Популарни Библиски стихови од ܐܶܓܰܪܬ̥ܳܐ ܠܰܪّܽܘܡܳܝ̈ܶܐ 6

Сподели

ܗ̄ܽܘ ܐܰܓ̥ܪܳܐ ܕܺܗ̄ܝ ܚܛܺܝܬ̥ܳܐ ܡܰܘܬܳܐ ܝܳܐ، ܐܶ‌ܠܳܐ ܗ̄ܺܝ ܡܰܘܗܰܒܬܳܐ ܕܰܐ‌ܠܳܗܳܐ ܚܰܝ̈ܶܐ ܝܳܐ ܕ݄ܠܥܳܠܰܡ ܒܡܳܪܰܢ ܝܶܫܽܘܥ ܡܫܺܝܚܳܐ.

ܘܺܗ̄ܝ ܚܛܺܝܬ̥ܳܐ ܠܳܐ ܡܺܝܫܰܠܛܳܐ ܐܰܥܠܰܝܟ̥ܽܘ، ܡܺܐܝܕ̥ܶܗ ܕܠܰܝ̱ܬ ܗ̄ܰܬܽܘ ܬܰܚܬ ܗ̄ܽܘ ܢܳܡܽܘܣܳܐ، ܐܶ‌ܠܳܐ ܬܰܚܬ ܗ̄ܺܝ ܛܰܝܒܽܘܬ̥ܳܐ.

ܘܰܐܥܡܶܗ ܩܒ̥ܺܝܪܺܝܢܰܐ ܒܺܗ̄ܝ ܡܰܥܡܽܘܕ̥ܺܝܬ̥ܳܐ، ܘܡܰܝܺܝܬ̥ܺܝܢܰܐ، ܐܟ̥ ܕܩܰܝ݄ܡ ܝܶܫܽܘܥ ܡܫܺܝܚܳܐ ܡܒܰܝܢ ܗ̄ܰܡّܺܝ̈ܬ̥ܶܐ ܒܽܗ̄ܘ ܫܽܘܒܚܳܐ ܕܽܗ̄ܘ ܒܰܒܰܝܕ̥ܶܗ، ܗܰܘܟ̥ܰܐ ܣܬܶܝ ܐܰܚܢܰܐ ܒܰܚّܰܝ̈ܶܐ ܚܰܕ̱̈ܬ̥ܶܐ ܓ݄ܡܗܰܠܟ̥ܺܝܢܰܐ.

ܘܠܳܐ ܣܰܝܡܺܝܬܽܘ ܗ̄ܰܗّܰܕ̈ܳܡܰܬ̥ܟ̥ܽܘ ܣܶܦܳܩܳܐ ܒܺܝܫܳܐ ܠܺܗ̄ܝ ܚܛܺܝܬ̥ܳܐ، ܐܶ‌ܠܳܐ ܣܽܘܡܽܘ ܢܰܦܫܰܝܟ̥ܽܘ ܡܛܰܝܒ̈ܶܐ ܠܰܐ‌ܠܳܗܳܐ، ܐܟ̥ ܕܢܳܫ̈ܶܐ ܕܕܰܥܺܝܪܺܝ ܠܰܚّܰܝ̈ܶܐ ܡܒܰܝܢ ܗ̄ܰܡّܺܝ̈ܬ̥ܶܐ، ܘܰܗّܰܕ̈ܳܡܰܬ̥ܟ̥ܽܘ ܛܪܳܐ ܗܳܘ݄ܢ ܣܶܦܳܩܳܐ ܠܺܗ̄ܝ ܟܺܐܢܽܘܬ̥ܳܐ ܕܰܐ‌ܠܳܗܳܐ.

ܡܺܐܝܕ̥ܶܗ ܕܟܳܐܕ̥ܥܺܝܢܰܐ ܕܽܗ̄ܘ ܒܰܪܢܳܫܰܝܕ̥ܰܢ ܗ̄ܽܘ ܥܰܬܺܝܩܳܐ ܨܠܺܝܒ̥ ܐܰܥܡܶܗ ܠܰܫܰܢ ܕܒܳܛ݄ܠ ܗ̄ܽܘ ܦܰܓ̥ܪܳܐ ܕܺܗ̄ܝ ܚܛܺܝܬ̥ܳܐ، ܕܢܰܩܠܐ ܚܪܶܬܳܐ ܠܳܐ ܗ̄ܘܶܐ ܥܰܒܕܳܐ ܠܺܗ̄ܝ ܚܛܺܝܬ̥ܳܐ.

