gboɛɛ ɖiɛ. Ɖɛ ɖò ɓɛ́ bɛɖɛɛ̀-dyáìn-ɖɛ̀ nì gboɛɛ ɖò mɛ ɓɔ́ ɓěɛ̀ ɓóɖóɔ̀ mú nìɛ̀, hwɛ̀ ḿ po níiń, bɛɖɛɛ̀-dyáìn-ɖɛ̀ ɖò ké ɓě nyɔ ɖò xwa nì dyɛ mɔ̀ùn. 8Ti ɓě mu hwɔɔ̀ paa gbɔ dèìn nyɛɛ, ɓě mɛ cɛ̃ɛ ɓěɛ̀ dyú ɓěɔ̀ gbo, ɓɛ́ ɓě ké níiń, ‘Ɖɛ kɔ̃̀ jè à nìà ɖɛ nìà kɛ nyuɛń nyɛɛ mɔ̀ ɖɛ ɓɛ́ Bounɓoɔ̀ nyu zɔ̃̌ɔ̀ à bìì ti ɓɛ́ à nì zɔ̃̌ɔ̀ ɖé Íjè-ɓòɖòɔ̀ kɔ̃ sɔ̀ǔn wɛ̃ɛ jè.’ 9Hwɔ nìà kɛ mu nyɔ-ɖɛ-hwìɖǐi-dyàìn-ɖɛ̀ jǔùn ɓó ɓě bìì kà sɔ̃-po-ɖɛ̀ mɔɔ dyúa-kpà kɔ̃-jìnììn-ɖɛ̀ dyàà nyɔ ɖɛ hwìɖǐiɛ, nìí, ɓɛ́ Bounɓoɔ̀ gmaɔ̀ ké ɓě wĩín nì kánáá pū, sepóɛɖé Bounɓoɔ̀ zà ɓě Íjè-ɓòɖòɛ̀ kɔ̃ dyììn ɖé ɔ gana-sɔ̃̀ɔ̀ mú. 10Ɓě mɛ pa hwɔ nìà kɛ ɓó ti ɓɛ́ Bounɓoɔ̀ ɖǎà dyi dè kɛɛ mú, ɓó zɔ̃ kè zɔ̃ xwíníín.
Nyíɔ́-dyù ɓě
11“Ti ɓɛ́ Bounɓoɔ̀ mu ɓě Kénà-ɓòɖòɔ̀ kɔ̃ kpaùn, ɓɛ́ ɔ kéɛ ɓě nyí kà ɔ nyuɛ zɔ̃̌ɔ̀ kà ɓě ɓǎ nììn ɓǎ ɓěɔ̀ nyɛ́nɛ́ín ɖáìn nyɛɛ ní, 12nìí, ɓě mɛ nyí Bounɓoɔ̀ ɓěɛ̀ nyíɔ́-dyù-gàà séín ɓɛ́ wa wóɖó ɖé ɓě xwíníín nyɛ. Ɓěɛ̀ nyúà-ɖɛ̀ ɓěɔ̀ ɓíɔ́ séín mɔ̀ Bounɓoɔ̀ kɔ̃̀ɔ̀-ɖɛ̀ ɖekè. 13Ɓě mɛ gbǎà ɓěɛ̀ jǎkasì séín ɓěɔ̀ nyíɔ́-dyù ɓěɔ̀ dyììn ɖé wa ɓáɖáá bɛ̃̌ǐn po-po mú. Kɛɛ ɔ jǔ ké ɓě se wa gbǎà ní, ɓě ɓéɖé ɓɛ́ ɓě ké wa bùnù jaɖa. Ké ɓě mɛ gbǎà ɓěɛ̀ nyíɔ́-dyù-gàà séín ɓěɔ̀ ɖekè. 14Ɔ jǔ ké ɓěɛ̀ dyú ɓě dyi ɓě dyi diè ɖéé ɖé dyúa, ké wa dyi níiń, ‘Ɖɛ́ mɔ̀ ɖɛ nìà kɛ xwíníín nyɛ́?’ ní, nìí, ɓě mɛ cɛ̃ɛ wa gbo, ɓɛ́ ɓě ké níiń, ‘Bounɓoɔ̀ zà zɔ̃̌ɔ̀ à ɖé Íjè-ɓòɖò kɔ̃̀ kɔ̃ à mɔ̀ zɔ̃̌ɔ̀ gǐìɛɛ dyììn ɖé ɔ gana-sɔ̃̀ɔ̀ mú. 15Ti ɓɛ́ Féwòɖòɛ̀ dú kùmù ma, ké ɔ se ma wɔ̃́ ɓɛ́ ɔ ké à dyi táà, ɓɛ́ à ké ma ɔ ɓóɖóɔ̀ mú sɔ̀ɛɛ, Bounɓoɔ̀ ɖáɓá ma nyíɔ́-dyù-gàà séín nì ma ɖé Íjè-ɓòɖòɔ̀ kɔ̃ɛ, kɛbì ɔ mɔ̀ ma nyɔǔn-dyù mɔɔ nyúà-ɖɛ̀ kɛ. Ɖɛa kɔ̃̀ jè à zàìn à nyúà-ɖɛ̀ ɓěɔ̀ nyíɔ́-dyù ɓíɔ́ ɓěɔ̀ sáa, ké à gbǎà à mìɔùn nììn nyíɔ́-dyù-gàà ɓěɔ̀ kɛ̀.’ 16Ɓě dyi ɖɛ nìà kɛ nyuín, ɔ mu nyɔ-ɖɛ-hwìɖǐi-dyàìn-ɖɛ̀ jǔùn ɓó ɓě bìì kà sɔ̃-po-ɖɛ̀ mɔɔ dyúa-kpà kɔ̃-jìnììn-ɖɛ̀ dyàà nyɔ ɖɛ hwìɖǐiɛ, ɓɛ́ ɔ kéɛ ɓě hwìɖǐi dyà kà Bounɓoɔ̀ zà à Íjè-ɓòɖòɛ̀ kɔ̃ dyììn ɖé ɔ gana-sɔ̃̀ɔ̀ múɛ.”
