Lii Lolo dhu Uru Tèka 2
2
1Dènge jꞌara sèmi èèna ka, Ama Lamatua pajꞌajꞌi dedha-liru, rai-haha, dènge isi ra aaꞌi-aaꞌi.
2Ropa Na sabꞌa èle, asa bèli èèna, lèke dènge lodꞌo ka pidhu. Hèia Na ae nèti sasabꞌa-laꞌa Na. 3Dènge jꞌara neꞌe, Na tao lodꞌo ka pidhu ne, lodꞌo dhu kapai risi nèti lodꞌo dhu leo sèra. Na tao sèmi èèna, lula Na paꞌèle aaꞌi le sasabꞌa Na, ka ètu dꞌara lodꞌo ka pidhu na, Na ae. 4aDꞌai sange neꞌe ka, lii lolo Ama Lamatua pajꞌajꞌi dedha-liru dènge rai-haha ne.
Ama Lamatua pajꞌajꞌi dhèu mone dènge dhèu bhèni
(Mateos 19:4-6, Markus 10:4-9, 1 Korintus 6:16, 15:45,47, Epesus 5:31-33)
4bLodꞌo Ama LAMATUA heka pajꞌajꞌi dedha-liru dènge rai-haha èèna, 5-6dhae abhu mèka ana aajꞌu, lula Na papuru mèka èjꞌi. Taa èèna, dhoka sèbꞌu èi di, mai nèti dꞌara rai ho pabasa rai re dedha. Aa abhu mèka dhèu rai-haha dhu tao oka-tedhe. 7Èle èèna ka, Ama LAMATUA nare rai ciki, ka Na pajꞌajꞌi dhèu rai-haha. Hèia Na tiu aꞌae Na asa dꞌara sahènga dhèu na, ka na mamuri dènge ka.
8Hèia Ama LAMATUA bhoke oka cue ètu rai Eden, re bèka dhimu. Hèia Na hia dhèu ne pea ètu dꞌara oka na. 9Ètu dꞌara oka èèna, Na pamamuri rupa-rupa ajꞌu dhu beꞌa, dhu dhèu bisa raꞌa. Aa Na pamamuri kahèi ajꞌu dua kapua ètu talora aae oka èèna. Ladhe dhèu raꞌe hua nèti ajꞌu èci, na mamuri taa-taa. Aa ladhe dhèu raꞌe hua nèti ajꞌu èci hari, neꞌa hagꞌe mia dhu beꞌa, aa mia dhu karehe.
10Ètu era èèna, abhu loko èci dhu hae nèti dꞌara oka èèna. Loko èèna, èpa kacanga. 11Kacanga ka èci na, ngara na Pison. Nèngu ka dhu hae pale-lème rai Hawila dhu abhu hualaa ae-ae. 12Ètu era èèna ka, abhu poe-pai, ajꞌu dhu raa na hèu mèngi, dènge hadhu kaleꞌe. 13Kacanga ka dua, ngara na Gihon. Kacanga ne, hae pale-lème rai Kus.#2:13Uru èèna, rai ne, ngara na ‘Kus’. Limuri ne, rai Kus ne ca bèka ètu negara Etiopia dènge negara Sudan, ètu Afrika re dhimu. 14Kacanga ka tèlu, ngara na Tigris. Kacanga neꞌe ka, jꞌajꞌi mi too rai Asyur#2:14Asyur neꞌe, negara dhu limuri ne, ngara na ‘Irak’. re ca bèka dhimu. Kacanga ka èpa, ngara na Efrat.
15Ka Ama LAMATUA hia dhèu pea ètu dꞌara Eden, ho na ladhe-leru oka èèna. 16Hèia Na hia paredha mi dhèu ne, aku Nèngu na, “Hua aajꞌu aaꞌi-aaꞌi ètu dꞌara oka ne, èu bisa muꞌa. 17Te ngaa èci dhu èu bisa boe muꞌa. Nuka hua nèti ajꞌu dhu neꞌa hagꞌe mia dhu beꞌa, aa mia dhu karehe. Ladhe muꞌa, èu madhe dènge.”
18Ka Ama LAMATUA tuhu haru lii Na, aku Nèngu na, “Babeꞌa na aadꞌo, ladhe dhèu ne mamuri mesa na. De Jaꞌa neo pajꞌajꞌi hia ne, anga ca dhèu dhu pamèci dènge ne.”
19-20Lodꞌo èèna, Ama LAMATUA nare rai ciki, ka Na tao rupa-rupa badha dènge manu-bhui. Hèia Na pangèdꞌu si asa dhèu ne, sèna ka na pangare si. Ka dhèu ne pangare badha se dènge manu-bhui aaꞌi-aaꞌi ra, èci-èci ka dènge ngara ra. Te ngaa dhèu ne abhu mèka anga dhu pamèci dènge nèngu.
21Hèia Ama LAMATUA pabhèjꞌi luu dhèu neꞌe. Ropa na bhèjꞌi, Ama Lamatua nare rui karasa na calaa, ka Na pakateme hari nuꞌa deo na. 22Nèti rui ne, Na pajꞌajꞌi bhèni ca dhèu. Hèia Na pangèdꞌu bhèni ne mi dhèu èèna. 23Ropa ladhe nèdhi bhèni ne, ka dhèu na peka, aku nèngu na,
“Waaa! Neꞌe ne ku! Sèmi neꞌe ku, heka pamèci dènge jaꞌa kèna!
Rui na, sama èci èèna ka dènge rui jaꞌa.
Aa isi na, sama kahèi dènge isi jaꞌa.
Lula nèngu ne, jꞌajꞌi nèti dhèu mone, nèti èèna ka jaꞌa pangare ne, ‘dhèu bhèni’.”#2:23Dꞌara lii Ibrani, dhèu mone ngara na ‘ish’. Aa bhèni na, ‘isha’. Ka ètu neꞌe ne, ra pabꞌunge lii padhai, peka na, “isha (dhèu bhèni) jꞌajꞌi nèti ish (dhèu mone).”
24Nèti èèna ka, dhèu mone hudꞌi tèke eele ku ina-ama na,
ho laꞌe mamuri dꞌara èci dènge dhèu èmu-kamali na,
lula dua ra, jꞌajꞌi le èci.
25Lodꞌo èèna, dua ra dhu dènge boe mèdha-papake, te ngaa ra makae boe.
Селектирано:
Lii Lolo dhu Uru Tèka 2: nfaNTPO
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2012, Wycliffe Bible Translators, Inc. All rights reserved