Fitiavana lehibe indrindra

🎶Tiako ianao eee, tena mamiko eee, tena tiko INDRINDRA, malalan’ny foko, IANAO JESOSY oooo🎶…. Iza no tsy mahalala izay hiran’i Henika izay? Fa rehefa zohina tokoa, dia avy ao am-po ve sa imolotra ihany?

Ny tanora mpifamofo dia mora miteny hoe :Tiako ianao. Ny fitiavana anefa mitaky fanoloran-tena, fanetre-tena ary fandavan-tena. Mahafinaritra tokoa mandre hoe tiana ianao fa misy zavatra takian’izay ao ambadika. Ny hiran’i Henika dia milaza hoe “mamiko, tiako indrindra, malalan’ny foko”.. oowww, faly ery rehefa nisy niteny izany taloha dia babo eo, mainka moa fa misy chocolat kely na voninkazo kely manaraka eny…😅💐 Fa tsy imolotra io, mitaky fandraisana andraikitra ary mandrakizay fa tsy haitraitra fotsiny.

“Mamiko, tiako indrindra, malalan’ny foko” ary mbola niampy hoe “tsy atakaloko an’iza n’iza, tsy ho soloiko n’inona n’inona ee” : mila hiainana izay tononkira mafonja izany.

Tsy rehefa milamina ihany ny atao fa amin’ny fotoana rehetra. Tsy atakalo na soloina vola, na harena, na materialy, na torimaso (ieeee…, rehefa asaina mifoha maraina dia aleo aloha hatory kely 😴) sns… Mila fahamatorana.

Tsy rehefa misy tsy mifanaraka amin’ny tiantsika dia soloina fifandraisana miaraka amin’ny namana aloha, na midongy toy ny zazakely. Fa na inona na inona, na iza na iza dia tsy misy tokony haka ny toeran’i Jesosy voalohany eo amin’ny fiainanao.

Hoy Izy “Raha tia Ahy ianareo, dia hitandrina ny didiko.” Jaona 14:15 - Fankatoavana izany. Tandremanao izay lazainy, miezaka ianao ny hanao izay hampifaly azy sy izay tiany. Tsy toy izany ve ny mpifankatia? Rehefa fantatrao hoe izao no tiany dia ataonao iny ary mitandrina mafy ianao tsy hanao izay hampalahelo azy… Izay ilay hoe tia. Ho an’ireo nanao fanekena teo anatrehan’Andriamanitra tamin’ny fanamasinana ny fanambadiana dia misy toky hifanolorana izay fototry ny tokantrano.

Koa raha tia Azy ianao dia handeha izay tiany no atao. Na mety tsy mahafaly antsika aza ilay mety takiana fa satria isika TIA dia tandremanao izany.

Handeha hiara-hiredona hoe : 🎶Tiako ianao eee, tena mamiko eee, tena tiko INDRINDRA, malalan’ny foko, IANAO JESOSY oooo🎶

Fahagagana ianao!