Nzema for Ghana 1998 GHBS; Non-Drama (NT)

Nzema for Ghana 1998 GHBS; Drama (NT)

Bible in Nzema © Bible Society of Ghana, 1998.

Mekɛ mɔɔ bɛkabɔ ewiade la, ɛnee Edwɛkɛ ne wɔ ɛkɛ; Edwɛkɛ ne nee Nyamenle a wɔ ɛkɛ a, na Edwɛkɛ ne le Nyamenle. Mɔlebɛbo ne amuala ɛnee Edwɛkɛ ne nee Nyamenle a wɔ ɛkɛ a. Ɔ nwo zo yɛɛ Nyamenle luale yɛle ninyɛne kɔsɔɔti a; bɛangoati ye bɛanyɛ debie biala mɔɔ wɔ aleɛabo amuala la. Ngoane kɔsɔɔti vi Edwɛkɛ ne anu a ba a, na ngoane ɛhye a le menli wienyi ne a. Wienyi ne ta awozinli nu, na awozinli ɛngola ɛngye ye.
Nyamenle zoanle nrenya bie mɔɔ bɛfɛlɛ ye Dwɔn la, manle ɔrahanle wienyi ne anwo edwɛkɛ ɔhilele menli, amaa bɛ kɔsɔɔti bɛade nrɛlaleɛ ne na bɛalie bɛali. Tɛ yemɔ a ɔle wienyi ne; ɔrale kɛ ɔbaha wienyi ne anwo edwɛkɛ. Edwɛkɛ ne a le nɔhalɛ wienyi ne mɔɔ ta menli kɔsɔɔti anwo zo na ɔba ewiade la.
Ɛnee Edwɛkɛ ne wɔ ewiade ye. Nyamenle luale ɔ nwo zo a bɔle ewiade a, noko ewiade amra ɛnze ye. Ɔrale ɔdaye ye maanle nu, na ye menli ne anlie ye. Bie mɔ dɔɔnwo liele ye na bɛliele ye bɛlile; ɛhye ati ɔmanle bɛ adenle kɛ bɛyɛ Nyamenle amra, mɔɔ bɛanlua nwonane nee mogya ngyehyɛlɛ zo a bɛwole bɛ na bɛarayɛ Nyamenle amra a, ɔluakɛ Nyamenle ɔdaye a ɔle bɛ ze a.
Edwɛkɛ ne rayɛle sonla mɔɔ ɛlolɛ nee nɔhalɛ ɛyi ye tɛkɛɛ a, na ɔ nee yɛ dɛnlanle. Yɛnwunle ye anyunlunyia mɔɔ ɔnyianle ye kɛ ɔle Selɛ ne Ara kokye la.
Dwɔn hanle ɔ nwo edwɛkɛ. Ɔse, “Ɛhye a le mɔɔ menganle ɔ nwo edwɛkɛ kɛ, ‘Ɔli me nzi ɔlɛba, na ɔle sonlakpole ɔtɛla me la, ɔboalekɛ bɛkawo me la ɛnee ɔwɔ ɛkɛ.’ ”
Ye ɛlolɛ bebelebe ne ati, yeyila yɛ muala kɔsɔɔti, na ɔyila yɛ dahuu. Nyamenle luale Mosisi anwo zo vale mɛla ne rɛlɛle yɛ, na ɛlolɛ nee nɔhalɛ luale Gyisɛse Kelaese anwo zo a rale a. Awie biala ɛtɛnwunle Nyamenle ɛlɛ. Ralɛ ne ala mɔɔ ɔdaye ko ne ala a ɔle Nyamenle, na ɔde Selɛ ne anwo ɛkɛ ne la, yemɔ yɛɛ ɛmaa yɛnwu ye a.


