Manompoa an'i Jehovah Andriamanitrao

Fijoroana vavolombelona zaraiko aminao, izay tsy indray na in-droa fa matetika rehefa misy tsy metimety ao anatiko dia misafidy ny hanompo ny Tompo aho. Amin’ny fanampiako ny hafa ohatra, na midera Azy na manao asa izay mifandraika amin’ny fanitarana ny fanjakan’Andriamanitra. Tiako tsindriana aloha fa tsy niteny mihitsy aho hoe aza mandeha dokotera na aza mihinana fanafody fa samy manana ny refi-pinoany ny olona ary tsy hitsara mihitsy aho fa hizara fotsiny.

Ambarako fa salama aho, fiainan’Andriamanitra no mikoriana ao anatiko. Henoko ilay fanaintainana fa tsy hifantohako fa mampifantoka ny saiko amin’ny fahalebeazan’Andriamanitra aho.

Vao vita mariazy kelikely aho dia nitolefika, narary kibo ary tena tsy tafatsangana fa niforitra roa nandeha, narary tena narary. Nisafidy ny hitondra ahy tany amin’ny hopitaly ny fianakaviana: nisy fivontosana be tao amin’ny kiboko ary rehefa nivoaka ny “radio” dia nila nodidiana farak’izay aingana aho. Teo am-piandrasana sy fanaovana analyse dia niantso ny vadiko aho hoe : “Handao hivavaka fa tsy ekeko izao, ny olona jereo miteny hoe fa angaha tsy ampy vavaka sns…” Dia niara-nivavaka teo izahay roa. Nobataina amin’izay aho avy any amin’ny urgence ho entina any amin’ny “bloc”. Efa voaomana ny rehetra. Nitsapa ireo dokotera mpandidy, nijery ny valin’ny analyse, namerina nitsapa, nanontany hoe eto ve marary… ary eto… tsy nisy fanantainana intsony. Nifampijery izy mirahalahy dia niteny hoe midina ianao Madama fa tsy misy antony tokony handidiana anao fa jerenay fa tsy misy na inona na inona ao. ALELOIAAAAA!!!!!

Nanomboka teo dia rehefa misy manjo ahy dia tsaroako hoe nanao fahagagana ho ahy ny Tompo ary Izy tsy miova omaly sy anio ary mandrakizay. Mety misy ny fanaintainana, mety misy ny mandratra fa haiko fa rehefa midera Azy sy manome Voninahitra Azy aho dia Izy hiahy ahy. Fa hoy Izy : “Fa manompoa an'i Jehovah Andriamanitrareo, dia hitahy ny haninao sy ny ranonao Izy; ary hesoriko aminao ny aretina.” (Eksodosy 23:25)

Ho tanteraka aminao koa anie izany satria misafidy ny hankato sy hatoky Azy ianao amin’ny fotoana rehetra.

Fahagagana ianao!