Ataovy izao….

Resy lahatra ve ianao fa tena tia anao Andriamanitra? Inoako marimarina fa nandritr’izay fotoana vitsivitsy niresahantsika ny lohahevitra momba ny fankatoavana izay dia naharay zavatra maro ianao. Raha sitrakao dia mba zarao aminay ao amin’ny “commentaire” mba hampahery anay sy ny namantsika koa.

Ny fandraisana ny fanasan’ny Tompo dia fotoana miavaka sy sarobidy nasain’ny Tompo atao ho fahatsiarovana Azy. “...izao no ataovy ho fahatsiarovana Ahy” (1 Kor 11:23)

Misy fiangonana manao azy io isam-bolana na isak’alahady ohatra fa ny zava-dehibe dia ny toe-po hanaovana izany.

Tsy fombafombam-pivavahana no ilain’Andriamanitra fa fifandraisana lalina Aminy, feno fitiavana sy fanetre-tena ary vonona ny hanao ny Sitrapony. Tsy famenoam-potoana ihany koa fa tena firaisana lalina ao amin’ny Fanahy Masina. Ny fotoana ianao miroso amin’ny firaisana latabatra amin’ny Tompo dia mila tsaroanao ireo nataony, niaretany, nijaliany mba ho fanavotana anao.

Mandidy antsika Izy hoe “ataovy izao ho fahatsiarovana Azy” ary ny anjarantsika dia mankato izany. Tsara miomana ara-panahy mialohan’ny fandraisana, izany hoe mivavaka tsara ary mamerina anaty ireo nolalovan’ny Tompo rehetra sy ny Voninahitra goavana tao aorian’ny nijaliany. Tsy hoe ataovy izao satria manao ny fiangonana hafa fa atao satria mila tsarovantsika ireo ahatsapantsika ny habean’ny Fitiavany antsika. Fotoana manetriketrika tokoa io. Aza atao kilalao.

Tena tia anao Andriamanitra. Maniry hanana fifandraisana lalina miaraka aminao Izy ahafahany mizara ny tsiambaratelony aminao. Raha mbola tsy nandray Azy ianao ho Tompo sy Mpamonjy ny fiainanao dia manasa anao aho hanao ity vavaka fohy ity fa kosa, tena hiantoka ny fiainanao ho avy raha ataonao amin’ny fonao tokoa. Makà toerana milamina dia teneno amin’ny fandresen-dahatra hoe : “ Mino ny asam-pamonjena nataonao aho Jesosy, mino aho fa maty ho ahy ianao ary efa nentinao ny fahotako rehetra, ny aretiko rehetra. Mino aho fa nitsangana tamin’ny maty ianao. Ambarako manomboka anio fa Ianao no Tompoko sy Mpamonjy ahy, zanak’Andriamanitra aho, mpandova ny lanitra aho. Misaotra JESOSY. Amen”

Arahabaina fa mpiray lova amin’i Kristy ianao. Fifaliana be ny any an-danitra noho ny fankatoavanao.

Tahiana manokana ianao!