Dwuu mgbanyima mɔɔ wɔ Gyɛlusalɛm la zoanle sɛlɛvolɛma nee Livaema bie mɔ wɔ Dwɔn ɛkɛ kɛ bɛhɔbiza ye kɛ, “Wɔmɔ a le nwane?”
Dwɔn anva anvea bɛ na ɔkpale nwolɛ ɛdanlɛ wienyi kɛ, “Tɛ mame a mele Mɛzaya ne a.”
Bɛbizale ye kɛ, “Ɛnee wɔmɔ a le nwane? Wɔmɔ a ɛle Yilaegya ɔ?”
Dwɔn buale bɛ kɛ, “Kyɛkyɛ, tɛ yemɔ a le me.”
Bɛbizale ye kɛ, “Wɔmɔ a ɛle Nyamenle kpɔmanvolɛ ne ɔ?”
Ɔbuale kɛ, “Kyɛkyɛ.”
Bɛzele ye kɛ, “Ɛnee kile yɛ wɔ sonlazule. Ɔluakɛ ɔwɔ kɛ yɛfa mualɛ yɛkɔmaa menli mɔɔ zoanle yɛ la. Duzu a ɛka ye wɔ ɛ nwo a?”
Dwɔn buale kɛmɔ Nyamenle kpɔmanvolɛ Ayezaya hanle la:
“Mame a mele ɛnelɛ ne mɔɔ ɛlɛtea nu wɔ ɛsɛlɛ ne anu,
‘Bɛdenrɛdenrɛ adenle ne bɛmaa Awulae ɛlua nu!’ la.”
Menli mɔɔ rale la, Falasiima a zoanle bɛ a. Bɛbizale Dwɔn kɛ, “Saa tɛ wɔ a ɛle Mɛzaya ne, Yilaegya anzɛɛ Nyamenle kpɔmanvolɛ ne a, ɛnee duzu ati a ɛsɔne menli a?”
Dwɔn buale kɛ, “Mame mefa nzule a mesɔne a, na ko bie gyi bɛ avinli ɛkɛ ne mɔɔ bɛnze ye a. Yemɔ, ɔli me nzi ɔlɛba, na menfɛta kɛ menwɔzianyi ye mgbɔlaboa zo nyɛma bɔbɔ.”
Ɛhye mɔ amuala zile Bɛtani, Azule Dwɔdan ne anloa mɔɔ di kɔ aduduleɛ, ɛleka mɔɔ Dwɔn ɛlɛsɔne menli la.

Aleɛ hyenle la Dwɔn nwunle kɛ Gyisɛse ɛlɛba ɛleka mɔɔ ɔwɔ la na ɔhanle kɛ, “Bɛnlea, Nyamenle Boaneralɛ ne mɔɔ ɔbava yeabɔ azu yeaye ewiade amra ɛtane yeahɔ la ɛne! Ɛhye a ɛnee melɛka ye edwɛkɛ mɔɔ menganle kɛ ‘Nrenya bie li me nzi ɛlɛba na ɔle sonlakpole ɔtɛla me la, ɔboalekɛ mɔɔ bɛkawo me la ɛnee ɔwɔ ɛkɛ.’ Ɛnee menze ye sonlazule, noko membale kɛ mebava nzule meazɔne menli amaa Yizilayɛma anwu ye.”
Daselɛ mɔɔ Dwɔn lile la ɛne. Ɔse, “Menwunle kɛ Sunsum ne vi anwuma ɛlɛdwu ɔ nwo zo kɛ abubule la, na ɔrazinzele ɔ nwo zo. Ɛnee menze kɛ yemɔ ɔ; noko Nyamenle ne mɔɔ zoanle me kɛ menva nzule menzɔne la zele me kɛ, ‘Ɛbanwu kɛ Sunsum ne ɛrazinze nrenya bie anwo zo; sonla zɔhane a le sonla ne mɔɔ ɔbava Sunsum Nwuanzanwuanza ne yeazɔne la.’ Na mese, menwu ye, na meka meahile bɛ kɛ, nrenya ɛhye, yemɔ a ɔle Nyamenle Ara ne a.”

