Miorena tsara, aza miova

“Koa amin'izany, ry rahalahy malalako, dia miorena tsara, aza miova, ary mahefà be mandrakariva amin'ny asan'ny Tompo, satria fantatrareo fa tsy foana tsy akory ny fikelezanareo aina ao amin'ny Tompo.” 1 Korintiana 15:58

Fepetra telo :

• Miorena tsara. Miorina aiza moa? Ambonin’ilay vatolampy dia Jesosy Kristy. Tsy azo honzongozonina na ho mora rava fa tsara fototra.
• Aza miova. Hoy ny Matio 5:37 “Fa aoka ny teninareo, rehefa eny, dia ho eny; rehefa tsia, dia ho tsia; ny ankoatra izany kosa dia avy amin'ilay ratsy”. Mijoro tsy hanaiky ovain’ny manodidina na ny zava-misy fa mifikitra amin’Andriamanitra irery ihany na ahoana na ahoana.
• Mahefà be mandrakariva. Tsy mitsahatra amin’ny asa fanompoana fa manao izay hampandroso izany ary hijinja vokatra izay aharitra. “Tsy ianareo no nifidy Ahy, fa Izaho no nifidy anareo ka nanendry anareo mba handeha sy hamoa, ary mba haharetan'ny vokatrareo, mba homen'ny Ray anareo izay rehetra hangatahinareo amin'ny anarako na inona na inona.” Jaona 15:16

Ny teny hoe tsy foana akory ny fikelezanareo aina dia maneho fahavokarana mitohy. Rehefa mamafy ao amin’ny Tompo ianao, izay saha mahavokatra, dia hijinja be ao Aminy koa. Fa mila isika miorina tsara, tsy miovaova ary manao izay azontsika atao hampandrosoana ny asan’Andriamanitra. Ny fankatoavanao izany toromarika izany dia ahitanao vokatra goavana izay sarotra afenina.

Ka alao hery ary, ry rahalahy malalako, dia miorena tsara, aza miova, ary mahefà be mandrakariva amin'ny asan'ny Tompo, satria fantatrareo fa tsy foana tsy akory ny fikelezanareo aina ao amin'ny Tompo

Fahagagana ianao!