ܘܗܰܘܟ̥ܰܐ ܣܬܶܝ ܗܰܬܽܘ، ܚܫܰܒ̥ܽܘ ܪ̈ܽܘܚܰܝܟ̥ܽܘ ܕܡܺܝ̈ܬ̥ܶܐ ܗܰܬܽܘ ܠܺܗ̄ܝ ܚܛܺܝܬ̥ܳܐ، ܘܚܰܝ̈ܶܐ ܗܰܬܽܘ ܠܰܐ‌ܠܳܗܳܐ ܒܡܳܪܰܢ ܝܶܫܽܘܥ ܡܫܺܝܚܳܐ.

ܗܰܢ ܢܰܩܠܐ ܡ݄ܢ ܕ݄ܐܡّܺܪ̱ܝܢܰܐ؟ ܦܰܝܫܺܝܢܰܐ ܒܺܗ̄ܝ ܚܛܺܝܬ̥ܳܐ ܕܙܰܝܕܳܐ ܗ̄ܺܝ ܛܰܝܒܽܘܬ̥ܳܐ؟ ܠܳܐ، ܚܳܣ، ܡܺܐܝܕ̥ܶܗ ܕܰܐܚܢܰܐ ܕܡܰܝܺܝܬ̥ܺܝܢܰܐ (ܘܪܰܚܺܝܩܺܝܢܰܐ) ܡܺܗ̄ܝ ܚܛܺܝܬ̥ܳܐ، ܐܰܝܕܰܪܒܳܐ (ܓܕܳܥܪܺܝܢܰܐ) ܚܳܝܺܝܢܰܐ ܐܶܒܰܗ ܢܰܩܠܐ ܚܪܶܬܳܐ؟

ܠ݄ܐ ܟ݄ܐܕ̥ܥܺܝܬܽܘ ܠܰܗ̄ܢܳܐ ܕ݄ܟܣܰܝܡܺܝܬܽܘ ܢܰܦܫܰܝܟ̥ܽܘ ܡܛܰܝܒ̈ܶܐ ܕܫܳܡܥܺܝܬܽܘ ܠܶܗ ܠܺܗ̄ܝ ܥܰܒܕܽܘܬ̥ܳܐ، ܥܰܒܕ̈ܶܐ ܗܰܬܽܘ ܐܶ‌ܠܶܗ ܠܰܗ̄ܘܳܐ ܕ݄ܟܫܳܡܥܺܝܬܽܘ ܠܶܗ: ܐܰܘ (ܥܰܒܕ̈ܶܐ) ܠܺܗ̄ܝ ܚܛܺܝܬ̥ܳܐ، ܐܰܘ (ܥܰܒܕ̈ܶܐ) ܠܽܗ̄ܘ ܫܡܳܥܳܐ ܕܺܗ̄ܝ ܟܺܐܢܽܘܬ̥ܳܐ.

ܘܬܰܘܕܺܝ ܠܰܐ‌ܠܳܗܳܐ، ܕܥܰܒܕ̈ܶܐ ܗ̄ܘܰܝܬܽܘ ܠܺܗ̄ܝ ܚܛܺܝܬ̥ܳܐ، ܐܶ‌ܠܳܐ ܐܳܥܕܳܐ ܡܽܗ̄ܘ ܠܶܒܳܐ ܫܰܡܺܝܥܺܝܬܽܘ ܠܽܗ̄ܘ ܝܽܘܠܦܳܢܳܐ ܕܡܰܩܒܰܠܟ̥ܽܘ. ܘܺܗ̄ܝ ܢܰܩܠܐ ܕܗܰܘܺܝܬܽܘ ܚܺܐܪ̈ܶܐ ܡܺܗ̄ܝ ܚܛܺܝܬ̥ܳܐ، ܗܰܘܺܝܬܽܘ ܥܰܒܕ̈ܶܐ ܠܺܗ̄ܝ ܟܺܐܢܽܘܬ̥ܳܐ.