Ye alehyenlɛ nu ɛnee Dwɔn nee ye ɛdoavolɛma nwiɔ gyi ɛkɛ ne ko ne ala, na bɛnwunle kɛ Gyisɛse ɛlɛse. Na Dwɔn hanle kɛ, “Bɛnlea, Nyamenle Boaneralɛ ne ɛne!”
Ɛdoavolɛma nwiɔ ne dele la bɛgyakyile ye ɛkɛ bɛdoale Gyisɛse. Gyisɛse dole ɔ nye na ɔnwunle kɛ bɛdoa ye la, ɔbizale bɛ kɛ, “Bɛkpondɛ duzu?”
Bɛbuale kɛ, “Relabae, nienwu ɛleka yɛɛ ɛde a?” (Relabae abo a le “Kilehilevolɛ”)
Ɔbuale bɛ kɛ, “Bɛrɛla bɛranlea.” Yemɔti bɛ nee ye hɔle sua nu na bɛhɔnwunle ɛleka mɔɔ ɔde la, na bɛ nee ye dɛnlanle kenle ko ne. (Mekɛ ne anu ɛnee bɛbɔ nɔsolɛ dɔne nna.)
Bɛ mu nwiɔ mɔɔ bɛdele Dwɔn edwɛkɛ ne, na bɛdoale Gyisɛse la anu ko a le Andelu, mɔɔ le Saemɔn Pita adiema ne. Na ndɛndɛ ne ala Andelu hɔkpondɛle ɔ diema Saemɔn na ɔzele ye kɛ, “Yɛnwu Mɛzaya ne.” (Mɛzaya abo a le Kelaese.) Na ɔ nee Saemɔn bɛrale Gyisɛse ɛkɛ.
Gyisɛse nleanle Pita koonwu na ɔzele ye kɛ, “Wɔmɔ a ɛle Saemɔn, mɔɔ le Dwɔn ara ne. Bɛbavɛlɛ wɔ Sifase.” (“Sifase” yemɔ ala a le “Pita” na ɔ bo a le “Bodane”.)

Aleɛ hyenle la Gyisɛse yɛle kɛ ɔkɔ Galeli. Ɔnwunle Felepe na ɔzele ye kɛ, “Bɛla maa yɛhɔ!” (Felepe vi Bɛteseeyeda, Andelu nee Pita sua zo.) Felepe hɔkpondɛle Natanayɛle na ɔzele ye kɛ, “Yɛnwu sonla ne mɔɔ Mosisi hɛlɛle ɔ nwo edwɛkɛ wɔ mɛla ne anu, na Nyamenle kpɔmanvolɛma noko hɛlɛle ɔ nwo edwɛkɛ la. Yemɔ a le Gyisɛse, Dwosefi mɔɔ vi Nazalɛte la ara ne.”
Natanayɛle bizale ye kɛ, “Asoo debie kpalɛ bie kola fi Nazalɛte finde?”
Felepe buale kɛ, “Bɛla banlea.”
Mɔɔ Gyisɛse nwunle kɛ Natanayɛle ɛlɛba la, ɔzele kɛ, “Bɛnlea, Yizilayɛnli kpalɛ mɔɔ ɛnze adalɛ bɔ la ɛne!”
Natanayɛle bizale ye kɛ, “Na ɛze me nienwu?”
Gyisɛse buale kɛ, “Menwunle wɔ wɔ mekɛ mɔɔ ɛnee ɛde feege baka ne abo la kolaa na Felepe aravɛlɛ wɔ.”
Natanayɛle hanle kɛ, “Kilehilevolɛ, wɔmɔ a ɛle Nyamenle Ara ne. Wɔmɔ a ɛle Yizilayɛ Belemgbunli ne a!”
Gyisɛse buale ye kɛ, “Kɛmɔ meha kɛ menwunle wɔ wɔ mekɛ mɔɔ ɛnee ɛde feege baka ne abo la ati yɛɛ wɔlie wɔli a. Ɛbanwu nwanwane ninyɛne mgbole mɔɔ tɛla ɛhye a!” Na ɔhanle ɔhilele bɛ muala kɛ, “Meka nɔhalɛ ne meahile bɛ: bɛbanwu kɛ anwuma ɛbuke na Sonla Ra ne ati, Nyamenle soanvolɛma ɛlɛfo dwu.”

Слушни за Dw 1