Ní-kpòɔ̀ kè nyɛ-mìɔ̀ɔ̀
17Ti ɓɛ́ Féwòɖò táà ma Éézùɖùɛ̀-nyɔ̀ ɓěɔ̀ dyi, ɓɛ́ wa ké ma muɛɛ, hwìè mùìn ma ɖé Féɖésìà-nyɔ̀ ɓěɔ̀ ɓíɖí-ɓòɖòɔ̀ kɔ̃ɛɛ mɔ̀ ma hwìè xwã́ún-xwã́ún dyɛo, kɛɛ Gèɖèpɔ́ɔ̀ se ma ɖé wa kpàìn, sepóɛɖé ɔ ɖá, “Ɔ jǔ ké wa kè to dyi dyéɖéín gmɔìn ní, wa mu dyɛ̀ waà hwòɖǒ-dyùàɔ̀ gbo zĩàìn, ɓɛ́ wa ké Íjè-ɓòɖòɔ̀ kɔ̃ ɖe kɔ́ìn.” 18Ɔ jèɛɛ, Gèɖèpɔ́ɔ̀ kpàìn ma wa hwìè mùìn ɖé gbǎùn-fúɖúá ɖò hwɔ ɖé Dyóó Zĩ-zãɔ̀ wĩín dyíɛɛ kɔ̃. Ti ɓɛ́ Éézùɖùɛ̀-nyɔ̀ ɓěɔ̀ sɔ̀ ma Íjè-ɓòɖòɔ̀ kɔ̃ɛɛ, wa bɛ̃̀ìn ma to-vɔ̃-kà.
19Ti wa nì ma muɛń nyɛɛ, Mózè kpa ma Jòsé mɛ́ó zɔ̃̌ɔ̀ kà kɛɛ kpáɔ̀ ní, sepóɛɖé Jòsé nyuɛ ké Éézùɖùɛ̀-nyɔ̀ ɓěɔ̀ ɖi zɔ̃̌ɔ̀ wuɖu ɓá ɖɛ nìà kɛ jè dyí. Ɔ ɖá, “Ti Gèɖèpɔ́ɔ̀ mu ɓě ɓóɖó nìà kɛ kɔ̃ zàùn wɛ̃ɛ, ɓě mɛ kpa ní kpáɔ̀ wɛ̃́ɛ́o.”
20Ti ɓɛ́ Éézùɖùɛ̀-nyɔ̀ ɓěɔ̀ sɔ̀ ma Súkò-hwɔ̀ɖɔ̀ɔ̀ mú dyíɛɛ, wa nyini ma Éfàùn-hwɔ̀ɖɔ̀ɔ̀ wĩín, ké wa nyànàìn ma waà jàɖàìn-gbò ɓěɔ̀ dyi ɖé gbǎùn-fúɖúáɔ̀ wĩín. 21Zɔ̃ dyi zɔ̃ ní, Bounɓoɔ̀ nì ma wa dyúa ɖé ní-kpò ɖò mú, ɓɛ́ ɔ ké ma wa nàìn, ké hwuɖu dyi hwɔ ní, Bounɓoɔ̀ nì ma wa dyúa ɖé nyɛ-mìɔ̀ mú, ɓɛ́ ɔ ké wa ce nyí, nìí ɓɛ́ wa ké nàà ɓɛ́ìn ɓó máaún kè dyóɖóaún. 22Ní-kpòɔ̀ mɔɔ nyɛ-mìɔ̀ɔ̀ nì ma wa dyúa kánáá pū.
Селектирано:
Ɛ́séɖɔ̀ 13: ƁB02
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Bassa Bible © Bible Society Liberia, 2002.